Ríkisstjórnin gaf fyrirheit fyrir kosningar, segir RUV!

Ekki er nú öll vitleysan eins. Fréttamaður ríkisútvarpsins hafði eftir Árna Páli Árnasyni formanni Samfylkingar í tíufréttum ríkissjónvarpsins að ríkisstjórnin hafi gefið fyrirheit fyrir kosningar! Allir sem eitthvað fylgjast með vita að ríkisstjórn er mynduð eftir kosningar að undangengnum löngum og ströngum samningaviðræðum. Því er tóm della að tala um að ríkisstjórn geti gefið fyrirheit fyrir kosningar - því hún er eðli málsins samkvæmt ekki til þá.

Við skulum gefa Árna og fréttmanninum þann séns að þau eigi við að einhverjir í Framsóknarflokknum eða Sjálfstæðisflokknum hafi rætt um möguleika á þjóðaratkvæðagreiðslu um áframhald viðræðna við ESB. Málið er bara - eins og þetta fólk á að vita - að æðstu samkundur Sjálfstæðisflokks og Framsóknarflokks samþykktu að stefna að því að hætta viðræðum við ESB. Jafnframt undirstrikuðu æðstu lýðræðissamkundur flokkanna að flokkarnir væru á móti aðild að ESB. Ekki nóg með það, því báðar flokksstofnanirnar - sem eru æðstu lýðræðislegu stofnanir flokkanna, þ.e. landsfundur Sjálfstæðisflokks og flokksþing Framsóknarflokks, samþykktu að flokkarnir hefðu engin áform um að halda áfram viðræðum. Ef, hins vegar, svo færi að halda ætti viðræðum áfram þá yrði það undir engum kringumstæðum gert nema að undangenginni þjóðaratkvæðagreiðslu.

Þessi stefna var svo skjalfest sem verkefnalisti ríkisstjórnarinnar í stjórnarsáttmálanum því þessi stefna hlaut brautargengi í kosningunum.

Það eru engin áform um að halda viðræðum áfram - og því engin ástæða til þess að halda þjóðaratkvæðagreiðslu um áframhald viðræðna.

Árni Páll Árnason og Guðmundur Steingrímsson keppast hins vegar við að setja þessa hluti á haus og sífra um að ríkisstjórnin hafi gefið fyrirheit eða lofað þjóðaratkvæðagreiðslu um áframhald viðræðna.

Slíkt er náttúrulega algjör firra eins og allir geta séð sem kunna að lesa sér til um stjórnarsáttmála og stefnur flokkanna.

Er ekki mál að linni? 

Er ekki kominn tími til að nokkrir helstu fjölmiðlarnir í landinu fari að taka hlutverk sitt alvarlega og miði fréttir sínar við þær samþykktir sem skipta máli, samþykktir sem hafa farið í gegnum lýðræðislegt ferli stærstu flokksstofnana og Alþingiskosningar.  

Athugasemdir

[Anna Sigríður Guðmundsdóttir, 16.1.2014 kl. 23:25]

Það er ekkert að marka þessa ríkisstjórn, frekar en þá fyrri, ef aðlögunarferlið ó-umkjósanlega (ó-bindandi skoðanakönnun þjóðarinnar í lok reglurugls-fargans-aðlögunar) er ekki formlega og skriflega dregið til baka.

Ef ekkert hefur verið opinberlega framkvæmt með skriflegri yfirlýsingu í að afturkalla aðlögunina, þá hefur bókstaflega ekkert verið gert!

Mér finnst furðulegt að löglærðir einstaklingar skilji ekki svo sjálfsagða staðreynd, að ekki duga munnlegar yfirlýsingar í heims-samfélags-raunheimum 21 aldarinnar.

Þess vegna endurtek ég, að meðan ekkert hefur verið formlega og skriflega verið stoppað, þá hefur ekkert breyst.

Síðast í dag var verið að vinna samkvæmt einhverjum ESB-aðlögunar-reglugerðum á Alþingi? Þetta lið svissar bara frá skammstöfuninni EES og yfir í ESB? Og heldur svo að þá sé allt í lagi að halda áfram einhverjum aðlögunum að reglugerðar-bankaræningja-rugli EES/ESB? Reglugerðar-rugli sem íslands-stjórnvaldi hefur ekki hingað til þótt þurfa að fylgja (EES)?

Þvílík áframhaldandi banka/lífeyrissjóðs-ræningja-ráðherra/alþingis-þvæla! Lögbrota-stjórn/þing, en ekki lagasetningar-réttlætis-þing!

Svei þessu ráðherra-alþingi öllu saman! Skammist ykkar, og farið að heimsækja elliheimilin og hjúkrunardeildirnar, sem ekki eru víst á tilverulista EES/ESB-framtíðarinnar, frekar en umönnunar-starfsfólk og annað réttindalaust láglauna-þjónustufólk!

M.b.kv.