Kommissar Oettinger óttast að ESB hrynji vegna popúlisma

Fulltrúi Þjóðverja í framkvæmdastjórn ESB, Günther Hermann Oettinger, óttast að ESB hrynji vegna þess sem hann kallar aukinn „populisma“ í álfunni og vegna „populiskra“ ríkisstjórna. Oettinger útskýrir ekki frekar hvað hann á við eða hvaða ríkisstjórnir hann hefur í huga.

Þegar flett er upp orðinu „populism“ í orðabók má finna orðið „almúgastjórnmál“. Það á kannski sérstaklega vel við í þessu samhengi þar sem ESB er stýrt af „elítustjórnmálamönnum“, sem annað hvort hafa gengið í sérstaka skóla sem lokaðir eru öllum almenningi, eða almúganum, eins og á við í Frakklandi, eða að forystumenn eru aldir upp af hinni pólitísku elítu sem ræður ríkjum í mörgum Evrópulöndum.

ESB virðist því í mörgum tilvikum fremur vera fyrir elítuna á ýmsum sviðum mannlífs í álfunni en síður fyrir almúgann - eins og reynslan sýnir m.a. þegar kemur að atvinnumálum og ýmsum félagsmálum. Þannig hefur evran verið ágæt fyrir sum fyrirtæki en aukið gífurlega á efnahagsvanda almennings með auknu atvinnuleysis, skuldafjötrum og fleiru þess háttar. 

Reyndar eru nafngiftir, eða uppnefni, eins og að ofan greinir ekki óalgeng aðferð af hálfu forystumanna ESB. Ef einhver er ósammála þeim hengja þeir á hann einhver nöfn. Þau skipta sjálfsagt orðið tugum. Einhvern tímann var talað um einangrunarsinna, þá þjóðernissinna og nú er reynt að klína orðinu popúlisti á þá sem ekki kyngja öllu ótuggðu sem frá ESB kemur.

Þetta síðasta uppnefni endurspeglar hins vegar líklega ágætlega þankaganginn hjá ESB-forystunni: Það má ekki vera vilji almúgans, þ.e. fólksins í viðkomandi löndum, sem ræður ferðinni, heldur verður það að vera elítan sem samankomin er í Brussel sem á að deila og drottna yfir álfunni.

Það er heldur ekkert fjarri lagi að álykta að ef almúginn í löndunum sættir sig ekki við ESB eins og það er þá sé sambandið í bráðri hættu.

 

Athugasemdir

[Jóhann Kristinsson, 5.1.2016 kl. 01:20]

Það er ekki popúlismi sem kemur velferðarkerfi ESB fyrir kattarnef, það verða flóttamenn og hælisleitendur sem sjá um það hlutverk.

Kominn tími til að koma sérhagsmunaklíku ESB fyrir kattarnef, fólk sem greiðir ekki skatta, hefur sér skóla fyrir afkvæmi sín og fær frítt húsnæði fyrir utan alskonar önnur fríðindi sem sérhagsmunaklíkan fær á sér enga framtíð.

Þegar ég les um ESB sérhagsmunaklíkuna, dettur mér í hug hirðfíflinn (sérhagsmunaklíkuna) hjá frökkum á dögum Lúðvíka kóngana.

Kveðja frá Las Vegas