Færeyingar verja sig gegn yfirgangi ESB

Færeysk stjórnvöld hafa sent formlega kæru til Alþjóðaviðskiptastofnunarinnar (WTO) vegna viðskiptaþvingana Evrópusambandsins í garð Færeyinga vegna síldveiða þeirra. Aðgerðir ESB tóku gildi í ágúst í sumar en þær fela í sér innflutningabann á síld og makríl frá Færeyjum til ríkja sambandsins og að hafnbann á skip sem flytja slíkar vörur.

Þetta kemur fram í viðhengdri frétt mbl.is. Þar segir einnig: 

Færeyskir ráðamenn halda því fram að viðskiptaþvinganir ESB brjóti í báða við sáttmála WTO. Þær byggi ekki á verndarsjónarmiðum heldur virðist tilgangurinn vera að standa vörð um viðskiptalega hagsmuni sambandsins. Ennfremur er minnt á að viðræður standi yfir um skiptingu norsk-íslenska síldarstofnsins.

Haft er eftir Kaj Leo Johannesen, lögmanni Færeyja, að ESB neyti með viðskiptaþvingununum yfirburða sinna gagnvart Færeyjum sem séu efnahagslega mjög háðar fiskveiðum.

Færeyingar kæra ESB

Karl Þorsteins mælir með krónunni

Víða er að finna meðmæli með sjálfstæðum gjaldmiðli fyrir Íslendinga og þá jafnframt rök gegn því að Íslendingar gangi í ESB og taki upp evru.

Í grein í Morgunblaðinu í dag segir Karl Þorsteins, stjórnarformaður Quantum, maður með mikla reynslu af fjármálakerfi og skákfrömuður, að sem betur fer líði að jafnaði 50 til 100 ár á milli alvarlegra fjármálakreppna í heiminum. Þá dragist tekjur saman, eignaverð lækki „og ef myntin er sjálfstæð, þá veikist gengi gjaldmiðilsins verulega. Öll einkennin þekkjum við á Íslandi frá árinu 2008.“

En það myndast líka botn og síðan viðspyrna því með gengislækkun gjaldmiðilsins bætast samkeppnisskilyrði útflutningsgreina og næstum óháð aðgerðum stjórnvalda vex framleiðslan aftur og hagur almennings batnar.

Þetta segir Karl vel þekkt í fjármálafræðunum.

Þrátt fyrir þetta - og þrátt fyrir þá nauðung sem jaðarþjóðir evrusvæðisins eru í einmitt vegna evrunnar - virðast þeir enn til hér á landi sem telja að það myndi lækna öll mein að taka upp evruna.

Hvað er til ráða svo hægt verði að upplýsa fólkið?

Von á upplýstri umræðu um ESB-málin

Nú er von á því að hægt verði að efna til betur upplýstrar umræðu um ESB-málin en verið hefur að undanförnu. Gunnar Bragi Sveinsson utanríkisráðherra hefur sett í gang vinnu við að meta stöðu viðræðnanna í tíð fyrrverandi ríkisstjórnar. Jafnframt verður gerð úttekt á þeirri óþægilegu stöðu sem ESB- og evrusamstarfið er komið í.

Utanríkisráðuneytið hefur fengið Hagfræðistofnun Háskóla Íslands til að skrifa skýrslu um þessi atriði.

Það er því von til þess að hægt verði að ræða betur og ítarlegar um þá þrautagöngu sem samstarf ESB- og evruríkjanna hefur verið að undanförnu. Það mun væntanlega auka skilning landsmanna á því að Íslendingar eiga ekkert erindi í þetta samband.

Vinna hafin við ESB-skýrslu

Össur og vindmyllubardaginn

365 miðlar birta viðtal við Össur Skarphéðinsson í þríriti þar sem hann rekur nýlega ráðherrareynslu sína. Þar er því lýst hvernig barátta Össurar við að koma Íslandi í ESB hafi verið eins og bardagi Don Kíkóta við vindmyllurnar. Sem sagt gagnslaus barátta.

Með orðum Heimis Más Péturssonar á visir.is:

Á einu ári drífur auðvitað margt á daga utanríkisráðherra sem berst á köflum eins og Don Kíkóti við vindmyllur í tilraunum sínum til að ljúka viðræðum við Evrópusambandið. Það er af mörgu að taka í utanríkismálum eins og málsvörn þjóðarinnar í Icesave-málinu en það skelfur líka flest í pólitíska landslaginu innanlands.

Fréttablaðið birtir einnig úr frásögn Össuar, auk þess sem hún er birt í þættinum Pólitíkin hjá 365-miðlum.

Forystumaður samtaka hvetur til lögbrota

Í viðtali í hádegisfréttum Bylgjunnar benti Jón Bjarnason fyrrverandi landbúnaðarráðherra á þá furðulegu staðreynd að forystumaður samtaka verslunar hér á landi hefur hvatt félagsmenn sína til að brjóta lög með því að flytja inn hrátt kjöt frá Evrópu og Bandaríkjunum.

Það er mjög alvarlegt þegar hvatt er til þess að lög verði brotin. Lög sem kveða á um bann við innflutningi á hráu kjöti eru sett með neytendavernd í huga. Þau eru sett til að koma í veg fyrir útbreiðslu sjúkdóma. Álíka lög um matvæli eru til í öðrum löndum, m.a. í Bandaríkjunum, þar sem mikillar varkárni er gætt til að koma í veg fyrir sjúkdóma við ræktun ávaxta.

Verslunarmenn vilja skiljanlega hafa fleiri krónur í tekjuafgang í sínum rekstri. Í rekstrinum þarf að fara eftir ýmsum lögum og reglum. Það að forystumaður í samtökum verslunarmanna hvetur til þess að félagsmenn í samtökum hans brjóti lög til að auka tekjuafganginn leiðir bara til upplausnar.

Almenningur hér á landi sættir sig hvorki við lögleysu né ábyrgðarleysi í meðferð matvæla.

Ölgerðin ólögleg í ESB!

Svona lævísum ESB-áróðri verður náttúrulega að mótmæla harðlega. Að halda ESB á lofti með þessum hætti er vitaskuld líka kolólöglegt.

Eitt af óskabörnum þjóðarinnar til hundrað ára er þarna komið út á mjög vafasamar og blautkenndar brautir. Egill Skallagrímsson hefði aldrei sætt sig við þetta, enda fór hann í einu og öllu eftir gildandi reglugerðum um meðferð áfengra drykkja, og auglýsingar á þeim, og danglaði bara í menn þegar brýna nauðsyn bar til - og drap bara þá sem voru annaðhvort lítilmótlegir eða leiðinlegir.

Svona lúmskheit Ölgerðarinnar hefðu fyllt Egil sterka hryggð. Hann hefði ekki falið markmiðið svona heldur komið hreint fram, rutt andstæðingunum miskunnarlaust úr vegi, hertekið góss þeirra og stöðu og ríkt eftir það í friði við Óðinn og menn!

Ölgerðin á leið að ESB