ESB-atvinnuleysi í hæstu hæðum

Á Íslandi er um fimm prósent atvinnuleysi. Það er helmingurinn af því atvinnuleysi sem jafnt og stöðugt er að finna í Evrópusambandinu.

Evran festir atvinnuleysið í sessi og þau lönd sem búa við þýska fastgengisstefnu geta sér enga björg veitt lendi þau í efnahagsvanda.

Evran og viðvarandi atvinnuleysi haldast í hendur. Hvers vegna ættum við að flytja slíka ósvinnu inn í landið?

Mesta atvinnuleysi frá upphafi mælinga

Á Ísland að verja evrópskan bílaiðnað?

Evrópusambandið gerir fríverslunarsamninga fyrir hönd allra aðildarríkja sinna. Ekkert í ríki í Evrópusambandinu hefur leyfi til að vera með sérstaka fríverslunarsamninga við ríki utan sambandsins.

 Núna er rætt um í Brussel að gera fríverslunarsamning við Japan. Helst er talið stranda á hagsmunum evrópska bílaiðnaðarins sem vill ekki að ódýrari bílar frá Japan grafi undan stöðu þeirra á heimamarkaði.

Ísland hefur nákvæmlega enga hagsmuni af því að bílaiðnaðurinn í Evrópu sé sterkari eða veikari en sá japanski.

Okkar hagsmunir eru að fá ódýra bíla. Og það getum við tryggt með því að standa utan Evrópusambandsins.

Rætt um fríverslunarviðræður við Japan

Svona hrynja stórveldi

Ekkert stórveldi í sögunni hefur hrunið af einni ástæðu. Stórveldi styðjast við margar undirstöður. Af því leiðir hrynja stórveldi ekki af því að ein eða tvær stoðir gefa sig - meira þarf til.

Yfirbygging Evrópusambandsins er þung; lýðræðishallinn yfirþyrmandi og peningapólitíkin dómgreindarlaus.

Af 27 þjóðum Evrópusambandsins eru tíu ekki með evru. Þessi tíu ríki munu á næstu árum finna leiðir til að forða sér frá yfirvofandi hruni. Sá flótti, þótt hægur verði, mun flýta hruninu.

Enginn af frammámönnum Evrópusambandsins mun nokkru sinni tala um hrunið. Það væri eins og að nefna snöru í hengds manns húsi.

Bretar kjósi um veruna í ESB

Steingrímur J. talar fyrir ESB-aðild

Formaður VG, Steingrímur J. Sigfússon, talar eins og samfylkingarmaður sem er leiður vegna þess hversu illa gengur að mjaka Íslandi inn í Evrópusambandið.

Steingrímur J. verður ,,persónulega fyrir vonbrigðum" með það hve aðlögunarferlið gengur hægt fyrir sig.

Í stefnuskrá VG stendur eftirfarandi

 Hugsanlegur ávinningur af aðild Íslands að Evrópusambandinu réttlætir ekki frekara framsal á ákvörðunarrétti um málefni íslensku þjóðarinnar og er aðild að Evrópusambandinu því hafnað. Hagsmunir fjármagns og heimsfyrirtækja eru í alltof ríkum mæli drifkraftar Evrópusamrunans, miðstýring, skrifræði og skortur á lýðræði einkennir stofnanir þess um of.

Er ekki rétt af Steingrími J. að skipta um flokk núna þegar það liggur fyrir að hann er orðinn talsmaður þess að Ísland verði tekið upp í Evrópusambandið?

„Nú ræður hræðslan við Evrópu ríkjum“

Grikkland í skuldfeni ESB um ókomna tíð

Grikkland getur ekki og mun ekki borga skuldir sínar. Síðustu áætlanir gerðu ráð fyrir að eftir tíu ár myndi Grikkland skulda 170 prósent af landsframleiðslunni. Almennt er viðurkennt að skuldir verulega umfram 100 prósent af landsframleiðslu séu ósjálfbærar. 

Grikkir eru enn inn í evru-samstarfinu af tveim ástæðum. Í fyrsta lagi þora þeir ekki að standa á eigin fótum og telja betra að vera á framfærslu Evrópusambandsins um ófyrirsjáanlega framtíð. Í öðru lagi vegna þess að Evrópusambandið þorir ekki að láta Grikkland róa.

Grikkir gætu bjargað sér með því að fá samkeppnishæfan gjaldmiðil og það gætti þýtt endalok evru-samstarfsins. Ef Portúgalar, Spánverjar og Ítalir myndu sjá Grikkland blómstra hálft eða eitt ár eftir útgöngu úr evru-samstarfinu væri sjálfhætt fyrir þessar þjóðir í téðu samstarfi.

Tilraunir Evrópusambandsins til að halda Grikklandi í spennitreyju evrunnar um ókomna tíð eru dæmdar til að mistakast.

Funda í dag um björgun Grikklands

ESB-sinnar í felulitum í VG trekkja ekki

Aðeins 639 flokksmenn VG í Reykjavík nenntu að mæta á kjörstað til að velja frambjóðendur vegna næstu þingkosninga. Skráðir flokksmenn eru 2600. Þessi stórflótti kjósendahópsins sem hingað til hefur verði talinn sá tryggasti í íslenskum stjórnmálum verður aðeins skýrður á einn veg.

Frambjóðendur VG í Reykjavík tóku höndum saman um að þykjast ekki vita um andstöðu almennra flokksmanna við ESB-leiðangur ríkisstjórnarinnar. Í augum flokksmanna eru allir frambjóðendur VG í Reykjavík ESB-sinnar í felulitum.

ESB-sinnar í felulitum eru hálfu aumkunarverðari en þeir sem gangast við afstöðu sinni. 

Katrín efst en Birni Val hafnað

Frásögnin af falli evru tekur á sig mynd

Þýsk stjórnvöld búa sig undir uppgjör á evru-svæðinu. Í Berlín er tilbúin áætlun og varaáætlun vegna uppgjörsins. Aðaláætlunin byggir líklegast á uppstokkun evru-samstarfs þar sem ríki eins og Grikkland, Portúgal og e.t.v. Spánn fara úr samstarfinu. Varaáætlun er án efa í tveim til þrem útgáfum og ein gerir ráð fyrir upptöku þýska marksins.

Í stórpólitík Evrópusambandsins eru tímasetningar höfuðatriði, sem og leiktjöldin. Þýskaland getur hvorki sagt að evru-tilraunin sé misheppnuð né rekið óreiðuríki úr evru-samstarfinu.

Til að undirbyggja uppgjörið verður að búa til trúverðuga frásögn. Einn liður í þeirri frásögn er að Evrópusambandið virki ekki lengur sem vettvangur til að taka sameiginlegar ákvarðanir. Með því að fresta afgreiðslu fjárlaga ESB fram yfir áramót er frásagnarminnið um ónýti ESB undirstrikað.

Önnur frásagnarminni, eins og varanleg vangeta Suður-Evrópu að ná tökum á efnahagsmálum sínum, eru óðum að breytast í fastar stærðir sem hægt er að gera pólitík úr.

Þjóðverjar gera upp við sig eftir næstu kosningar, þær verða eftir ár, til hvaða áætlunar um endalok evru-samstarfsins verður gripið.

Leiðtogar ESB náðu ekki saman

ESB-andstaðan á Íslandi verður frétt í Kína

Einn útbreiddasti fjölmiðill í heimi, China Daily, segir frá vaxandi andstöðu almennings á Íslandi við inngöngu í Evrópusambandið.

Össur Skarphéðinsson utaríkisráðherra er að semja við Kína um fríverslun. Undirbúningur að samningnum hófst árið 2006 en heldur dró úr samningafundum eftir að Ísland, þ.e. Össur, sótti um aðild að Evrópusambandinu sumarið 2009.

En núna er skriður kominn á samningana og Össur segir að fríverslunarsamningur við Kína verði tilbúinn á næsta ári.

Talsmaður Evrópusambandsins segir að aðildarríki ESB geti ekki ein og sér haft fríverslunarsamning við önnur ríki. Í frétt Mbl.is segir

„Evrópusambandið hefur með viðskiptatengsl að gera [fyrir ríki sambandsins], þar með talið gerð fríverslunarsamninga, við önnur ríki. Almennt séð, sem aðildarríki Evrópusambandsins, yrði Ísland að segja upp öllum fríverslunarsamningum sínum og fríverslunarsamningar Íslands innihalda ákvæði um uppsögn,“ sagði Ulrike Pisiotis hjá skrifstofu stækkunarmála í framkvæmdastjórn Evrópusambandsins í svari við fyrirspurn frá mbl.is

Það er sem sagt ekki hægt að vera aðildarríki ESB og hafa sjálfstæðan fríverslunarsamning við önnur ríki. En Össur ætlar að gera hvorttveggja. 

Kannski að fréttir um vaxandi andstöðu við ESB-umsóknina geri Kínverja rólegri. Þeim finnst líklega ekkert gaman af því að vera hafðir að fíflum af síkátum utanríkisráðherra smáríkis.  

Engar undanþágur og algert áhrifaleysi

Áhrif Íslands í Evrópusambandinu myndu mælast frá 0,8 prósent í Evrópuþinginu niður í 0,06 í leiðtogaráðinu - þar sem allar helstu ákvarðanir eru teknar. Núna hefur verið staðfest í 27-sinn að við fáum ekki undanþágu frá meginreglum ESB um algert áhrifaleysi í öllum þeim málum sem falla undir sambandið.

Kjánaprikin sem kalla sig ekki lengur ESB-sinna heldur ,,viðræðusinna" ættu nú að finna sér annað áhugamál sem ekki er jafn langsótt og að Ísland verði aðili að Evrópusambandinu. Hvað með að Ísland verði hluti af Eyjaálfu?

Umsóknarsirkus Össurar og Samfylkingar er löngu hættur að vera áhugavert viðfangsefni. Okkur andstæðingum finnst eins og við séum að sparka í lík þegar við andæfum viðræðusinnum.

Engar varanlegar undanþágur í boði

Líkvaka í Strassborg

ESB-umsókn Íslands er dauð. Í samfélaginu talar enginn fyrir umsókninni og meirihluti þjóðarinnar vill afturkalla hana.  í Evrópu er eymd og volæði um fyrirsjáanlega framtíð og enga björg þar að fá.

Til að bjarga Evrópusambandinu verður að kljúfa það í evru-svæði með miðstýringu og engu fullveldi aðildarþjóða annars vegar og hins vegar jaðarríki sem munu líta á ESB sem fríverslunarsvæði í framtíðinni.

ESB-flokkur Íslands, Samfylkingin, mælist með 20 prósent fylgi og flokkurinn sem sveik stórt í málinu, VG, er tíu prósent flokkur.

Líkvaka þingmannanefnda í Strassborg yfir ESB-umsókn Íslands er ábyggilega skemmtilegasti fundur.

Funda um ESB-umsóknina í Strassburg