Segir ákvæði um aukin áhrif þjóðaþinga aðildarríkja ESB gagnlaus

Eitt af því sem forystumenn Evrópusambandsins hafa fullyrt er að með fyrirhugaðri stjórnarskrá sambandsins (sem var endurskírð Lissabon-sáttmálinn eftir að franskir og hollenskir kjósendur höfnuðu henni í þjóðaratkvæði í byrjun sumars 2005) muni þjóðþing aðildarríkjanna fá aukin áhrif á lagasetningu sem samþykkt er á þingi Evrópusambandsins. Á dögunum greindu hins vegar þýskir fjölmiðlar frá því að Hans-Jürgen Papier, forseti stjórnlagadómstóls Þýskalands sem m.a. er ætlað er að hafa eftirlit með setningu laga í landinu, hafi lýst þeirri skoðun sinni að ákvæði stjórnarskrárinnar um aukin áhrif þjóðþinga aðildarríkjanna séu gagnslaus og ennfremur óhagkvæm auk þess sem á skorti að völdum Evrópusambandsins séu settar skorður gagnvart aðildarríkjunum.

Í ágúst 2003 lýsti Siegfried Bross, dómari við stjórnlagadómstólinn og leiðandi sérfræðingur í Evrópurétti, hliðstæðum áhyggjum af stjórnarskránni. Eitt helsta valdamálið við hana væri að það kæmi ekki skýrt fram í henni hvar mörkin á milli valdsviðs Evrópusambandsins annars vegar og aðildarríkjanna hins vegar eigi að liggja. Þetta væri galli sem ekki mætti vanmeta. Bross sagðist ennfremur telja að árekstrar, á milli Evrópusambandsins og einstakra aðildarríkja þess vegna valdskiptingar, ættu eftir að aukast í framtíðinni samfara því sem sambandið geri kröfu til meiri og meiri valda á kostnað aðildarríkjanna.

Heimildir:
German constitutional court says new powers for national parliaments in Lisbon Treaty not effective (Openeurope.org.uk 25/02/08)
Top German judge fears too hasty EU constitution (EUobserver.com 21/08/03)

---

Rétt er að hafa ávallt hugfast að umræðan um Evrópumálin snýst fyrst og síðast um það hvort við Íslendingar eigum áfram að vera sjálfstæð og fullvalda þjóð eða hvort við eigum að ganga í Evrópusambandið.

Athugasemdir

[Einarr Þjóðholli (IP-tala skráð) 28.2.2008 kl. 03:28]

Fyndið hvernig ykkur tókst, á stuttum tíma, að "ignora" annars vegar það sem Jón Ásgeir sagði um gjaldeyrismálin, og hins vegar það að meirihluti íslensku þjóðarinnar er hlynntur ESB aðild. Trúverðugleiki "Heimssýnar" er fljótur að fara í klósettið þegar maður sér um hverskyns einstefnu áróðursapparat er að ræða.

[Hjörtur J. Guðmundsson, 28.2.2008 kl. 12:19]

Einarr:
Það kann að hafa farið framhjá þér að að Heimssýn er stjórnmálahreyfing sem aðhyllist ákveðna afstöðu í Evrópumálum. Þú virðist halda að um sé að ræða fjölmiðil eða eitthvað slíkt. Venjulega hafa slíkar hreyfingar eina stefnu og þykir ekki til eftirbreytni að hafa margar slíkar.

Hvað Jón Ásgeir Jóhannesson áhrærir þá færði hann engin sérstök rök fyrir ummælum sínum um að Ísland þyrfti að ganga í Evrópusambandið og reyndar féllu þau ummæli talsvert í skuggann af því sem hann hafði að segja um stöðu íslenzku bankanna og dró síðan verulega í land nokkru síðar. Þess utan hafa ýmsir jafnvel viljað meina að í þessum efnum hafi hugsanlega ráðið meiru vilji til að ergja Björn Bjarnason og Davíð Oddsson en raunveruleg afstaða.

En hvort sem það er raunin eða ekki þá man ég ekki til þess að Evrópusamtökin hafi fjallað mikið um ummæli Björgólfs Thors Björgólfssonar frá því í desember um að Evrópusambandsaðild væri ekki æskileg og þó færði hann ágætis rök fyrir þeirri skoðun sinni. Ég man heldur ekki eftir því að sömu samtök hafi fjallað um það þegar Geir H. Haarde hefur ítrekað sagt Evrópusambandsaðild ekki á dagskrá og fært rök fyrir því hvers vegna ekki.

Og skoðanakönnun Fréttablaðsins sem sýndi 55% stuðning við aðildarviðræður við Evrópusambandið (ath. ekki aðild sem slíka) og 45% á móti sé aðeins miðað við þá sem tóku afstöðu með eða á móti. Vissulega breyting ef aðeins eru skoðaðar kannanir Fréttablaðsins en ekkert nýtt ef skoðaðar eru kannanir Gallup.

Þess utan myndi ég hafa meiri áhyggjur af eigin trúverðugleika ef ég væri þú og kannski ertu vel meðvitaður um það í ljósi þess að þú kýst að skrifa ekki undir fullu nafni. 

[Einarr Þjóðholli (IP-tala skráð) 28.2.2008 kl. 19:37]

Ok þú sem sagt viðurkennir að hér er um áróðursaustur að ræða, en ekki málefnalega umfjöllun. Mér finnst samt sem áður hálf lélegt að tína einungis til það sem þjónar málstaðnum, þó svo að "Heimssýn" "aðhyllist ákveðna afstöðu." Því, eins og fyrr sagði, bitnar slíkt á trúverðugleika.

Einarr Einarsson m.e.h

[Hjörtur J. Guðmundsson, 28.2.2008 kl. 22:32]

Hér er á ferðinni málefnaleg umfjöllun um Evrópumál út frá ákveðnum pólitískum sjónarhóli, rétt eins og hjá öðrum stjórnmálasamtökum. M.ö.o. er hér haldið fram ákveðnum pólitískum sjónarmiðum og rök færð fyrir þeim. Þetta er ekki hlutlaus fjölmiðill eða akademísk stofnun eins og þú virðist halda.

[Einarr Einarsson (IP-tala skráð) 29.2.2008 kl. 01:59]

Ok, flott. Ég vildi bara fá formlega staðfestingu á því að hér er um áróðurspésa að ræða.

[Ólafur (IP-tala skráð) 3.3.2008 kl. 10:24]

Góðan daginn!

Viljirðu njóta lífsins betur - bendi ég þér á www.netsaga.is

mbk.

Chillingoli

es. Vinsamlegast gerðu heiminum þann greiða að áframsenda skilaboðin!