Heiðarlegur Fischer afhjúpar fals íslenskra aðildarsinna

Joschka Fischer fyrrum utanríkisráðherra Þýskalands skrifaði grein sem birtist í Morgunblaðinu í dag um samrunaþróun Evrópu. Fischer er hlynntur sameiningu Evrópu undir frönsk-þýsku forræði. Alger forsenda samruna álfunnar er að evran haldi velli, segir Fischer. Hann gerir ráð fyrir að evru-ríkin 17 munu gefa frá sér fullveldi sitt til að bjarga evrunni.

Evru-ríkin mun mynda Stór-Evrópu en jaðarríkin halda meira af fullveldi sínu og vera í fríverslunarsambandið við Stór-Evrópu. Bretland og Norðurlönd verða á jaðrinum, segir Fischer. Gefum honum orðið 

Í fyrsta lagi hvað varðar mismunandi samrunahraða Evrópu eftir tveimur brautum, sem hefur verið raunveruleiki síðan í fyrstu lotum stækkunar Evrópusambandsins. Mun sambandið nú skiptast í framvarðasveit (hóp evruríkja) og bakvarðasveit (hin í hópi aðildarríkjanna 27). Þessi formlega skipting mun breyta innra skipulagi ESB í grundvallaratriðum. Undir regnhlíf stækkaðs Evrópusambands munu hinar gömlu brotalínur á milli evrópsks efnahagsbandalags sem leitt er af Þjóðverjum og Frökkum annars vegar og evrópsks fríverslunarbandalags sem leitt er af Bretum og Norðurlöndum hins vegar koma fram á ný. Héðan í frá munu evruríkin ákvarða örlög ESB meira en nokkru sinni, vegna sameiginlegra hagsmuna.

 

Í öðru lagi mun stökkið inn í gjaldeyrissjóð og sameiginlega stjórn efnahagsmála leiða til frekari og víðtækrar skerðingar á fullveldi aðildarríkjanna, í þágu evrópskrar lausnar á vettvangi sambandsins. Má til dæmis nefna að innan myntbandalagsins munu fjárlög einstakra aðildarríkja heyra undir evrópska eftirlitsstofnun.

Fischer er heiðarlegur Stór-Evrópusinni. Íslensku aðildarsinnarnir leggja sig aftur í líma að draga upp falsaða mynd af stöðunni í Evrópusambandinu og hvert það er að þróast.

Evrópusambandið sem Ísland sótti um aðild að sumarið 2009 er ekki lengur til. Við eigum að draga umsóknina tilbaka.