"Algjört brjálæði að ganga í ESB"

Gabriel Stein, aðalhagfræðingur alþjóðahagfræðisviðs Lombard Street Research, hélt erindi á ráðstefnu sem fram fór 23. ágúst sl. á vegum Rannsóknamiðstöðvar um samfélags- og efnahagsmál (RSE) þar sem hann fjallaði um þá möguleika sem hann telur Íslendinga standa frammi fyrir þegar kemur að framtíðar fyrirkomulagi peningamála hér á landi. Talsverða athygli vakti að bæði á ráðstefnunni sem og í samtali við Blaðið daginn eftir varaði Stein sérstaklega við því að Íslendingar gengju í Evrópusambandið, enda myndi það m.a. ganga af íslenskum sjávarútvegi dauðum.

"Þegar kemur að Íslandi er það mitt persónulega mat að það væri algjört brjálæði fyrir ykkur að ganga í Evrópusambandið. Ef þið gangið í sambandið verður að sjálfsögðu fyrirvari um að enginn komi nálægt fiskveiðilögsögunni. Innan tveggja eða þriggja ára verður Ísland dregið fyrir Evrópudómstólinn af spánskum sjómanni. Að sjálfsögðu mun dómstóllinn úrskurða að svona misræmi gangi ekki upp og innan tíu mínútna verður spánski og portúgalski flotinn kominn til að ryksuga upp miðin," sagði Stein við Blaðið. Á ráðstefnunni sagði Stein ennfremur að gengi Ísland í Evrópusambandið á einhverjum tímapunti þá gætum við ekki sagt að við hefðum ekki verið vöruð við því.

Athugasemdir

[Gunnlaugur B Ólafsson, 30.8.2007 kl. 23:55]

Það eru alltaf einhverjir sem finna það út að samstarf við útlenda verði til tjóns í einhverjum reikningsskilum frekar en til hagnaðar. Það var nú líka einhver erlendur stórspekúlant og spútnik sem rakti það hversu mikið við græddum á að taka upp evruna. En frá því er ekki sagt á þessum stað. Það er verið að hræða okkur, ekki síst á þessari ágætu síðu.

[Hjörtur J. Guðmundsson, 31.8.2007 kl. 10:16]

Já, gaman að þessum einhverjum erlendum stórspekulöntum og spútnikum ;)

Annars hefur verið reynt af ófáum Evrópusambandssinnum að hræða okkur a.m.k. sl. 20 ár eða svo um allt færi norður og niður ef við gengjum ekki í sambandið (og forvera þess) en raunin hefur af einhverjum ástæðum orðið allt önnur. Hér gengur að flestu leyti mun betur en innan Evrópusambandsins, merkilegt nokk :)

[Baldur Kristjánsson (IP-tala skráð) 31.8.2007 kl. 19:16]

Aldeilis stórtíðindi hérna á ferðinni sem munu líklega valda straumhvörfum í Evrópuumræðunni á Ísland - Spánverjar og Portúgalar munu ryksuga upp allan fiskinn okkar ef við göngum í ESB!

Ekki man ég eftir hræðsluáróðri af hálfu Evrópusambandssinna - ég er nokkuð viss um að raunin verði ekki galtóm fiskimið, 20% atvinnuleysi, herskylda og sovéskt einræði ef Ísland gengur í Evrópusambandið, heldur mun okkur áfram ganga vel og sennilega mun betur en ríkjum sem standa utan sambandsins t.d. Albaníu og Hvíta-Rússlandi.

[Hjörtur J. Guðmundsson, 31.8.2007 kl. 20:20]

Aðalatriðið í þessari Evrópuumræðu allri er nú það að ef við göngum í Evrópusambandið munum við algerlega vera upp á náð og miskunn þeirra sem ráða ferðinni þar á bæ með flest okkar mál og það verðum ekki við sjálf.

Ég er líka nokkuð viss um að Ísland muni ekki einangrast ef við göngum ekki í Evrópusambandið, að efnahagslífið hér á landi muni áfram standa betur að vígi en víðast hvar innan sambandsins þó við höldum í sjálfstæðið og að EES-samningurinn muni þjóna hagsmunum okkar á meðan við teljum okkur hafa hag af honum.