Er ekki bara best að kjósa snúrubandalagið - og svo aldrei neitt framar?

Á 19. öld komust menn að því að best væri að allir notuðu sömu mælieiningar fyrir massa og lengd.  Svo hét að menn frá ýmsum löndum ættu þar hlut að máli, en ljóst er að Frakkar vógu þungt á Parísarráðstefnunni 1875 þar sem þetta var ákveðið.   Allir Íslendingar mæla kílógrömm og metra daglega, en engum sögum fer þó af neinum sem hefur talið það ástæðu til að Ísland yrði hjálenda Frakklands.   

Allnokkru síðar varð 230V spenna að því sem kalla mætti staðalspennu í flestum rafkerfum í Evrópu. Að engum ólöstuðum áttu Þjóðverjar þar stærstan hlut að máli.  Öll notum við rafmagn frá morgni til kvölds, en engum kom þó í hug að í því fælust rök fyrir því að Íslendingar ættu að verða þegnar Þýskalandskeisara, eða þeirra sem þar réðu þegar hann fór frá.

Fréttir hafa borist af því að tegundum símasnúra fari fækkandi og að þar eigi Evrópusambandið hlut að máli.  Á Íslandi er lítill en hávær söfnuður fólks sem vill færa ríkisvaldið á Íslandi til Evrópusambandsins.  Fátt hefur verið um rök í því máli, fyrr en nú.  Er ekki augljóst að best sé að Íslendingar verði þegnar í ríki sem greiðir úr símasnúruflækjum?

 

https://www.frettabladid.is/skodun/ad-kraftelska-stadla-og-esb/

Athugasemdir

[Gunnar Heiðarsson, 16.10.2021 kl. 08:24]

 Ekki verður betur séð af skrifum þessarar konu en að hún eigi eitthvað erfitt með að átta sig á hvað hana vanti, þegar hún fer að versla. Hvorki staðlar né esb aðild mun hjálpa henni þar. 

[Jón Steinar Ragnarsson, 17.10.2021 kl. 17:49]

Fann ekki alveg samasemmerkið milli þess er hún kallar neytendavernd og úrvals eða staðla. Ég hef kannski misskilið hugtakið vernd alla tíð.

Valkvíðavernd ríkisins vantar alveg.