Nú ríður á að efla Heimssýn

Heimssýn vann síðustu orustuna um ESB-málið hér á landi. Stríðið er þó langt frá því unnið. Það þarf að fylgja eftir sigrinum í síðustu kosningum og tryggja að ESB-daðrinu verði hætt fyrir fullt og fast. Ísland og Heimssýn geta einnig miðlað af reynslu sinni til hrjáðra evruþjóða. Það yrði þó allt önnur útrás frá Íslandi en var fyrir hrun.

Erlendis horfa margir til Íslands vegna þess hvernig Íslendingar hafa tekið á bankakreppunni, Icesave-málinu og ESB-aðildarviðræðum nú í síðustu kosningum. Vissulega hefur hvert land sínar séraðstæður og sjaldnast er hægt að yfirfæra reynsluna hráa til nota fyrir aðrar þjóðir. En Íslendingar þykja að sumu leyti fyrirmynd í ýmsu sem þeir hafa gert að undanförnu. Við skulum ekkert vera feimin að tala um það. Evrópubúar vilja hlusta á okkur og við höfum einnig gott af því að heyra aðeins nánar af reynslu Evrópubúa. Heimssýnarfólkið, Icesave-baráttufólkið og ýmsir aðrir af því tagi ættu að láta rödd sína heyrast í Evrópu jafnframt því sem við ættum að hlusta betur eftir því sem er að gerast í álfunni.

Með því að efla tengsl á milli grasrótarstarfsemi og almennings hér á landi og á meginlandinu má áreiðanlega stuðla að því að stýra málum til betri vegar en toppembættismanna- og stjórnmálaelítunni hefur tekist til þessa. Þar er mikið verk að vinna.

En það er líka feykimikið verk óunnið hér á landi við að fylgja eftir sigrinum í síðustu kosningum og því sem stendur í stjórnarsáttmála ríkisstjórnarinnar.

Þess vegna þurfum við að halda baráttunni áfram á fullum dampi þótt hún verði ef til vill með eitthvað öðru sniði en verið hefur.

 

Athugasemdir

[Gyssur Galan (IP-tala skráð) 26.5.2013 kl. 14:02]

Þegar ESB er farið að lauma sér í sokkaskúffuna hjá alsaklausum Íslendingum, þá er nú fokið í flest skjól!

http://www.gys.is/gys/LesaFrett.aspx?ID=318

[Gunnlaugur I., 26.5.2013 kl. 15:16]

Tek undir með greinarhöfundum hér á Heimssýnar blogginu.

"Nú ríður á að efla Heimssýn" Reyndar sem aldrei fyrr.

Þó svo að við getum að hluta til fagnað áfanga sigri í ESB málinu.

Þá þurfum við að herða á því að þessi ríkisstjórn standi almennilega við kosningaloforð sín um að hætta ESB aðildarferlinu og loki á frekari aðlögun og aðlögunarstyrki frá ESB. Og engar refjar.

Einnig að þeir fari ekki upp úr þurru og að ástæðulausu að láta kjós um eitthvað sem að þeir lofuðu aldrei fyrir kosningar. Svo sem eins og að fara að láta kjósa um það hvort að hugsanlega eigi að halda áfram þessu aðlögunar- og aðildarferli og síðan kjósa um það.

Engar gildishlaðnar spurningar, sem í öðru atkvæðinu væru svo látnar snúast um það hvort að fólk sé fylgjandi eða andsnúið þjóðaratkvæðagreisðlum.

Ef að á að fá fram hreint og heiðarlegt svar frá þjóðinni - þá gæti spurningin verið þannig.

Villt þú að íslensk stjórnvöld stefni að ESB aðild þjóðarinnar ? JÁ eða NEI

Ef meirihluti þjóðarinnar svaraði þessari spurningu játandi með yfirgnæfandi hætti þá væru efni til þess að stjórnvöld ættu að halda þessu aðildar- og aðlögunarferli áfram.

Annars ætti að slíta þessum ESB ferli þjóðarinnar fyrir fullt og fast.

Við eigum heldur aldrei að sætta okkur við að svona þjóðaratkvæðagreiðsla fari fram samhliða sveitarstjórnarkosningum eða einhverjum öðrum lögbundnum kosningum.

ESB aðildarmálið er það stórt og mikilvægt fyrir þjóðina að það á að vera aðalmálið og þjóðin þarf að takast á um það án þess að önnur mál séu viljandi eða óviljandi látin skyggja á það.

Eftir þannig alvöru umræðu óttast ég ekki annað en þjóðin muni með upplýstum hætti hafna ESB aðild.

[Austmann,félagasamtök, 27.5.2013 kl. 12:44]

Takk fyrir Gyssur Galan að benda mér á þessa síðu, Gyssur Galan. Ég hef oft haft miklar áhyggjur af skopskyni Íslendinga eftir að Jón Múli og Flosi Ólafs liðu undir lok. Mig grunar, að síðan gys.is sé á vegum Baggalúts, sem eru þeir fyndnustu hérlendis.

[Austmann,félagasamtök, 27.5.2013 kl. 12:52]

Gunnlaugur, spurningin "Vilt þú að íslensk stjórnvöld stefni að ESB aðild þjóðarinnar?" er of loðin. Sjáðu til, ef Katrín Jakobsdóttir hefði verið spurð að þessu fyrir rúmum mánuði síðan, þá hefði hún svarað: "Nei, VG stefnir alls ekki að ESB aðild þjóðarinnar. Hins vegar viljum við klára aðlögunar... úps, ég meina aðildarviðræðurnar og fá að sjá samninginn. Síðan myndum við setja þann samning (les: Lissabon-sáttmálann) í dóm þjóðarinnar með (óbindandi) þjóðaratkvæðagreiðslu".

Svo að spurningin verður að vera einfaldlega: "Viltu að Ísland verði aðildarríki ESB, Já eða Nei"?

[Austmann,félagasamtök, 27.5.2013 kl. 18:20]

Gunnlaugur, spurningin "Vilt þú að íslensk stjórnvöld stefni að ESB aðild þjóðarinnar ? JÁ eða NEI" er allt of loðin. Ef Katrín Jakobsdóttir hefði verið spurð að þessu fyrir rúmum mánuði, þá hefði hún svarað: "Nei, við í VG viljum ekki að íslenzk stjórnvöld stefni að ESB aðild, en við viljum klára aðlögunar... úps, ég meina aðlögunarviðræðurnar og fá að sjá samninginn (les: Lissabon-sáttmálann), og leggja hann síðan í (óbindandi) þjóðaratkvæðagreiðslu bla bla bla."

Spurningin þyrfti að vera svona: "Viltu, að Ísland verði aðildarríki ESB, Já eða Nei?" og/eða "Viltu slíta öllum aðildarviðræðum við ESB þegar í stað, Já eða Nei?"

Og, eins og þú segir sjálfur, ætti þannig atkvæðagreiðsla að vera eins síns liðs og ekki samhliða neinu öðru.

[Austmann,félagasamtök, 27.5.2013 kl. 18:23]

Eitthvað gerðist, þannig að sams konar athugasemd frá mér kom tvisvar. Sú fyrri virtist ekki hafa birzt fyrr en ég hafði skrifað hana aftur. Jæja, enginn skaði skeður.