Danskur ESB-sinni metur íslenskt heilbrigði

Stjórnvöld treysta ekki íslenskum sérfræðingum á sviði dýraheilbrigðis til að meta smitsjúkdómahættu af innflutningi dýra og dýraafurða. Á Vinstrivaktinni er vakin athygli á undirferli Jóhönnustjórnarinnar í aðlögunarferlinu að Evrópusambandinu.

Fyrr á kjörtímabilinu stóð innan ríkisstjórnar nokkur styr um það hvort rétt væri að fela íslenskum dýralæknum að meta hættuna af innflutningi á hráu kjöti og lifandi dýrum. Þá strax vildu forsætis- og utanríkisráðuneyti setja málið í hendur dönskum fyrrum embættismanni sem ESB samningamenn hafa valið til verksins.
Nú er uppvíst að hinn danski sérfræðingur hefur verið fenginn til verksins og settur undir hatt utanríkisráðuneytis. Það er ljóst að viðhorf meginlandsbúa sem lengi hafa starfað innan kerfis ESB eru talsvert önnur í þessum málum heldur en þeirra sem hér á landi hafa glímt við hrossapestir og þekkja hörmungarsögu Íslendinga í búfjárinnflutningi.