Markús í sarpi Hjartar

Markús Sigurbjörnsson heitir maður sem fékkst við lög um margra ára skeið, og gerir líklega enn.  Hann hafði innivinnu í hæstarétti og var sagður röskur á penna.  Markús hafði skoðun á innihaldi bókunar 35 og Hjörtur J. Guðmundsson rifjar í Vísi upp þessi merku orð Markúsar:

„Staðreyndin er hins vegar sú að ekki var mögulegt að ganga lengra innan þess ramma sem stjórnarskrá Íslands setur. Stjórnarskráin gerir hvorki ráð fyrir því að takmarka megi fullveldi lýðveldisins með framsali löggjafarvalds til alþjóðastofnana né að landslög, sem byggjast á alþjóðlegum skuldbindingum eins og EES-samningnum, geti eingöngu af þeim sökum öðlast ríkari stöðu en önnur almenn löggjöf,“   

Annar maður, sem líka sinnti hæstarétti um hríð, heitir Jón Steinar Gunnlaugsson. Þeir Jón og Markús voru stundum ósammála svo að eftir var tekið. 

En þeir voru sammála um að bókun 35 gengi ekki. 

 

https://www.visir.is/g/20242630966d/stenzt-ekki-stjornarskrana

Skoðanakönnunin mætt

Fleiri andvígir bókun 35 en hlynntir

Fleiri eru andvígir frumvarpi Þórdísar Kolbrúnar Reykfjörð Gylfadóttur utanríkisráðherra um breytingu á lögum um Evrópska efnahagssvæðið (EES) vegna bókunar 35 við samninginn en hlynntir eða 39% á móti 35% samkvæmt niðurstöðum nýrrar skoðanakönnunar sem Prósent vann fyrir Heimssýn, hreyfingu sjálfstæðissinna í Evrópumálum. 

 

Fleiri í röðum stuðningsmanna Miðflokksins, Sjálfstæðisflokksins, Flokks fólksins, Framsóknarflokksins og Sósíalistaflokks Íslands eru á móti frumvarpinu en fleiri á meðal stuðningsmanna Viðreisnar, Samfylkingarinnar, Pírata og Vinstrihreyfingarinnar - græns framboðs hlynntir samþykkt þess.

Frumvarp utanríkisráðherra gengur sem kunnugt er út á það að innleitt regluverk frá Evrópusambandinu í gegnum EES-samninginn gangi framar löggjöf sem á sér innlendan uppruna. Frumvarpið var upphaflega lagt fram í mars 2023 en var ekki afgreitt á því þingi. Til stendur af hálfu ráðherrans að leggja það fram á ný á yfirstandandi þingi.

Mest andstaðan við frumvarpið er á meðal stuðningsmanna Miðflokksins samkvæmt könnuninni eða 61% á móti 16% sem eru því hlynnt. Næst koma stuðningsmenn Framsóknarflokksins og Flokks fólksins með 45% andvíg frumvarpinu en 23% og 20% hlynnt því. Þá eru 42% stuðningsmanna Sjálfstæðisflokksins andvíg frumvarpinu en 16% hlynnt. Loks er tæpur þriðjungur stuðningsmanna Sósíalistaflokksins andvígur eða 32% en 22% hlynnt.

 

Fróðlegt er að skoða stöðuna ef aðeins er miðað við þá sem taka afstöðu með eða á móti frumvarpi utanríkisráðherra á meðal stuðningsmanna áðurnefndra flokka. Þá eru 79% stuðningsmanna Miðflokksins á móti frumvarpinu, 72% stuðningsmanna Sjálfstæðisflokksins, 69% stuðningsmanna Flokks fólksins, 66% stuðningsmanna Framsóknarflokksins og 59% stuðningsmanna Sósíalistaflokks Íslands.

Mestur stuðningur við frumvarp Þórdísar Kolbrúnar er á meðal stuðningsmanna Viðreisnar eða 58% á meðan 12% eru því andvíg. Næst koma stuðningsmenn Samfylkingarinnar með 45% hlynnt og 16% andvíg. Þá eru 40% stuðningsmanna VG hlynnt því en 24% andvíg. Loks styður tæpur þriðjungur stuðningsmanna Pírata frumvarpið eða 32% en 12% andvíg því.

„Könnunin sýnir það svart á hvítu að fleiri eru andvígir en hlynntir frumvarpi utanríkisráðherra um að innleitt regluverk frá Evrópusambandinu í gegnum EES-samninginn verði gert æðra innlendri lagasetningu. Þá er til að mynda ljóst miðað við niðurstöðurnar að miklu meiri andstaða er við málið í röðum stuðningsmanna flokks ráðherrans sjálfs en stuðningur,“ segir Haraldur Ólafsson, formaður Heimssýnar.

Könnunin var gerð dagana 18. september til 3. október 2024. Úrtakið var 2.150 einstaklingar, 18 ára og eldri, og var svarhlutfallið 51%. 

Margboðaður sjálfsmorðsleiðangur

Bókun 35 felur í sér tilfærslu á valdi til útlanda.  Erfitt er að sjá fyrir hvaða afleiðingar það getur haft og enn erfiðara getur reynst að ná þessu valdi til baka.  Bókunin gengur gegn stjórnarskrá og EES-samningurinn hefði aldrei verið samþykktur á sínum tíma hefði bókunin fylgt með eins og ætlunin er að hún geri núna.

Þetta, sjálfsmorðsleiðangur stjórnarflokka og fleira var rætt í Bítinu á Bylgjunni í morgun

 

https://www.visir.is/k/76ab28bc-7139-4e1b-82c2-e57852801276-1728287926642

 

 

Viðreisn tekin til skoðunar

Segja má að einn stjórnmálaflokkur hafi beinlínis að meginmarkmiði að færa stjórnvald á Íslandi til útlanda.

Þegar valdið er farið til manna í útlöndum sem þurfa ekki að standa skil á sínu gagnvart fólki á Íslandi felast áhrif landsmanna á landstjórnina í að senda bænaskjöl til Brussel.  Bænaskjölin fara vitaskuld í ruslið, enda hagsmunir annarra en Íslendinga sem þar ráða ferð. 

Hjörtur J. Guðmundsson ræðir þá sérkennilegu stöðu sem Viðreisn er í og lýsir sér meðal annars í að vilja minnka umsvif hins opinbera, en á sama tíma ganga í Evrópusamband sem gerir beinlínis krófu um stórfellda aukningu á umsvifum og stærð stjórnsýslunnar - samkvæmt heimdildum Evrópusambandsins sjálfs. 

Það er nefnilega óleysanleg mótsögn að vilja ganga í Evrópusambandið og að vilja hafa hemil á útþenslu stjórnsýslu. 

https://www.visir.is/g/20242629419d/treystandi-fyrir-stjorn-landsins-

Lengi getur lítið minnkað

Tveir stjórnmálaflokkar fara með himinskautum í skoðanakönnunum.  Annar þeirra er grjótharður fullveldisflokkur og hinn er nýbúinn að setja blauta Evrópusambandsdrauma í salt. 

Flokkarnir sem standa að ríkisstjórn um þessar mundir virðast lengi geta horast, og voru þeir þó ekki feitir síðast þegar spurt var.  Þeirra helsta mál þessa dagana er einmitt að færa meira vald til Evrópusambandsins, í gegnum bókun 35.   Tilviljun?  Ætli það.

https://www.mbl.is/frettir/innlent/2024/10/05/fylgi_stjornarflokka_enn_a_nidurleid/

Kveðja til VG

Heimssýn sendir landsfundi VG bestu kveðjur og minnir á að félagshyggjufólk hefur jafnan gert sér

glögga grein fyrir mikilvægi þess að landinu væri stjórnað í umboði þeirra sem það byggðu og að valdamenn stæðu fyrst og fremst til ábyrgðar gagnvart þjóðinni, en ekki gagnvart embættismönnum í fjarlægum borgum, sem væri sama um hvort Ísland flyti eða sykki.

 

https://www.visir.is/g/20242629807d/kvedja-fra-heimssyn-til-landsfundar-vg-2024

Kjarninn og VG

Sú var tíð að herstöðvaandstæðingar, síðar hernaðarandstæðingar, áttu sér helst skjól hjá VG, þótt sumir þeirra væru í öðrum flokkum.  Engu að síður var einn og einn liðsmaður VG hallur undir Evrópusambandið.  Það var á þeim árum þegar menn trúðu því að Evrópusambandið væri aðeins félag um staðla og almennt hjálpræði.

Mikið vatn hefur til sjávar runnið síðan það var.  Nú á Evrópusambandið í stórstyrjöld í A-Evrópu sem ekki sér fyrir endann á.  Sambandið kaupir sprengjur og fallstykki fyrir himinháar upphæðir, sendir svo dótið austureftir með hvatningu um að þeir sem fái það dragi í engu af sér.  Líklega er búið að drepa hátt í milljón unga menn og viðbúið er að yfir milljón menn séu limlestir.

Þá koma frá utanríkisráðherra til Alþingis boð um að þetta sama Evrópusamband þurfi að ráða meiru á Íslandi.  Á borðum þingflokks VG liggur tillaga um að fyrirmæli frá Evrópusambandinu sem við hæfi þykir að gildi á Íslandi skuli njóta sérstaks forgangs umfram heimagerða löggjöf.  Tillagan heitir Bókun 35.

Það verður væntanlega fyrsta verk þingmanna VG að afþakka þessa Bókun 35 þegar þeir mæta til vinnu eftir landsþing. 

Það stóð aldrei til að gera Ísland að deild í hernaðarbandalagi gömlu evrópsku nýlenduveldanna.

Tíðindi frá VG i pípunni

VG heldur landsfund um helgina.  Þaðan er tíðinda að vænta.

Forystumenn VG boða að litið verði til grunngilda.  Enginn velkist í vafa um að meðal helstu grunngilda VG eru lýðræði og umhverfisvernd.

Á borðum þingflokks VG liggur tillaga um grundvallarbreytingu á stjórnkerfi Íslands.  Hún felst í nýrri forgagngsreglu handa löggjöf sem er upprunnin hjá gömlu stórveldunum á meginlandi Evrópu.  Tillagan heitir Bókun 35 og er furðusmíð sem miðar að því að gæta hagsmuna Evrópusambandsins gagnvart Íslandi.  Varla þarf að ræða lýðræði lengi á landsfundi VG til að bókun 35 lendi í ruslinu. 

Þá er það umhverfið.  Bókun 35 ryður leiðina að innlimun Íslands í orkubandalag Evrópu.  Evrópu þyrstir í hreina orku.  Þrýstingur á meiri orkuframleiðslu, með vatni eða vindi, mun aukast.  Sæstrengur mun þar bæta um betur.  

Og svo sakar ekki að rifja upp að stefna Evrópusambandsins er að orkuframleiðsla sé á frjálsum markaði.  Almenningur eigi á hinn bóginn að borga fyrir tengivirkin.  Núverandi fyrirkomulag á Íslandi passar ekki vel í þá mynd. 

Ef yfirvofandi skerðing lýðræðis dugir ekki til að VG-liðar hendi bókun 35 í ruslið, verður varla annað séð en að áhættan fyrir umhverfið og þrýstingur á einkavæðingu orkuframleiðslu ríði þar baggamuninn auðveldlega. 

Það verður sungið með um land allt þegar ruslakarfan í þingflokksherbergi VG verður tæmd eftir landsfundinn. 

https://vg.is/

 

Já, það er deginum ljósara

Utanríkisráðherra segir að samþykkja verði bókun 35, annað gangi ekki gagnvart EES-samningnum.  

Ef EES-samningurinn krefst frekara valdaframsals til ókjörinna embættismanna í fjarlægum gömlum nýleduveldum er deginum ljósara að það þarf að endurskoða þann samning, en ekki halda áfram á þeirri háskabraut valdaframsals sem verið er að feta. 

Hjörtur J. Guðmundsson rifjar sitthvað upp í sambandi við bókun 35 í nýrri grein.  Hvöss orð háskólamanna í lögum eru þar á meðal.  Hjörtur segir:

Fram kom enn fremur í umsögn um frumvarp Þórdísar sem Stefán Már sendi til utanríkisráðuneytisins í byrjun marz 2023 ásamt Arnaldi Hjartarsyni, aðjúnkt við lagadeild Háskóla Íslands, að sú breyting á lögum um Evrópska efnahagssvæðið sem frumvarpið myndi hafa í för með sér vekti ekki aðeins upp áleitin stjórnskipuleg álitamál „heldur einnig almennar spurningar um hlutverk Alþingis og framtíð lýðræðis á Íslandi.“ Færa þeir þar haldbær rök fyrir því að efni frumvarpsins standist í reynd ekki lögfræðilega skoðun.

 

https://www.visir.is/g/20242628491d/hljomar-kunnuglega-ekki-satt-

Engin þjóð

hefur bætt lífskjör sín til langframa með því að selja valdið til fjarlægra manna.  

Þannig kemst Arnar Þór Jónsson að orði (22. mín), með eðlilegum fyrirvörum, því enginn þekkir alla sögu mannskyns, ekki einu sinni Arnar Þór. 

Þetta er meginatriði í sambandi við tengsl Íslands og Evrópusambandsins, bókun 35 og reglugerðafæribandið frá Brussel til Íslands. 

Viðtalið við Arnar Þór var í Þjóðólfi og er hér í heild:

https://thjodolfur.is/ihaldsstefnan-snyr-aftur/?fbclid=IwY2xjawFnUylleHRuA2FlbQIxMQABHTM9gQIN1VPhgCbbHK6apUZAL-O3OfAkcy6KQF4sWUn_EUd7xX209EFD7A_aem_OlDD6jeFyUo7CrkSJtMLEQ