Goldman Sachs hjálpuðu Grikkjum að svindla sér inn á evrusvæðið

Þau voru athyglisverð ummælin hjá Ögmundi Jónassyni, fyrrum þingmanni og ráðherra, í þættinum Silfrið í Sjónvarpinu um að hinn stóri alþjóðlegi fjárfestingabanki Goldman Sachs hefði hjálpað Grikkjum að svindla sér inn á evrusvæðið. Það er jú vitað að hagskýrslur sögðu ekki rétta sögu um grískan efnahag þegar Grikkir sóttust eftir að fá að taka upp evru. Síðustu 10 árin eða svo hefur evran verið Grikkjum vaxandi fjötur um fót.

Hlutur hins alþjóðlega stórbanka, Goldman Sachs, er forvitnilegur og við stutta leit á alnetinu kom upp frétt í breska fjölmiðlinum Independent þar sem segir frá því hvernig Grikklandi tókst að halda sig innan svokallaðra Maastricht-viðmiða, sem var forsenda fyrir evruupptöku, með flóknum fjármálagjörningum þessa stóra alþjóðlega fjárfestingabanka sem áttu að láta opinberar skuldir Grikkja líta betur út.

Þau eru mörg vítin sem ber að varast.

Athugasemdir

[Gunnar Rögnvaldsson, 2.4.2017 kl. 15:49]

Hagstofa ESB, Eurostat, aðstoðaði einnig dyggilega.

Þýskaland gerði hið sama og Grikkland, en á annan hátt.

Frakkland gerði hið sama, en á annan hátt. 

Sjá: Europe's Original Sin - National Leaders Ignored Greece's Soaring Debt for Years (Wall Street Journal 3. mars 2010)

og

Þýskaland felur skuldbindingar ríkissjóðs í skattaskjólum  4. desember 2013.

Kveðjur

[Heimssýn, 2.4.2017 kl. 15:54]

Takk fyrir þessar ábendingar, Gunnar.

[Jón Steinar Ragnarsson, 3.4.2017 kl. 00:20]

Held að efnahagsförðun sé sérstakt fag í bankageiranum. Greiningardeildir byggja á slíkum förðunarmeisturum. :)

Nú keppast þeir við að fegra þensluna hér og segja okkur að nú sé þetta allt annað en 2007. Það er púðrað og varalitað hægri vinstri og við erum bara nokkuð hress með það.