Framsókn stendur vörð um fullveldið

Á flokksþingi Framsóknarflokksins um síðustu helgi var tekin afgerandi afstaða gegn því að orkulöggjöf Evrópusambandsins verði tekin inn í samninginn um evrópska efnahagsvæðið. Fram kom í ályktun sem samþykkt var um málið að þannig vildi Framsóknarflokkurinn meðal annars standa vörð um fullveldi Íslands.

Í umræðum um málið kom fram að Evrópusambandið hafi ákveðið að taka upp aukna miðstýringu í orkumálum undir yfirstjórn orkustofnunar (ACER) og legði áherslu á að sama regluverk og þar með að vald ACER næði til Íslands, færi svo að Ísland undirgengist orkulöggjöfina. Framsóknarflokkurinn hafni því enda sé það algerlega óásættanlegt að erlendu stjórnvaldi verði falin bein eða óbein völd yfir orkumálum þjóðarinnar.

Athugasemdir

[Jón Steinar Ragnarsson, 18.3.2018 kl. 14:30]

Ef ACER verður samþykkt, þá er ekkert því til fyrirstöðu að fela ESB yfirstjórn yfir fiskveiðimálum okkar. EF það kostar að slíta EES samningnum til að stöðva þessa hljóðlausu yfirtöku, þá verður það bara að vera svo. Allar forsendur þessa samnings eru lööngu brotnar sem og forsendur þær sem þjóðinni var selt þetta.

Lítið fór fyrir þjöðaratkvæðum þá. Kannski að það sé komið að því að kjósa um þetta núna, þótt seint sé.

[Bjarni Jónsson, 18.3.2018 kl. 22:37]

Eins og talað út úr mínu hjarta, það sem Jón Steinar skrifar hér að ofan.

Má ég ennfremur benda á, að Landsfundur Sjálfstæðisflokksins samþykkti m.a. þetta í dag:

"Sjálfstæðisflokkurinn hafnar frekara framsali á yfirráðum yfir íslenzkum orkumarkaði til stofnana Evrópusambandsins."

Svo kann að fara, að norska Stórþingið hafni frumvarpi ríkisstjórnarinnar um aðild Noregs að Orkusambandi ESB.  Þar með verður þetta mál úr sögunni í bili, en ásækni ESB mun ekki linna.  Hvorki Íslendingar né Norðmenn vilja afhenda ESB yfirráðin yfir einu málefnasviði á eftir öðru bakdyramegin gegnum EES.