Fréttastofa RUV leiðréttir frétt eftir ábendingu Heimssýnar

Fréttastofa Ríkisútvarpsins hefur nú leiðrétt frétt um niðurstöðu skoðanakönnunar um afstöðu Íslendinga til íslensku krónunnar eftir að við bentum á villuna hér á Heimssýnarblogginu. Í upphaflegri frétt síðastliðinn fimmtudag, fyrir þremur dögum, hélt fréttastofan því fram að könnunin sýndi að jafn margir væru fylgjandi evru og krónu. Jafnframt var sagt að fylgi við evru hefði aukist um 12%. Hins vegar var hvergi minnst á evruna í könnuninni. Því var frétt RUV að stórum hluta hreinn skáldskapur.

Leiðrétting RUV er hér.  Fyrir hana ber að þakka. Vonandi verður hún líka flutt þar sem villan kom upphaflega fram, nefnilega í morgunútvarpinu. Hugsanlega hefði leiðréttingin farið framhjá okkur ef ekki hefði verið fyrir þessa ábendingu.

Það þarf hins vegar að undirstrika í þessu samhengi að þeir sem ekki vilja krónuna hafa skipst í afstöðu til ýmissa gjaldmiðla, svo sem Kanadadals, norskrar krónu og evru.

Það sem er því fréttnæmt í þessu og ber að hafa í huga er að stuðningurinn við krónuna hefur aukist um 12% frá árinu 2009. Enn fremur sýnir þessi könnun að Íslendingar telja engan veginn heppilegt að tekin verði upp evra, en það yrðum við þvinguð til að gera ef við gengjum í Evrópusambandið.  

Minna má að Bjarni Benediktsson fjármálaráðherra sagði í dag að evrusamstarfið hefði valdið katastrófu í Evrópu. Evran er því enginn valkostur fyrir Íslendinga. 

 

Hvað er að gerast á fréttastofu RUV?

Athygli okkar hefur verið vakin á því að fréttastofa RUV mistúlkaði gjörsamlega þá skoðanakönnun sem Fréttablaðið birti í síðustu viku um afstöðu fólks til íslensku krónunnar. Niðurstaða könnunarinnar var að stuðningur við krónuna hefði aukist um 12% frá 2009 og að ríflega helmingur vildi halda krónunni. Ekkert var minnst á aðra miðla.

Hvað segir RUV í frétt sinni síðast liðinn fimmtudagsmorgun um þetta: Að stuðningur við evruna hafi aukist um 12% og helmingur þjóðarinnar vilji fá evruna. Það var algjörlega fjarri sanni, því það var stuðningur við krónuna sem hafði vaxið samkvæmt blaðinu. Ekkert var minnst á aðra gjaldmiðla og líklegt að þeir sem vildu ekki krónuna vildu jafnvel Bandaríkjadal, Kanadadal, norska krónu og eitthvað annað auk evrunnar.

Hefur RUV leiðrétt þessa frétt sína? Hefur RUV beðist afsökunar á þessum vinnubrögðum?

Það er síðan öllu verra að aðrir fréttamenn og þáttastjórnendur ala áfram á þessum misskilningi sem fram kom hjá fréttamanni RUV síðastliðinn fimmtudagsmorgun. Síðast var það Gísli Marteinn Baldursson þáttastjórnandi sem í dag tönnlaðist á því að helmingur þjóðarinnar vildi kasta krónunni - þegar hin raunverulega frétt var að stuðningur við krónuna hafði aukist verulega og ríflega helmingur vildi halda henni.

Hvernig getur umræðan um gjaldmiðlamálin orðið málefnaleg ef fréttamenn RUV og þáttastjórnendur virðast hafa fyrirfram gefnar hugmyndir um hvað standi í skoðanakönnunum, mislesa þær og mistúlka og endurvarpa misskilningnum til þjóðarinnar löngu eftir að búið ætti að vera að upplýsa þá um raunverulega stöðu mála?

 ER ÞAÐ EKKI SJÁLFSÖGÐ KRAFA AÐ RUV GERI HREINT FYRIR SÍNUM DYRUM?  

Hér er frétt RUV um málið:

http://www.ruv.is/frett/krona-og-evra-jafnvinsael-her-a-landi

Jafnmargir Íslendingar vilja halda krónunni og vilja evru. Þetta kemur fram í skoðanakönnun Fréttablaðsins og Stöðvar 2, en alls vilja 50,3 prósent halda krónunni og 49,7 prósent taka upp evru - munur sem er langt innan skekkjumarka.

Stuðningur við evru fer hins vegar stigvaxandi og hefur aukist um tólf prósent frá því í apríl 2009. Það er eingöngu meðal stuðningsmanna Sjálfstæðisflokksins sem meirihluti er fyrir að halda krónunni. Fylgismenn Vinstri-grænna og Framsóknarflokksins skiptast í jafn stóra hópa í afstöðu sinni og hjá fylgjendum annarra flokka vilja fleiri taka upp evru.

 

Hér er fréttin sjálf í Fréttablaðinu:  http://vefblod.visir.is/index.php?s=7853&p=167280

Afstaða landsmanna til krónunnar klýfur þjóðina í tvær jafnar fylkingar samkvæmt niðurstöðum skoðanakönnunar Fréttablaðsins og Stöðvar 2. Helmingur sér krónuna fyrir sér sem framtíðargjaldmiðil landsins, en hinn helmingurinn gerir það ekki.

Alls segjast 50,3 prósent vilja krónuna áfram, en 49,7 prósent vilja það ekki, samkvæmt könnuninni. Munurinn er langt innan skekkjumarka, sem eru um fjögur prósentustig. Afstaða almennings hefur lítið breyst frá því síðast var spurt um afstöðu fólks til krónunnar í skoðanakönnunum Fréttablaðsins og Stöðvar 2. Þegar spurt var eins í lok janúar í fyrra vildu 52,6 prósent krónuna áfram en 47,4 prósent vildu eitthvað annað.

Þegar litið er lengra aftur í tímann má sjá meiri breytingar. Í febrúar 2011 vildu aðeins 40,5 prósent að krónan yrði framtíðargjaldmiðill landsins. Enn færri voru þeirrar skoðunar í apríl 2009, um 38,1 prósent.

Aðeins meðal stuðningsmanna Sjálfstæðisflokksins er meirihluti fyrir því að halda krónunni. Alls segist 65,1 prósent þeirra, sem kjósa myndu flokkinn yrði gengið til kosninga nú, vilja halda krónunni. Um 50 prósent stuðningsmanna Framsóknarflokksins og Vinstri grænna vilja halda krónunni.

Mikill minnihluti stuðningsmanna annarra flokka vill krónuna sem framtíðargjaldmiðil þjóðarinnar. Um 26,3 prósent stuðningsmanna Bjartrar framtíðar vilja krónuna áfram, og 31,6 prósent kjósenda Samfylkingarinnar. Stuðningsmenn Pírata skera sig talsvert úr, aðeins 11,5 prósent þeirra vilja krónuna áfram sem gjaldmiðil hér á landi, en 88,5 prósent vilja það ekki.

Ekki reyndist marktækur munur á afstöðu fólks eftir kyni, aldri eða búsetu.

Hvað sagði Össur? ESB-reglur bölvað rugl?

Það er margt skrafað í þætti Mikaels Torfasonar á Stöð 2 og ekki heyrðist skrásetjara Heimssýnarbloggins annað en að Össur segði að sumar þessar ESB-reglur væru bölvað rugl sem ættu ekkert erindi í íslenskt samfélag?

Bjarni Benediktsson segir evrusamstarfið valda katastrófu í Evrópu

Bjarni Benediktsson, fjármálaráðherra og formaður Sjálfstæðisflokksins, sagði í viðtali við Gísla Martein Baldursson í morgunsjónvarpsþætti Ríkisútvarpsins að evrusamstarfið hefði í för með sér algöra katastrófu fyrir mörg evruríki.

 

Bjarni sagði að þróunin síðustu ár hefðu sannfært hann um að það væri ekki gott að hafa sameiginlega mynt þegar efnahagskerfin færu ólík. Það sæist meðal annars á því að ríkin á suðurhluta evrusvæðisins hefðu verið að safna gífurlega miklum ríkisskuldum.

 

Þegar skýrsla Hagfræðistofnunar um ESB-málin kemur út verður án efa rætt miklu meira um erfiðleikana á evrusvæðiðinu, þ.e. gífurlegt atvinnuleysi, vaxandi fátækt og mikla skuldasöfnun jaðarríkjanna.

Gísli Marteinn leiðréttur um afstöðuna til krónunnar

Það var einkennileg áhersla hjá Gísla Marteini að segja í upphafi sjónvarsþáttar síns í dag að helmingur þjóðarinnar vildi losna við krónuna þegar stuðningur við krónuna hefur aukist verulega á undanförnum árum og samkvæmt nýlegri skoðanakönnun vilji nú meira en helmgingur Íslendinga halda krónunni. Óljóst er hvað hinn helmgingurinn vill því það kom ekki fram í skoðanakönnuninni. 

Það var ekki minnst á evruna. 

Rétt fréttamat hjá Gísla hefði verið að stuðningur við krónuna hefði stóraukist á undanförnum árum og að ríflega helmgingur þjóðarinnar vildi nú halda krónunni.  

Flokksráðsfundur Vinstri grænna þegir um ESB-málið

Katrín Jakobsdóttir minntist ekki einu orðið á ESB-málið í ræðu sinni á flokksráðsfundi Vinstri grænna sem haldinn var í vikunni. Hún varð líka undir á fundi flokksins fyrir ári þegar ályktað var að gefa umsóknarviðræðum eitt ár til viðbótar. Hún var ekki á því heldur vildi þá láta kjósa um áframhaldið.

Nú er árið liðið og því er kannski eðlilegt að Vinstri græn telji enga ástæðu til þess að ræða um ESB, eða álykta sérstaklega um það.

Það er þá kannski kominn tími til að Vinstri græn fari nú að vinna að því að fylgja því stefnumáli sínu eftir að halda Íslandi utan ESB. Því verður tekið fagnandi.