Gallup: Meirihluti landsmanna er andvígur inngöngu í ESB

Meirihluti landsmanna, eða 50,1%, er andvígur inngöngu Íslands í Evrópusambandið samkvæmt könnun sem Gallup gerði fyrir Heimssýn dagana 16. til 27. júlí síðastliðinn. Fylgjendur aðildar eru 34,2% en 15,6% svöruðu að þeir væru hvorki fylgjandi né andvígir inngöngu.

Ef eingöngu er tekið mið af þeim sem eru annað hvort hlynnt eða andvíg inngöngu Íslands í Evrópusambandið þá eru 59,4% andvíg aðild að ESB og 40,6% hlynnt aðild.

Andstaða við inngöngu er mest hjá þeim sem myndu kjósa stjórnarflokkana. Þannig eru 95% þeirra sem hefðu kosið Framsóknarflokkinn þegar könnunin var gerð andvíg inngöngu Íslands í Evrópusambandið og 83% af  þeim sem hefðu kosið Sjálfstæðisflokkinn. Fjörutíu prósent af stuðningsflokki Vinstri grænna eru á móti inngöngu en 33% hlynnt henni.

Stuðningur við inngöngu er mestur hjá fylgisfólki Samfylkingar, 78%, en þar eykst þó óvissan því það tvöfaldast fjöldi þeirra sem er hvorki hlynntur né andvígur inngöngu frá febrúar. Þá eru 66% af fylgisfólki Bjartrar framtíðar hlynnt inngöngu í ESB og 40% af fylgjendum Pírata.

Alls voru 1482 manns í úrtaki í þessari netkönnun sem Gallup gerði á ofangreindu tímabili. Í hópnum var fólk af landinu öllu, 18 ára og eldri, handahófsvalið úr viðhorfahópi Gallup. Fjöldi svarenda var 825, eða 55,7%.

Spurt var: Ertu hlynnt(ur) eða andvíg(ur) inngöngu Íslands í Evrópusambandið (ESB)? Gefnir voru sjö megin svarmöguleikar, þ.e. að öllu leyti hlynnt(ur), mjög hlynnt(ur), frekar hlynnt(ur), hvorki né, frekar andvíg(ur), mjög andvíg(ur) og að öllu leyti andvíg(ur).

Stærsti einstaki hópurinn af þessum sjö er sá sem er að öllu leyti andvígur inngöngu í ESB og fjölgaði nokkuð í honum frá könnun sem gerð var í febrúar síðastliðnum (fer úr 21,4% í febrúar í 24,6% nú).

Meirihlutinn vill ekki í ESB

Athugasemdir

[Guðmundur Ásgeirsson, 17.8.2015 kl. 16:24]

Gaman væri að vita hverjar niðurstöðurnar yrðu ef innifalin í könnuninni væri spurning um það hvort svarandi hefði kynnt sér aðildarsamninginn (Lisabon sáttmálann)?

[Heimssýn, 17.8.2015 kl. 16:42]

Það er spurning, Guðmundur, hvort fjöldi þeirra sem hafa kynnt sér samninginn sé nægilegur til þess að úrvinnsla á þeirri spurningu yrði talin tölfræðilega marktæk af MMR eða Gallup. Að minnsta kosti er það gisk sumra að þeir sem hafa farið yfir sáttmálann séu ótrúlega fáir miðað við allan fjárausturinn sem ESB hefur lagt í kynningar hér á landi .....

[Guðmundur Ásgeirsson, 17.8.2015 kl. 16:51]

Ég hef hitt fáa sem yfir höfuð vita af því að samningur eða sáttmáli um aðild liggi raunverulega fyrir. Engan hef ég hitt ennþá sem hefur raunverulega lesið þann samning. Samt hefur hann legið fyrir í íslenskri þýðingu utanríkisráðuneytisins allt frá því í ráðherratíð Össurar Skarphéðinssonar.

Við höfnuðum því að samþykkja Icesave samninga án þess að hafa lesið þá fyrst og eftir að hafa gert það lá fyrir skýr og vel rökstudd afstaða gegn þeim. Ég ætlast ekki til þess að minni kröfur séu gerðar til hugsanlegra samninga sem skuldbinda Ísland til að undirgangast hvert annað erlent regluverk.

Kjósum.is

[Guðjón Sigurbjartsson, 18.8.2015 kl. 06:47]

Samkvæmt þessu þurfa einungis 10% landsmanna að skipta um skoðun varðandi ESB aðild til að meirihluti verði kominn fyrir aðild.  

Ef umsókninni verður lokið munu örugglega meira en 10% skipta um skoðun í málinu af því að ESB aðild er okkur hagfelld en fólk vill ekki taka afstöðu fyrr en það veit meira um málið, sem er skynsamleg afstaða, almennt séð.

Eins gott fyrir ESB andstæðinga að berjast gegn því að við klárum umsóknina.

[Heimssýn, 18.8.2015 kl. 22:57]

Það er alltaf  hægt að leika sér með tölur með þeim hætti sem Guðjón gerir hér. Staðreyndin er hins vegar sú að það er stór, stöðugur og sterkur meirihluti Íslendinga gegn því að Ísland gangi í ESB. Samkvæmt nýlegri könnun MMR er meirihlutinn enn stærri en í könnun Gallup. Kannanir hafa reyndar sýnt í gegnum tíðina að kjósendur hafa flestir lítinn áhuga á ESB svona almennt. Ýmis dagleg og meira aðkallandi viðfangsefni eru þeim ofar í huga. Hins vegar hafa ýmsir áhugamenn um erlend og innlend málefni, m.a. í Heimssýn, sem hafa kynnt sér vel ýmis grundvallaratriði er varðar ESB, svo sem er varðar grundvallarsáttmála sem stjórnsýsla ESB byggir á. Þannig er það grundvallarregla hjá ESB að yfirráðin, hin formlegu og endanlegu yfirráð, yfir fiskveiðiauðlindum aðildarríkja, flytjast til Brussel. Þar sæti þá hið endanlega reglugerðar- og lagavald. Það var m.a. af þeirri ástæðu sem Norðmenn höfnuðu aðild að ESB - og það er m.a. af þeirri ástæðu sem margir Íslendingar kæra sig ekki um að Ísland gangi í ESB. Og í Noregi eru 72% landsmanna á móti aðild að ESB!