Öflug andstaða gegn ESB-aðild í Noregi og EES-samningurinn umdeildur

Andstaðan við aðild Noregs að ESB er mjög sterk og umræða um ókosti EES-samningsins er nokkuð stöðugt í gangi. Um sjötíu prósent Norðmanna eru á móti aðild að ESB. Helsta formannsefni Nei til EU á komandi ársfundi samtakanna, Kathrine Kleveland, vill að Norðmenn segi EES-samningnum upp.

Kleveland segir það mjög undarlega stöðu að á meðan 70% af Norðmönnum vilji ekki að Noregur gerist aðili að ESB hafi sambandið samt aldrei haft meiri áhrif í Noregi í gegnum EES-samninginn.

Spurningin er hvort ekki sé ástæða til að ræða þessi mál hér á landi. Það hefur t.d. lítið farið fyrir umræðu um þá staðreynd að það voru EES-reglur sem gerðu íslensku bönkunum mögulegt að þenjast út í Evrópu. EES skapaði lagarammann sem stjórnendur bankanna, illu heilli, notfærðu sér. Fyrir vikið varð fjármálahrunið hér á landi mun stærra. Kannski hefði ekkert eiginlegt fjármálahrun orðið hér á landi ef við hefðum ekki veirð háð EES-reglunum.

Eru EES-reglurnar, sem um ýmislegt geta verið jákvæðar, að valda einhverjum þeim skaða í íslensku efnahagslífi í dag sem við sjáum ekki almennilega - ekki frekar en við vorum fyrir bankahrunið blind á þann skaða fyrir efnahagslífið sem EES-reglurnar gerðu mögulegan? 

Athugasemdir

[Pétur D. (IP-tala skráð) 6.10.2014 kl. 10:37]

Ég er ekki sammála því að án EES-reglana hefði ekki orðið hrun. Ein af ástæðunum fyrir því að bankarnir fóru á hliðina var vegna þess að þeir tóku eigin hlutabréf sem veð fyrir risalánum. Það er harðbannað á hinum Norðurlöndunum (þ.á.m. Danmörku, sem jú er í ESB) og þeir bankastarfsmenn sem reyna það eru umsvifalaust reknir og ákærðir fyrir umboðssvik.

Þegar bankarnir voru einkavæddir og seldir á spottprís til vina og kunningja, sem síðan rændu bankana innanfrá, láðist Alþingi að setja lög um bankastarfsemi eins og tíðkast annars staðar, sem hefði getað verið gert þrátt fyrir EES-samninginn. Sennilega vísvitandi, því ekki mátti gera tilvonandi svikurum erfitt fyrir.

Og í þessu meingallaða íslenzka réttarkerfi hafa svikararnir enn ekki verið dæmdir 6 árum síðar. Talandi um bananalýðveldi.