Umdeild vaxtaákvörðun Seðlabanka Evrópu

Vaxtalækkun Seðlabanka Evrópu nýverið er orðin afar umdeild. Þjóðverjar óttast nú að hún muni grafa undan sparnaði þeirra og segja að hún muni ekki hjálpa Portúgölum, Ítölum og Spánverjum. Þeir þurfi 30% gengisfellingu en ekki vaxtalækkun.

Evrópumenn óttast nú japönsku veikina. Þar hefur verð lækkað að jafnaði frá 1999 og mikill hægagangur verið í atvinnulífinu, þótt eitthvað virðist vera að rofa til nú. Þótt ýmsir hér á landi telji það kost verðbólga á evrusvæðinu sé ekki meiri en 0,7 prósent þá eru íbúar á svæðinu ekki sama sinnis - og alls ekki hagstjórnendur og ýmsir fræðingar. Hin litla verðbólga endurspeglar nefnilega að hagkerfið er að nálgast frostmark. Það er of lítil eftirspurn að jafnaði og framleiðsla á ári stendur í stað. Vaxtalækkun Seðlabanka Evrópu endurspeglar hræðsluna við verðhjöðnun - eins og kemur fram í nýlegri grein í Financial Times og víðar.

Hans-Werner Sinn forseti viðurkenndrar efnahagsrannsóknastofnunar (Institute for Economic Research) segir þó að verðhjöðnun á hluta evrusvæðisins kalli á önnur viðbrögð en ef verðhjöðnunin væri á öllu svæðinu. Til að bæta samkeppnisstöðu Grikklands, Spánar og Portúgals þyrfti að koma til raungengislækkun sem næmi 30 prósentum til þess að leiðrétta þá skekkju sem útlánabólan og meðfylgjandi verðbólga í löndunum skapaði fyrir bankakreppuna.

Hans-Werner segir að vaxtabreyting Seðlabanka Evrópu breyti litlu, en það sem sé verra sé að bankinn sé að kaupa upp skuldabréf jaðarsvæðana í vanda og sé því í reynd að flytja sparnað frá norðursvæðum evrunnar til suðurs. Auk þess sé Seðlabanki Evrópu að taka gild að veði alls konar ruslbréf (ástarbréf) frá illa stöddum bönkum á suðurjaðrinum. Þessar aðgerðir eru taldar hindra bætta samkeppnisstöðu jaðarlandanna í suðri - og viðhalda samkeppnisstöðu Þýskalands og gífurlegum viðskiptaafgangi landsins.

Fleiri fjölmiðlar fjalla um þetta, meðal annars Telegraph  - sjá hér.

 

Við erum betri en Króatía og ætlum að sigra í kvöld!

VIÐBÓT: Svo það fari ekkert á milli mála þá er það fótboltinn sem gildir í kvöld - og þar ætlum við að vinna!

Króatía gerðist aðili að ESB í sumar. Þrátt fyrir fyrirheit um efnahagsuppgang í aðlögunarferlinu að sambandinu hefur ástandið í landinu verið heldur dapurlegt. Tekjur á mann nema einungis þriðjungi af því sem við Íslendingar upplifum samkvæmt Alþjóðabankanum. Atvinnuleysi er um 20% en um helmingur ungs fólks er án atvinnu. Þess vegna er knattspyrnulandsliðið stolt Króata.

Ein af skýringunum á bágu efnahagsástandi í Króatíu er sú að 60% af útflutningi landsins fer til ESB-landanna sem eru enn að glíma við kreppu. Nýjustu tölur sýna að hagvöxtur er nánast enginn að meðaltali í ESB-löndunum, eða 0,1% síðasta ársfjórðunginn.

Ferðamannaiðnaður er það sem helst drífur efnahag Króatíu áfram, en landið skartar fallegum og vinsælum baðstrandarhéruðum. En útlitið er ekki bjart. Lánshæfismatsfyrirtækið Standard & Poor's segir líkindi á að Króatía verði lækkað í einkunn sem lántakandi á alþjóðlegum mörkuðum. Það er gert m.a. vegna skipulgsvandkvæða í starfsemi hins opinbera og mikilla skulda bæði einkaaðila og opinberra.

Gert er ráð fyrir því að landsframleiðsla dragist saman um eitt prósent í Króatíu í ár.

Efnahagslega höfum við Íslendingar vinninginn gagnvart Króötum.

En það skiptir engu máli í kvöld. Króatar hafa lengi átt frábæra knattspyrnumenn og landslið þeirra hefur lengi verið í fremstu röð í Evrópu - jafnvel þótt við munum ekki nöfnin á öllum þeirra mönnum.

En Gylfi, Kolbeinn, Aron, Eiður og allir hinir strákarnir okkar eru líka frábærir knattspyrnumenn.

Það getur allt gerst í kvöld.

ÁFRAM ÍSLAND!

VIÐBÓT: Visir.is segir frá því að einhverjir ESB-sinnar hafi farið af hjörunum út af ofangreindum pistli sem er ósköp meinlaus samantekt á stöðu efnahagsmála í Króatíu um leið og greint er frá því að Króatar séu mikil íþróttaþjóð og landslið þeirra í knattspyrnu meðal þeirra fremstu í heimi. Jafnframt er greint frá því að ferðamannaiðnaður sé mikill og í uppgangi í landinu, enda er það fagurt heim að sækja.

Þeirri útleggingu hjá Visir.is er algjörlega vísað á bug að litið sé á leikinn sem eitthvað annað en knattspyrnuleik landsliða tveggja þjóða. Eins og Jón Bjarnason varaformaður Heimssýnar segir í samtali við Visi.is þá vonum við öll að íslenska landsliðið, sem hefur staðið sig frábærlega, vinni þann leik um leið og við viðurkennum að Króatar hafa á að skipa feiknagóðu liði. Þetta verður því spennandi viðureign - og við tökum öll undir hvatninguna: ÁFRAM ÍSLAND!

Myndband með sýn unga fólksins í Evrópu

Unga fólkið í Evrópu er ekki bjartsýnt á framtíðarmöguleika sína. Þeim finnst yfirvöld í ESB löndunum hafa svikið sig og að atvinnumöguleikar þeirra muni verða verri en foreldranna. Sérfræðingar eru á sama máli.

Meðfylgjandi myndband sýnir frásögn unga fólksins frá ráðstefnu Evrópuráðsins og framkvæmdastjórnar ESB í Búdapest nýverið. Unga fólkið og sérfræðingar reyna að spá í hvað muni gerast til ársins 2020 og framtíðarsýnin er ekkert sérlega uppörvandi. Tengslin við vinnumarkaðinn vantar.

Sjá hér: No jobs for Europe's brightest graduates. (Engin vinna fyrir duglegstu útskriftarnemendurna í Evrópu).

Stórfrétt: Það mælist agnarlítill hagvöxtur á evrusvæðinu!

ESB- og evrusinnar um víða veröld varpa nú öndinni léttar - um stund. Nýjar tölur um hagvöxt á þriðja ársfjórðungi þessa árs benda til þess að hagvöxtur hafi mælst að meðaltali á evrusvæðinu - alls 0,1 prósent. Þetta merkir að hagvöxturinn hefur minnkað um 0,2 prósentur frá öðrum ársfjórðungi.

Þetta merkir jafnframt að hagvöxtur er réttu megin við núllið í fáeinum löndum, svo sem í Þýskalandi, en hins vegar er nokkur samdráttur í Frakkalndi og á Ítalíu.

Nýjar upplýsingar um að verðbólgan sé að engu orðin að meðaltali og því verðlækkun í sumum geirum bendir til þess að erfitt muni reynast að hífa evrusvæðið upp úr þeim efnahagslega öldudal sem það hefur verið í undanfarin ár.

Viðskiptablaðið fjallar um þetta.

Bretar eru hundóánægðir með ESB

Skoðanakannanir sýna að Bretar eru mjög óánægðir með ESB. Þeir sætta sig ekki við núverandi ástand og vilja að völd verði flutt frá stofnunum ESB heim í héruð. Þróunin er hins vegar í hina áttina. ESB verður æ miðstýrðara.

Þetta er þversögnin varðandi ESB: Íbúar Evrópu vilja ekki aukið vald til Brussel og Frankfurt. ESB er orðið of fjarlægt. Hins vegar eru æ fleiri að verða þeirrar skoðunar að til að bjarga evrunni og þar með jafnvel ESB þá verður miðstýring að aukast og sambandið að færast í áttina til eins stórs ríkis.

Myndu styðja breytta aðild að ESB

Ólga í Þýskalandi vegna vaxtaákvörðunar Seðlabanka Evrópu

Það eru ekki allir kátir með síðustu ákvörðun Seðlabanka Evrópu. Þjóðverjar eru nú alveg sjóðbullandi vitlausir yfir því að hún muni stuðla að bólumyndun í Þýskalandi.

Seðlabanki Evrópu lækkaði stýrivexti (vextir á lánum seðlabankans til annarra banka) í fyrri viku um 0,25 prósentur og verða þá vextirnir í 0,25 prósentum. Þetta var önnur vaxtalækkun bankans í ár og Mario Draghi seðlabankastjóri í Evrópu gerir ráð fyrir að vextirnir munu haldast lágir á næstunni og jafnvel lækka enn frekar. Fyrir vikið féll evran á gjaldeyrismörkuðum.

Þetta segir okkur aðeins það að evrulöndin eru enn að basla í efnahagssamdrættinum og atvinnuleysi. Verðbólgan er líka allt of lítil. Mæld verðbólga er aðeins 0,7 prósent, sem segir okkur að undirliggjandi verðbólga - sú sem endurspeglar í raun verð á öllum keyptum vörum og þjónustu - er líklega undir 0% (en þessum tölum má fletta upp). Í öllu falli er efnahagslífið í Evrópu almennt í frosti.

Grikkir, Spánverjar og Ítalir fögnuðu þessari ákvörðun.

Þjóðverjar eru hins vegar verulega óhressir og einn af forsvarsmönnum Kristilegra demókrata, Michael Meister, segir að nú sé veruleg hætta á eignabólumyndun í Þýskalandi. Vextir séu það lágir að eftir spurn eftir eignum aukist og verð hækki. Þetta sé verulega hættulegt fyrir þýskan almenning því bólan gæti sprungið fyrr en varði.

En  - bíðið nú við? Var ekki einhver sem sagði að þetta væri sameiginlegt gjaldmiðilssvæði þar sem það hentaði að hafa sömu peningastefnu og vaxtastefnu?

Viðbrögðin við síðustu vaxtaákvörðun Seðlabanka Evrópu sýna að evrusvæðið er ekki hagkvæmt gjaldmiðilssvæði.

Það er bannað samkvæmt reglum ESB að greina frá því hvernig stjórnendur bankans greiddu atkvæði um þessa ákvörðun. Reuters telur sig þó vita að stjóri þýska seðlabankans, Jens Weidmann, hafi verið í hópi um fjórðungs af fulltrúum í stjórninni sem greiddi atkvæði gegn þessari vaxtaákvörðun.

Auðvitað mælir meðaltalsverðbólguþróun á evrusvæðinu með þessari vaxtaákvörðun. Málið er bara að meðaltalið hentar löndunum misvel. Í þetta sinn hentar ákvörðunin Þjóðverjum afskaplega illa - og getur stuðlað að óstöðugleika í fjármálum í Þýskalandi, en ákvörðunin hentar hins vegar skuldaþjáðum löndum á suðurjaðri evrusvæðisins ákaflega vel.

Hver er svo lærdómurinn af þessu fyrir Íslendinga?

Dæmi hver fyrir sig (en til upprifjunar skal minnt á að hagsveiflan á Íslandi hefur aldrei verið í takti við meðaltalið á evrusvæðinu).  

(Ofanritað er m.a. sótt í Europaportalen.se)

Sjá einnig meðfylgjandi skýringarmynd sem sýnir glögglega ójafnvægið í ESB - en hún sýnir vöruskiptahalla og vöruskiptaafgang í löndunum árið 1999, þegar verið er að taka evruna upp sem reiknieiningu og 2005 þegar evran hefur verið notuð í nokkur ár. Myndin sýnir að vandinn vex eftir því sem á líður:

 

Loksins hefur ESB vaknað til vitundar um að Þýskaland er vandinn

Hér á þessum vef hefur margsinnis verið bent á að einn helsti vandi ESB er efnahagsstefna Þýskalands sem hefur haldið verðhækkunum í skefjum, framleiðslukostnaði niðri, en útflutningstekjum háum, miklum viðskiptaafgangi og eignasöfnun á meðan ekkert gengur hjá samkeppnisríkjunum á jaðarsvæðum ESB. Þau sýna viðskiptahalla, skuldasöfnun og atvinnuleysi.

Nú hefur framkvæmdastjórn ESB loksins, eftir að hafa fengið ábendingar um það í hálfan áratug, tekið á sig rögg og vill ræða við þýsk yfirvöld um málið.

Evrópuvaktin bendir á þessi sögulegu tíðindi.

Mafían er öflugur þrýstihópur í ESB-stofnunum í Brussel

Mafíustarfsemin breiðist út með ESB. Ítalska mafían virðist hafa tengsl við aðila í öllum stofnunum ESB samkvæmt nýlegri skýrslu sem tekin hefur verið saman um skipulagða glæpastarfsemi í Evrópusambandinu. Evrópuþingmenn hafa talsverðar áhyggjur af þessu.

Samkvæmt skýrslunni hefur mafían komið sér vel fyrir í efnahagslífinu í Þýskalandi, Bretlandi og á Spáni án þess að ríkisstjórnir landanna upplýsi almenning um það. Kostnaður vegna þessarar starfsemi er metinn á 670 milljarða evra ár hvert.

Nánari upplýsingar um þetta má sjá hér: Europaportalen.se