Tómas Ingi Olrich talar skýrt um stjórnmálastöðuna

Tómas Ingi Olrich, fyrrverandi ráðherra, sendiherra og þingmaður fyrir Sjálfstæðisflokkinn, flutti athyglisverða ræðu á aðalfundi Heimssýnar á fimmtudagskvöldið. Þar fór Tómas Ingi vítt yfir sviðið og greindi þá þróun sem átt hefur sér stað í stjórnmálum hér á landi frá því fyrir fjármálahrunið, meðal annars um það hvernig nýjar átakalínur hafi orðið til og hvernig gildi hafa breyst.

Tómas Ingi sagði meðal annars eitthvað á þá leið að sjálfstraust þjóðarinnar væri nauðsynlegt til þess að stuðla að sem bestum hag. Skortur á sjálfstrausti og vanburðugar stjórnarstofnanir hér á landi væru vísasta leiðin til þess að hagur Íslendinga yrði fyrir borð borinn. Í því efni rakti Tómas Ingi reynslu sína af samskiptum við fulltrúa annarra þjóða á alþjóðlegum vettvangi og sagði að reglur þjóðríkjanna hefðu að jafnaði reynst sterkari og mikilvægari en reglur alþjóðastofnana. Tómas undirstrikaði að auðmýkt á alþjóðavettvangi, líkt og ýmsir hefðu sýnt að undanförnu, byði aðeins yfirgangi annarra heim. Þess vegna yrðu Íslendingar að standa fast á sínu og varast undirgefni við aðrar þjóðir eða alþjóðastofnanir.

Tómas sagði að skortur á sjálfstrausti, of mikil undirgefni gagnvart stjórnvöldum annarra ríkja eða alþjóðastofnana og upplausn í stjórnmálum hefði verið of einkennandi að undanförnu. Þessu tengdist krafan um svokölluð samræðustjórnmál og ótti við erfiðar ákvarðanir. Stjórnmálamenn væru of fljótt tilbúnir til að gefa eftir og semja og þessu tengt væri að margir vildu „kíkja í pakkann“ í Evrópumálum. Þessar aðstæður endurspegluðu skort á pólitískri forystu í landinu og almennan ótti við að taka af skarið.

Þá hafði Tómas orð á því að frelsi væri lykilatriði, m.a. í viðskiptum, að kapítalisminn væri verkfæri í þeim efnum en að varast bæri að setja viðskiptin á sams konar stall og gert hefði verið fyrir fjármálahrunið.

Tómas fór nokkrum orðum um skortinn í heiminum á vatni, matvælum og orku og um tengsl þess við umhverfismálin. Hann sagði að forsenda sjálfstæðis væri sjálfstæður aðgangur að matvælum og orku.

Þá tók Tómas það fram að það væri afstaða hans að það bæri að afturkalla umsóknina um aðild að ESB með skýrum hætti. Eins og staðan væri núna væri umsóknin bara í dvala og auðvelt væri að vekja hana til lífsins á ný.