Össur Skarphéðinsson hagar sér eins og örvæntingarfullur biðilsbuxnastrákur

Hræðsluáróður Össurar Skarphéðinssonar síðustu daga sýnir að hann er orðinn örvæntingarfullur. Í dag sagði hann að ESB væri orðið leitt á EES-samningnum, sem gagnist ekki lengur og eina ráðið sé að samþykkja fullnaðarsamning um ESB.

Kannski lítur Össur á þetta eins og biðilsbuxnastrákur sem er orðinn leiður á því að vera bara trúlofaður kærustunni og vill fá að ganga alla leið með henni í hjónabandi.

Kannski var EES-samkomulagið eftir allt saman ekkert annað en trúlofunarsamningur?

En stelpan er ekki á því að fara að gifta sig. Strákurinn hefur reynst vera hinn versti fantur og nískupúki sem beitir öllum klækjabrögðum til sölsa undir sig heimanmundinn.

Svo reynir Össur að telja okkur trú um að það muni hafa áhrif fyrir fjármálakerfið á Íslandi ef við verðum utan ESB og hins vanþroskaða og vanburðuga bankasambands ESB. Ráðherrann virðist gleyma því að Svíum og Bretum líst ekkert á þann bastarð - og að það er í raun alls óljóst hvernig hann mun líta út eftir 5 eða 10 ár þegar hann verður fyrst kominn á koppinn.

Össur hefur aldrei viljað skilja það að það voru einmitt hinar samevrópsku reglur sem bankarnir störfuðu eftir sem gerðu Icesave-óskapnaðinn mögulegan. Bankafurstarnir fóru sínu fram í þeim efnum á grunni sameiginlegra evrópksra reglna sem allir, nema Samfylkingin, eru nú sammála um að voru meingallaðar.

Annars er merkilegt hvað sumir utanríkisráðherrar sem eru mikið á ferðinni, og líka ýmsir þeir embættismenn sem eru mikið á ferðinni, eru ginkeyptir fyrir sjónarmiðum erlendra aðila. Björn Bjarnason fjallar m.a. hér um það á EVRÓPUVAKTINNI.

Pistill Björns hefst á þessum orðum:

Skýrsla utanríkisráðherra er til umræðu á alþingi í dag, fimmtudaginn 14. febrúar. Í henni gætir gamalkunnugrar óvildar í garð EES-samstarfsins. Innan utanríkisráðuneytisins hefur löngum þótt við hæfi að gera lítið úr gildi þessa samstarfs og draga upp af því neikvæða mynd. Ástæðan fyrir því er einföld: það fellur ekki að hagsmunum þeirra sem berjast fyrir aðild að Evrópusambandinu að EES-samstarfið sé Íslendingum hagstæð leið til samstarfs við ESB.

   .... og honum lýkur á þessum orðum:

Skýrsla utanríkisráðherra sem einkennist af áróðri og spuna er einskis virði sem hlutlægt skjal um stöðu þjóðarinnar á alþjóðavettvangi. Á þessum örlagatímum ætti meiri metnaður að ríkja í skýrslugerð til alþingis en þarna birtist.

Fjármál utan við innri markað?

61,7% atvinnuleysi meðal ungra Grikkja

Vefur Viðskiptablaðsins greinir hér frá því að Grikkir hafi aldrei séð það svartara. Þriðjungur þjóðar er á leið undir fátæktarmörk, atvinnuleysi er 27% í heild og 62% atvinnuleysi hjá fólki á aldrinum 15-24 ára.

Hefur gríska þjóðin ekki liðið nóg fyrir skavanka evrunnar. Við verðum að muna að evran er ein megin ástæðan fyrir þessu, auk lélegrar stjórnsýslu. Evran heldur Grikkjum enn í skrúfstykki.

 

Svo segir vb.is:

Því er spáð að tæpur þriðjungur Grikkja muni verða komnir undir fátæktarmörk fyrir næstu áramót.

Atvinnuleysi mældist 27% á Grikklandi í nóvember í fyrra, samkvæmt samtekt hagstofu landsins. Staðan hefur aldrei verið verri en til samanburðar stóð það í 26,6% í október. Þetta er veruleg aukning á milli ára en atvinnuleysi á Grikklandi mældist 20,8% í nóvember í fyrra. Staðan er verst hjá Grikkjum á aldrinum 15 til 24 ára en í þeim hópi fólks mælist 61,7% atvinnuleysi.

AP-fréttastofan segir stöðu efnahagsmála á Grikklandi afar slæma enda hefur landsframleiðsla þar dregist saman sex síðastliðin ár þrátt fyrir umsvifamiklar björgunaraðgerðir í því augnamiði að forða landinu frá gjaldþroti. AP-fréttastofan vitnar í umfjöllun sinni um stöðu mála á Grikklandi að því sé nú spáð að ekki horfi til betri vegar í efnahagsmálum á allra næstu misserum og sé útlit fyrir að tæpum þriðjungur landsmanna muni verða komnir undir fátæktarmörk fyrir árslok.

 

 

Gylfi baðst afsökunar á Kúbutalinu

Niðurstaðan í Icesave-málinu er ein af ástæðum þess að íslenska ríkið fær nú hærri lánshæfiseinkunn frá lánshæfismatsfyrirtækinu Fitch.

Það var gott við létum ekki undan hótunum ESB-forystunnar. Uppskeran verður m.a. lægri lántökukostnaður ríkisins í kjölfar bættrar einkunnar lánshæfismatsfyrirtækjanna.

Nú sjá ýmsir að sér. Gylfi Magnússon viðurkennir í grein í Fréttablaðinu í dag að ummæli hans um Kúbu norðursins ef við samþykktum ekki Icesave hafi verið bjánaleg - og hann biðst velvirðingar á þeim.

Þetta er virðingarvert hjá Gylfa.

Fitch hækkar lánshæfi Íslands

EES er koníakið í augum Össurar

Jean Monnet hinn franski, koníakssölumaður og einn af frumkvöðlum ESB, lagði grunn að herfræði sambandsins er hann sagði að það að koma mönnum inn í sambandið væri eins og að venja fólk við að drekka koníak. Bara einn lítinn sopa til að byrja með og lítið í einu. En venja fólk við smám saman og tryggja að það haldi nýuppteknum sið. 

Helstu áróðurssmiðir Evrópusambandsins hugsa oft á svipaðan veg. Bara venja menn við eina regluna hér, annað úrræði það - og þá verður ekki aftur snúið. Pizzan verður nefnilega ekki afbökuð þegar einu sinni er búið að baka hana.

Var EES hugsað svona: Fordyri fyrirheitna landsins með hreyfingu í eina átt, þ.e. inn í herlegheitin? Og ekki aftur snúið?

Össur er alltént að reyna að halda því fram.

Eða er þetta bara leikaraskapur í ráðherranum. Samningurinn er jú alltént í gildi.

„ESB hundleitt á EES-samningnum“

Raunveruleg kreppa á evrusvæðinu

Nýjustu mælingar sýna að kreppan er raunveruleg og viðvarandi á evrusvæðinu, samanber meðfylgjandi frétt Morgunblaðsins.

Atvinnuleysið er hrikalegt hjá sumum þjóðum og einkum ungu fólki. Á Spáni og í Grikklandi er helmingur ungs fólks án atvinnu.

Ástandið er aðeins skárra í þeim ríkjum ESB sem ekki hafa evru.

Evran er bölvaldur Evrópuþjóðanna. Það sést - og það væri hægt að útskýra hér í löngu máli.

Efnahagslægðin dýpkar á evru-svæðinu

Gjáin milli evruríkjanna breikkar

Hinir staðföstu evrusinnar trúðu því í upphafi að hagur allra evruríkja yrði jafn og góður.

Allt annað hefur komið á daginn. Bilið í afkomu þjóðanna breikkar stöðugt.

Hörður Ægisson blaðamaður á Morgunblaðinu fjallar um þetta í dag (á blaðsíðu 12 í viðskiptakálfi blaðsins). Hann segir m.a.:

Þegar stofnað var til evrunnar með miklum lúðrablæstri var því haldið fram að samleitni í hagkerfum þeirra þjóðríkja sem hefðu evru sem gjaldmiðil myndi aukast. Sú þróun sem hér hefur verið rakin varpar hins vegar ljósi á það að ekkert slíkt hefur gerst - og ólíklegt að breytinga sé að vænta í þeim efnum á næstunni.

Skilin munu enn aukast

Skilin á milli skuldahrjáðustu ríkjanna í suðri og kjarnaríkja myntbandalagsins, einkum Þýskalands, munu líkast til halda áfram að aukast næstu árin. Samkvæmt spá Alþjóðagjaldeyrissjóðsins mun landsframleiðsla á mann aukast um 10% í Þýskalandi á tímabilinu 2007 til 2016, á sama tíma og hún mun dragast verulega saman í Grikklandi (18,9%), á Ítalíu (9%) og Spáni (6%) (feitl. Heimssýn).