Evrópusambandið og fallbyssufóðrið

Flestum er í fersku minni þegar umsókn um aðild Íslands að Evrópusambandinu var samþykkt á Alþingi 16. júlí 2009.  Þar voru í fararbroddi stjórnmálahreyfingar sem hafa löngum talið sér skylt að veita friðar- og afvopnunarmálum brautargengi.  Ekki vildu allir á þeim bæjum horfast í augu við hið hernaðarlega eðli Evrópusambandins og mösuðu þess í stað í sífellu um að þeir hefðu oft komið til Evrópu og aldrei séð Evrópusambandshermann.

Nú, rúmum áratug síðar stingur Evrópusambandið sér á bólakaf í blóðuga styrjöld í Evrópu. Sambandið kaupir og afhendir vopnin.  Ekki er þörf á að kaupa menn til að bera þau, því einn styrjaldaraðila útvegar þá með því að afnema ferðafrelsi og þvinga menn nauðuga í veg fyrir byssukjaftana.  Það er gamall evrópskur siður sem Evrópusambandið kippir sér lítið upp við, og kannski ekki heldur vinir þess á Íslandi.

https://ec.europa.eu/commission/presscorner/detail/en/statement_22_1441

Athugasemdir

[Ómar Geirsson, 28.2.2022 kl. 16:48]

Með fullri virðingu.

Hefur rússneska sendiráðið yfirtekið þessa síðu Sjálfstæðisfólks þjóðarinnar??

Þó margir í okkar hópi afneiti lofslagsbreytingum vegna brennslu jarðeldsneytis, og þeir eigi sniðmengi með fólki sem afneitar alvarleik drepsóttarinnar sem kennt er við kóvid, þá er það hliðarspor viðkomandi sem vissulega skaðar okkur hin sem teljumst vera með fulli fimm, en slík hliðarspor hafa ætíð verið utan þessa ágæta bloggs sem Heimsýn hefur staðið fyrir.

Færslan hér að ofan er svo heimsk, að það er ekki einu sinni hægt að gráta hana, hún er misnotkun á þeim málstað sem þessi bloggsíða stendur fyrir, og hún er árás á heilbrigða skynsemi fólks.

Pótintátar rússneska sendiráðsins munu líklegast svara með þrautæfðum þvættingi, en ef ræturnar má rekja til þeirra forheimsku sem Útvarp Saga stendur fyrir, með fyrri rótum á afneitun Kóvid faraldursins eða áhrifa gróðurshúsloftslagslofttegunda á loftslag og hitastig jarðar,  þá verður svarið við þessari athugasemd þögnin ein.

Því heimskt fólk er sjaldan svo heimskt að það hefur ekki vit að þegja þegar bent er á heimsku þess.

Og vettvangurinn er ekki á Útvarpi Sögu, Fréttin.is eða á öðrum síðum forheimskunnar.

Það afsakar samt ekki skömmina sem Heimsýn er flækt í.

Hafið þið ekki fattað það.

Skammist ykkar.

En samt með vinsamlegri kveðju að austan.

[Þorsteinn Briem, 1.3.2022 kl. 12:58]

1.3.2022 (í dag):

Meirihluti Finna vill að Finnland fái aðild að NATO

13.9.2015:

Meirihluti Svía vill að Svíþjóð fái aðild að NATO

[Helga Kristjánsdóttir, 1.3.2022 kl. 15:31]

Allt er heimska hjá mega heimsreglunni eða hvað? Það opinberar óvart Krea Rudik með mynd af sér og vopni í höndum;
"Erum ekki aðeins að berjast fyrir Úkraínu,heldur líka fyrir nýju heimsreglunni.  

[Ómar Geirsson, 1.3.2022 kl. 16:39]

Blessuð Helga.

Þannig séð er það sök sér að aðhyllast Vúdú sem og aðra hjátrú á gamals aldri, að vera kennari þekkingar og heilbrigðar skynsemi gerir bábiljuna aðeins krúttlegri.

En þú ert móðir og amma Helga, bullið varðandi New order er bein atlaga að framtíð þess lífs sem þú á sínum tíma sórst að vernda.

Samt ekki nærri eins skaðlegt en sú heimska að tala um fallstykki Evrópu, svona í ljósi þess að Evrópa fann ekki upp stríð um yfirráð, eðli málsins vegna því ísaldarjökulinn fór seinna frá okkur en sunnar við Miðjarðarhaf.

Eða það ógeð, sem fékk mig til að setja inn þessa athugasemd, að hæðast að því að þegar smærri þjóð sem sætir innrás, skuli bregðast við með herkvaðningu bardagafæra manna.

Það óeðli vansæmir þann málstað sem Heimssýn stendur fyrir.

Enda þegir kjúklingurinn sem hélt að hann væri í skjóli, vansæmdin fyrir hina sem bendla nafn sitt við Heimssýn, minnkar samt ekki við þá þögn.

Þetta er eins og að vega að fjöregginu sjálfu.

Kveðja að austan.

[Helga Kristjánsdóttir, 1.3.2022 kl. 23:35]

Og langamma drengur (ekki kennari)sem metur ekki færslu Heimsýnar sem háð í garð Úkraínsku þjóðarinnar.Upphaf færslunnar er ádeila á stjórnmálahreyfinguna sem í fararbroddi áorkaði eftir hrun að fá samþykkta umsókn í ESB. Ætla ekki að endurrita neitt sem þar/hér er skrifað en allan þann tíma síðan hef ég fylgst með þeim sem samþykktu umsókninni og veit ekki betur en þú og ELLE mín elskuleg hafi verið stótyrt af hneykslun vegna þeirrar samþykktar. 
  Aðeins um þjóð;hversu oft hefur þetta samband fyrirlitið merkinguna þjóð? Engin landamæri! Um fátt hefur verið meira barist en einmitt þau sem veita skjól og varnir. Oftast er undanfarinn augljós er samþjappað lið er orðið gráðugt í lóðir og auðlindir. Bíð öllum hér góða nótt.

[Ómar Geirsson, 2.3.2022 kl. 08:24]

Blessuð Helga.

Evrópusambandið er eins og það er og hvað mig varðar þá held ég að óbeit mín á þessu frjálshyggjubandalagi stórfyrirtækja hafi aukist með árunum.

Það kemur þessu máli bara ekkert við og það er sjaldgæf lágkúra að tengja sjálfstæðisbaráttu okkar við það sem er að gerast í Úkraínu eins og höfundur færslunnar gerir í þessum pistli.

Þetta er ekki stríð tveggja ríkja um yfirráð yfir landsvæðum, heldur sætir annað ríkið miskunnarlausri árás þar sem reynt er að brjóta sjálfstæði þess á bak aftur.

Fórnarlömbin eru venjulegt fólk eins og ég og þú, börn þess og barnabörn.

Það er hráskinsleikur að gefa eitthvað annað í skyn.

Kveðja að austan.

[Þorsteinn Briem, 2.3.2022 kl. 08:58]

Pútín er sem sagt ekki að ráðast á Úkraínu vegna þess að Úkraína vill fá aðild að Evrópusambandinu og NATO, þar sem öll ríkin eru fullvalda og sjálfstæð ríki.

Með aðildinni að Evrópska efnahagssvæðinu (EES) er Ísland de facto í Evrópusambandinu, enda fylgir íslenska ríkið Evrópusambandinu og NATO í einu og öllu.

Og enginn stjórnmálaflokkur, sem á sæti á Alþingi, vill segja upp aðild Íslands að Evrópska efnahagssvæðinu, ekki einu sinni Flokkur fólksins eða Miðflokkurinn.

[Þorsteinn Briem, 2.3.2022 kl. 09:20]

Evrópusambandið er sem sagt frjálshyggjubandalag en undirritaður hélt að mörlenskir frjálshyggjumenn væru á móti aðild Íslands að Evrópusambandinu vegna þess að það væri vinstrisinnað bandalag.