43 milljónir Evrópubúa fá ekki nægan mat

Efnahagskreppan í Evrópu hefur margvíslegar afleiðingar. Nú fá 43 milljónir Evrópubúa ekki nægan mat og staða milljóna manna hefur breyst úr því að hafa það gott í að vera fátækir. Börn í Evrópu hafa það nú verra en foreldrarnir höfðu á sínum tíma.

Þetta kemur fram á pressan.is.

Þar segir enn fremur: 

Afleiðingar kreppunnar munu koma til með að vera langvarandi fyrir mikinn fjölda fólks og félagsleg áhrif verða mikil og geta valdið miklum samfélagslegum óróleika í framtíðinni. Þetta þýðir að góður jarðvegur verður fyrir uppgang afla sem eru fjandsamleg í garð útlendinga og aðhyllast ýmsar öfgaskoðanir.

Þetta er meðal þess sem kemur fram í nýrri skýrslu Rauða krossins um ástandið í Evrópu að sögn Sænska ríkisútvarpsins. Skýrslan er byggð á reynslu Rauða krossins og Rauða hálfmánans í 42 Evrópulöndum. Í 22 þeirra hefur fjöldi þeirra sem treystir á matargjafir Rauða krossins aukist um 75 prósent frá 2009 til 2012. 3,5 milljónir manna treysta á matargjafir Rauða krossins á degi hverjum. 43 milljónir manna fá ekki nægan mat og í fyrsta sinn á síðari tímum búa börn í Evrópu við verri lífsskilyrði en foreldrar þeirra.

Miðað við svipaða skýrslu Rauða krossins frá 2009 hefur ástandið versnað umtalsvert. Þeir sem voru þá illa settir eru verr settir í dag og stór hópur fólks sem tilheyrði hinni vinnandi millistétt hefur dregist inn í kreppuna og tilheyrir hópum fátækra og illra settra núna. 120 milljónir Evrópubúa eru í hættu á að dragast niður í fátækt samkvæmt tölum frá Eurostat, sem er einhverskonar Hagstofa ESB

Árni Páll skriftar fyrir ESB-mönnum í Strassborg

Hvernig væri að Árni Páll skýrði fyrir Íslendingum hvers vegna hann hélt því fram fyrir þingkosningar 2009 að árið 2011 yrði lagt fyrir þjóðina að greiða atkvæði um aðild að ESB? Hvers vegna var ESB-aðildarviðræðunum ekki næstum því lokið fyrir kosningar í apríl 2013?

Þetta og fleira kemur fram á Evrópuvaktinni. Þjóðin hafnaði sneypulegri ESB-aðildarför Samfylkingarinnar í síðustu kosningum. Reyndar hafði Samfylkingin gefist upp í ársbyrjun á því ferli.

Nánar segir svo á Evrópuvaktinni með orðum Björns Bjarnasonar:

Á vefsíðunni visir.is má lesa mánudaginn 7. október:

ESB

Árni Páll Árnason, efnahags- og viðskiptaráðherra, og Olli Rehn, efnahagsmálastjóri ESB, á blaðamannafundi í Brussel 7. febrúar 2011.

„Árni Páll Árnason, formaður Samfylkingarinnar, er á leið til Strassborgar í Frakklandi þar sem hann mun eiga fundi með ráðamönnum Evrópusambandsins í boði þingflokks jafnaðarmanna á Evrópuþinginu. Í þingflokki jafnaðarmanna á Evrópuþinginu sitja 194 þingmenn frá öllum 28 aðildarríkjum ESB.

Árni Páll mun jafnframt hitta leiðandi þingmenn á Evrópuþinginu úr öllum flokkum. Hann mun funda sérstaklega með Hannes Swoboda, formanni þingflokks jafnaðarmanna, og Christian Dan Preda, sem leitt hefur vinnu við aðildarumsókn Íslands.

Þá mun hann eiga sérstakan fund með Stefan Füle, stækkunarstjóra ESB og Maria Damanaki, sem fer með fiskveiðimál í framkvæmdastjórninni. Annað kvöld ávarpar formaður Samfylkingarinnar þingflokk jafnaðarmanna á sérstökum þingflokksfundi og fjallar um Evrópusamvinnuna frá sjónarhóli Samfylkingarinnar og stöðu aðildarumsóknar Íslands að ESB.“

Það er þakkarvert að Árni Páll Árnason fái tækifæri til að skrifta fyrir flokksbræðrum sínum og öðrum á ESB-þinginu og í framkvæmdastjórn ESB og lýsa hvernig haldið var á ESB-aðildarumsókn Íslands af flokksbróður hans Össuri Skarphéðinssyni. Hlýtur hann örugglega aflausn.

Þá er ekki að efa að Árni Páll segi ESB-mönnum frá „hamförunum“ sem gengu yfir flokk hans í kosningunum 27. apríl 2013 þegar hann galt mesta afhroð í tæplega 70 ára kosningasögu íslenska lýðveldisins. Hvaða skýringu skyldi hann gefa á þeim? Að hann hefði tekið við af Jóhönnu?

Hvernig væri að Árni Páll skýrði síðan fyrir Íslendingum hvers vegna hann hélt því fram fyrir þingkosningar 2009 að árið 2011 yrði lagt fyrir þjóðina að greiða atkvæði um aðild að ESB? Hvers vegna gerðist það ekki? Hvers vegna var ESB-aðildarviðræðunum ekki næstum því lokið fyrir kosningar í apríl 2013?

Viti Árni Páll ekki svörin við spurningunum um stöðuna gagnvart ESB getur hann ef til vill leitað þeirra í Strassborg og flutt boðskapinn til Íslands.

Og enn eykst atvinnuleysið í ESB

Atvinnuleysið eykst enn í ESB. Á evrusvæðinu mælist það 12% og 10,9% í ESB í heild. Mest atvinnuleysi mældist í Grikklandi (27,9% í júní) og Spáni (26,2%), en minnst í Austurríki (4,9%), Þýskalandi (5,2%), og Lúxemborg (5,8%).

Visir.is greinir svo frá:  

Atvinnuleysi mældist 10,9% í ríkjum Evrópusambandsins í ágúst síðastliðnum að því er fram kemur í nýjum tölum frá Eurostat. Þar segir jafnframt að atvinnuleysi á evrusvæðinu hafi mælst 12%. Hlutfallið er óbreytt frá júlí, en nokkur aukning frá ágústmánuði í fyrra þegar hlutföllin voru 10,6% í ESB og 11,5% á evrusvæðinu.

Alls voru 26,6 milljónir manna án atvinnu í ríkjum ESB í ágúst og hafði fjölgað um 882 þúsund frá ágúst 2012.

Minnst atvinnuleysi mældist í Austurríki (4,9%), Þýskalandi (5,2%), og Lúxemborg (5,8%), en mest í Grikklandi (27,9% í júní) og Spáni (26,2%).

Mesta fækkunin í hópi atvinnulausra var í Lettlandi þar sem hlutfallið fór úr 15,6% niður í 11,4% milli annars ársfjórðungs í fyrra fram til ársins í ár.

Ástandið er mun verra í hópi ungs fólks, en alls eru 23,3% þegna ESB-ríkja undir 25 ára án atvinnu. Ástandið er alvarlegast í Grikklandi þar sem 61,5% fólks undir 25 ára var án atvinnu í júní síðastliðnum.

Til samanburðar var atvinnuleysi á Íslandi 5,5% og hafði lækkað um 0,4 prósentustig milli ára, og í Bandaríkjunum voru 7,3% atvinnulaus, sem er talsverð lækkun frá ágúst í fyrra þegar atvinnuleysi mældist 8,1%.