Arnar Þór ávarpar Heimssýnarfund

Arnar Þór Jónsson, dómari og frambjóðandi í prófkjöri Sjálfstæðisflokksins ávarpaði aðalfund Heimssýnar 9. júní sl. Arnar Þór ræddi meðal annars með hvaða hætti vald hefur færst í smáum skömmtum út fyrir landsteinana í skjóli EES-samningsins án þess að nein umræða hafi farið fram um það að heitið geti.  Hann lagði áherslu á að það væri misskilningur að ákvæði um að Íslendingar gætu afþakkað tilskipanir frá Evrópusambandinu væru bara til skrauts. 

Ávarpi Arnars Þórs var afar vel tekið og spunnust fjörugar umræður.  Þess er von að fjörið verði ekki minna í herbúðum Arnars Þórs þegar talið verður í yfirstandandi prófkjöri Sjálfstæðismanna um helgina. 

 

 

 

Athugasemdir

[Bjarni Jónsson, 11.6.2021 kl. 10:14]

Arnar Þór getur lagt fræðilegan grunn að andófi gegn stjórnarháttum, sem stríða gegn grunngildum raunverulegra lýðræðissamfélaga.  Að breyta Alþingi í stimpilstofnun erlends yfirþjóðlegs valds, er svo alvarlegur gjörningur, að flestir þingmenn hafa neitað að horfast í augu við það, heldur stungið hausnum í sandinn.  Á næsta kjörtímabili hillir undir breytingu á þeirri ótrúlegu stöðu.  Í Noregi á sama þróun sér stað, en þar er munurinn sá, að borgaraleg öfl eru klofin til þessa máls.  Þar standa vonir til, að verkalýðshreyfingin muni ná að leiða Verkamannaflokkinn af villu síns vegar.  Hún er búin að fá upp í kok af "gerðum" ESB, sem ógna atvinnuöryggi og réttindum hins vinnandi manns (í öllum stéttum).

[Helga Kristjánsdóttir, 11.6.2021 kl. 15:39]

Akkurat Bjarni og ekki hefur þú legið á liði þínu að koma viti fyrir þá sem virka eins og þeir séu leikmenn ESB. (líkja við Evrópukeppni fótbolta sem er að byrja)