Fánar og merki ESB út um allt til að kynna málstaðinn

Það er meðvituð stefna hjá Evrópusambandinu að fáni þess sjáist sem víðast við stjórnarbyggingar í sambandslöndunum. Ennfremur að merki ESB sjáist alls staðar þar sem smástyrkjum frá sambandinu hefur verið dreift, jafnvel þótt peningarnir komi óbeint frá styrkþegalandinu sjálfu. Tilgangurinn er sá að auka jákvæð viðhorf í garð ESB sem aðila sem styrkir og bætir.

Það má jafnvel sjá tilhneigingu í þessa veru hjá vissum stofnunum hér á landi.

Áróðurssmiðir ESB vildu ganga lengra. Þeir settu fram kröfur um að íþróttamenn bæru merki ESB á landsliðsbúningum sínum. Þá varð fjandinn laus, ekki síst hjá knattspyrnumönnum í Bretlandi. Öllu má ofgera - og tillaga um ESB-merki á landsliðstreyjur hefur aftur verið sett ofan í skúffu.

En það væri fróðlegt að telja þá staði hér á landi þar sem ESB-merkinu hefur verið komið fyrir.

Fána ESB flaggað á forsetahöllinni

Athugasemdir

[Ólafur Björn Ólafsson, 4.4.2013 kl. 09:15]

Sælir, man eftir einum stað á "eyju", sem er í einhverjum drullupolli norður á Akureyri. Þessum fána var stolið fyrir einhverju síðan, veit ekki hvort nýr eða sá gamli var settur aftur upp.

Ánægjulegra þykir mér að sjá heyrúllurnar víðsvegar um landið sem bera þetta merki og þá með einhverju rauðu striki ská yfir merkið sem tákn um andstöðu við aðild.

Kveðja

[Rafn Guðmundsson, 4.4.2013 kl. 10:59]

heimsýnarmenn vita greinilega um svona fána hérna. hvar eru þeir?

[Elle_, 4.4.2013 kl. 21:48]

Fáninn sem hið svokallaða 'Evrópu'samband notar, er ekki fáni sambandsins.  Ekki nóg með að þeir misnoti fána Evrópuráðsins (stofnun sem er með öllu ótengd ESB/Evrópu'sambandinu) þeir stela heiti heillar álfu, hvorki meira né minna. 

Ragnar Arnalds lýsti þessum þjófnaði í september sl. þar sem hann kallaði sambandið: Stærsta áróðursstofnun heims.

------------------------------------------------------------------

Óvíst er með öllu að áköf viðleitni til að smala þjóðum Evrópu saman undir eina stjórn sem lúti forystu Þjóðverja með aðstoð Frakka skili tilætluðum árangri. Óánægjan með sívaxandi miðstýringu ESB fer ört vaxandi. Hrun ESB er raunhæfur möguleiki, sagði forseti þings ESB nýlega.

 

Svonefnd Evrópustofa eyddi tugum milljóna króna um seinustu helgi til að auglýsa ESB í kringum hátíðisdag sem ranglega var nefndur Evrópudagur. ESB er stærsta áróðursstofnun heims og eyðir árlega meira fé til að auglýsa sig en jafnvel Coca-Cola sem lengi átti auglýsingametið. Eins og kunnugt er hefur ESB eignað sér orðið „Evrópa“ og kennir allar stofnanir sínar við álfuna, þótt einungis um helmingur ríkja sem tilheyra Evrópu alfarið eða að hluta séu í ESB.

 

Aftur á móti eru öll ríki Evrópu í Evrópuráðinu (Council of Europe), þ.á.m. Ísland. Ráðið hefur aðsetur í Strassborg og heldur þar þing sín. Lengi vel fékk ESB lánaða þinghöll Evrópuráðsins til fundahalda þegar ESB-þingið fundaði í Strassborg. ESB fékk einnig lánaðan fánann hjá Evrópuráðinu og hefur auglýst hann svo rækilega sem sinn fána að nú halda flestir að blái fáninn með stjörnunum sé einkafáni ESB. En það er rangt. Þetta var upphaflega og er enn fáni Evrópuráðsins. Sú stofnun er með öllu ótengd ESB. Evrópuráðið er samvinnuvettvangur Evrópuríkja og hefur unnið gott starf á ýmsum sviðum, m.a. í menningar- og mannréttindamálum. Bæði sáttmálinn og dómstóllinn um mannréttinda eru afkvæmi Evrópuráðsins.

 

Meginhlutverk ESB er hins vegar að ná undir sig fullveldisrétti sem flestra ríkja álfunnar í þeim gagngera tilgangi að úr verði eitt risavaxið ríki sem jafnist á við Bandaríkin og Kína að völdum og áhrifum. Fram að þessu hefur ESB stækkað hratt og öðlast æ meiri völd. Nú er þó eins og komið sé að tímamótum. Alþýða manna í aðildarríkjum ESB er smám saman að vakna upp af vondum draumi og átta sig á hvernig komið er. Andstaða og mótþrói gegn sívaxandi valdasamþjöppun í ESB er miklu almennari en nokkru sinni fyrr og fólk er að átta sig á því að miðstýringarstefnan er á kostnað lýðræðis og fullveldisréttinda.

ESB er ekki Evrópa, langt í frá - vinstrivaktin.blog.is

[Elle_, 4.4.2013 kl. 22:29]

Hann skrifaði pistilinn í maí, ekki september.