Heimssýn biður um skýringar

Heimssýn hefur sent dómsmálaráðherra bréf. Þar segir svo:

 

Ágæti ráðherra

Athygli hefur vakið að lögreglubílar á Íslandi eru merktir fána erlends ríkjasambands sem Ísland á enga aðild að.  Af því tilefni óskar Heimssýn góðfúslega að fá svör dómsmálaráðherra við eftirfarandi spurningum:

1. Er íslenska lögreglan, eða búnaður hennar, að einhverju leyti fjármögnuð af öðrum en íslenska ríkinu og þá jafnvel erlendum aðila? Tengjast slíkar greiðslur fána Evrópusambandsins á lögreglubílum?  Telur ráðherra viðeigandi að lögreglan sé fjármögnuð með öðrum hætti en með fé frá opinberum aðilum á Íslandi?

 

2. Hefur öðrum erlendum ríkjum eða ríkjasamböndum, íslenskum eða erlendum einstaklingum eða lögaðilum verið boðið að auglýsa á íslenskum lögreglubílum? Ef svo er, hverjir hafa fengið slík boð og á hvaða kjörum?

 

3. Lítur dómsmálaráðherra svo á, að vald það sem lögreglunni er fengið sé að einhverju leyti upprunnið annars staðar en hjá íslenskum löggjafa sem kjörinn er af íslensku þjóðinni?

 

4. Má líta svo á að fánar Evrópusambandsins á lögreglubílum séu birtingarmynd þess að yfirvöld lögreglumála telji sig að einhverju leyti þjóna Evrópusambandsins, en ekki þjóna Íslendinga og íslenska ríkisins?