Ofmat Þórlinds á neikvæðum áhrifum gjaldeyrishafta villir honum sýn

Óbeit og ótti virðist vera aflvaki athafna Þórlinds Kjartanssonar og félaga sem ætla enn á ný að reyna að keyra hugmyndir sínar í gegn á landsfundi Sjálfstæðisflokksins, samanber frétt á vb.is. Þórlindur er formaður efnahags- og viðskiptanefndar Sjálfstæðisflokksins, en hirðir samt ekki um að líta á málin frá öllum hliðum.

Gjaldeyrishöftin hafa bæði kosti og galla. Þórlindur lítur aðeins á gallana - og hann ýkir þá - kannski í þeirri viðleitni sinni að rökstyðja þá skoðun að krónunni eigi að skipta út fyrir einhverja aðra mynt - í þessu tilviki Kanadadollar (sem engin rök mæla með að við tökum upp).

Nú var gjaldeyrishöftunum komið á í tíð Sjálfstæðisflokksins við stjórn landsins. Forystumenn flokksins hafa án efa metið það þannig að kostirnir við að setja höftin á væru meiri en ókostirnir. Kostirnir eru minni sveiflur í gengi og verði en ella hefði orðið, styrkara bankakerfi og lægri fjármögnunarkostnaður hins opinbera og einkageirans.

Höftin hafa því stuðlað að aukinni velferð landsmanna. Við skulum jú ekki gleyma því að þrátt fyrir árangursleysi ríkisstjórnar á ýmsum sviðum hefur hagvöxtur hér á landi verið meiri en í flestum öðrum löndum sem við berum okkur saman við. Líklegt að höftin hafi átt sinn þátt í því.

Ókostir haftanna eru óhagræði tiltekinna og tiltölulega fárra aðila í tengslum við viðskipti og fjárfestingar.

Þetta óhagræði er miklu minna en það hagræði sem almenningur hefur af því skjóli sem höftin veita.

Þess vegna eru Þórlindur og félagar að ofmeta neikvæð áhrif haftanna. Þeir gleyma því að nettóáhrifin eru jákvæð enn sem komið er.

En vissulega ber að stefna að afnámi haftanna eins og Bjarni Benediktsson formaður Sjálfstæðisflokksins hefur ítrekað sagt. En ekki með einhverjum hókus-pókus aðferðum við myntskipti sem enginn ábyrgur aðili getur tekið undir.

Athugasemdir

[Lúðvík Júlíusson, 31.1.2013 kl. 19:10]

Eruð þið eitthvað verri?  Höftin veita ákveðnum hópi fjármagnseigenda mikil forréttindi umfram almenning í landinu.  Hvernig getið þið haldið þessu fram?:

"Ókostir haftanna eru óhagræði tiltekinna og tiltölulega fárra aðila í tengslum við viðskipti og fjárfestingar."

http://www.visir.is/hagnast-um-66-prosent-a-kaupum-rikisbrefa-med-aflandskronum/article/2011628557058

http://www.ruv.is/frett/aflandsfelog-fjarfesta-a-islandi

Hvernig getið þið stutt það að selja landið með þessum afslætti?

[Magnús Helgi Björgvinsson, 31.1.2013 kl. 19:27]

Maður er nú stundum algörlega gapandi af svona málflutningi.  Hvernig í ósköpunum geta gjaldeyrishöft haldið uppi velferð? Nú er ljóst að fjárfestar koma ekki að ráði hér inn nema að það sé tryggt að þeir komi arði sínum út aftur.  þannig að það verður lítið um nýfjárfestingar hér. Þetta angar af einangrunarstefnu sem nálgast nærri Norður Kóreu. Ekki viss um að þetta sé t.d. í anda nærri helming stjónrarmanna í Heimssýn sem m.a. standa í pontu á Alþingi og heimata að höftunum sé aflétt.

[Gunnar Waage (IP-tala skráð) 1.2.2013 kl. 11:02]

Þetta er alveg rétt ályktun sem kemur fram í þessari grein enda þótt þeir séu nokkrir sem bráðliggur á að höftum verði aflétt þá er sem betur fer ekki búið að gera þeim til hæfis. Í raun eru mjög rangar áherslur í þessari umræðu. Hér þyrfti til dæmis að koma á fót virku verðlagseftirliti sem hefði eftirlit með álagningu í verslunum með samanburði við verð í nágrannalöndum okkar. Þetta er ekki flókið mál og yrði gríðarlega samkeppnishvetjandi og til mikilla bóta fyrir neytendur.

Jafnvel með innleiðingu einhvers gjaldmiðils svo sem Kanadadollars sem ég tek undir að er hreinlega absúrd hugmynd, þá situr eftirspurningin um hvernig menn ætla að hafa hemil á verðbólgunni. Hún nefnilega hættir ekkert að vera vandamál nema að síður sé.

Þá spyrja menn líklega; 'og hvernig skal þá tekist á við verðbólguna?'

Svar; Með höftum og sköttum á fjármagsfærslur.

Ég átta mig á að þetta hljómar kannski leiðinlega og einfaldar kannski ekki málið en þetta er nú samt staðreynd málsins. Því ættu menn að sætta sig við að Ísland mun líklega alltaf þurfa að búa við einhver höft jafnvel þótt einhvern daginn verði búið að komast fyrir yfirvofandi fjármagnsflótta. Ástæðan er þessi, verðbólga hverfur ekki með innleiðingu annars gjaldmiðils nema að síður sé.

Í leit sinni að bættum kjörum neytenda ættu því áhugamenn um ESB kannski að óska frekar eftir verðlagseftirliti, sem hefði eftirlit með álagningu í verslunum.bkv