Birgitta gagnrýnir Samfylkinguna harðlega fyrir að hafa sundrað þjóðinni

Birgitta Jónsdóttir, kapteinn Pírata á Alþingi, segir það hafa verið glapræði hjá síðustu ríkisstjórn að sækja um aðild að ESB á sama tíma og hún ætlaði einnig að breyta stjórnarskránni. Þetta hafi sundrað þjóð sem þurfti á samstöðu að halda.

Í viðtali við RUV segir Birgitta:  

„Ég hefði beðið með og ég sagði við þau ítrekað að þarna væru þau að sundra þjóð sem þarf á samheldni að halda.  Að ætla bæði að breyta stjórnarskránni og sækja um aðild að ESB á sama tíma - það var glæpræði að mínu mati.“ 

Það verður ekki annað séð en að það hafi fyrst og fremst verið Samfylkingin sem hafi sundrað þjóðinni á erfiðum tímum með því að keyra í gegn samþykkt á Alþingi um að sótt yrði um aðild að ESB.

Samfylkingin endaði svo úti í skurði með þessa umsókn og hrökklaðist frá.

Þetta er merkilegur vitnisburður hjá Birgittu. 

Athugasemdir

[Ásmundur (IP-tala skráð) 2.10.2014 kl. 14:44]

Heimskuleg ummæli hjá Birgittu. Það var furðugóð samstaða meðal þjóðarinnar um nýja stjórnarskrá og umsókn um ESB-aðild hefur alltaf skipt umsóknarþjóðum í tvær fylkingar.

Ef Birgitta meinar þetta ber hún sjálf á því ábyrgð. Hún vildi nýja stjórnarskrá og var kosin á þing sem stuðningsmaður ESB-aðildarumsóknar.  Hún greiddi þó atkvæði gegn eigin skoðun eftir að hótun hennar þess efnis vegna annars máls bar ekki árangur.

Þeir sem báru mesta ábyrgð á samstöðuleysi þjóðarinnar í tíð síðustu ríkisstjórnar voru stjórnarandstæðingar sem snerust gegn öllum málum ríkisstjórnarinnar af mikilli heift í anda leiðtoga síns Davíðs Oddssonar. Þeim barst síðan liðsauki í villiköttum Vg.

Hvernig er með formann Heimssýnar, Vigdísi Hauksdóttur? Ég sé aldrei vitnað í hana. Er hún ekki í jafnmiklum metum og Birgitta?   

[Jóhannes Ragnarsson, 2.10.2014 kl. 16:24]

Ég fæ ekki betur séð en að Birgitta hafi á réttu að standa að þessu sinni. Samfylkingarvesalingarnir,ásamt Flokkseigendafélagi VG, höguðu sér eins og rakin fífl í síðustu ríkisstjórn og uppskáru í samræmi við það.

[Elle_, 3.10.2014 kl. 01:03]

Kannski eru þau rakin fífl?

[Helga Kristjánsdóttir, 3.10.2014 kl. 18:48]

Minnist Birgittu sem helstu vonarstjörnu margra okkar sem stóðum ráðþrota á Austurvelli þá örlagaríku daga, þegar fjandmenn ríkisins véluðu um fullveldi þess. Hún er vissulega að skýra rétt frá. Hún sá aðförina gerast á vettvangi.