Auglýst eftir pólitískri forystu fyrir ESB-andstöðu

Framsóknarflokkurinn er líklegri en Sjálfstæðisflokkurinn til að taka forystuna fyrir andstöðunni gegn aðild Íslands að Evrópusambandinu, segir Evrópuvaktin. Líkur eru á því að þetta sé rétt mat.

Til að ná forystu í málaflokknum þarf utanríkispólitíska sýn um hvar hagsmunum Íslands sé best borgið. Framsóknarflokkurinn er með forsendur til að byggja upp trúverðuga utanríkispólitík sem svarar til þeirrar sannfæringar þjóðarinnar að við eigum ekki heima í meginlandsbandalaginu með höfuðstöðvar í Brussel.

Í Evrópuumræðunni skilar forysta Sjálfstæðisflokksins auðu, sem flokknum mun hefnast fyrir.

18% aflans til Írlands - 82% til ESB

Það verður æ furðulegra eftir því sem tíminn líður að Össur utanríkisráðherra skuli komast upp með að halda því fram, að Ísland þurfi enga undanþágu frá sjávarútvegsreglum ESB, án þess að utanríkismálanefnd Alþingis kalli hann fyrir og krefjist skýringa, en ummæli Össurar ganga algerlega í berhögg við samningsmarkmiðin sem samþykki Alþingis við aðildarumsókn byggði á.

Össur hefur haldið því fram að reglan um ,,hlutfallslegan stöðugleika" (relative stabilitiy) tryggi hagsmuni Íslendinga. Hann og aðrir áhugamenn um ESB-aðild Íslands ættu að kynna sér hver verið hefur reynsla nágranna okkar Íra af sjávarútvegsreglum ESB í tímans rás.

Sjávarútvegsráðherra Írlands, Simon Covery, vakti máls á því fyrir skömmu að verðmæti sjávarafurða af fiskimiðum Íra væri árlega um það bil 1,2 milljarðar evra en Írar fengju einungis 18% aflans í sinn hlut eða rúmar 200 milljónir evra. Gróft reiknað má því segja að skip annarra ríkja taki fimm af hverjum sex fiskum á Írlandsmiðum og telur ráðherrann að stærsti hlutinn sé veiddur af frönskum skipum. Hann virðist þó gera sér litlar vonir um breytingar til batnaðar því að valdið til að stjórna veiðum á fiskimiðum Íra er alfarið hjá ESB. Hann sér því ekki annað ráð til úrbóta en að krefjast þess að hluta þess afla sem erlend skip veiða við Írlandsstrendur verði landað á Írlandi, helst allt að helmingi aflans.

Að sjálfsögðu fá Írar einnig nokkurn afla á fiskimiðum annarra aðildarríkja. Engu að síður telja þeir sig mjög afskipta við kvótaúthlutanir og rekja þá hörmungarsögu aftur til þess tíma er þeir gengu í fyrirrennara ESB, svonefnt Evrópubandalag.

Gerir Össur sér grein fyrir því að Íslendingar gætu með tíð og tíma komist í svipaða aðstöðu innan ESB og Írar? Að sjálfsögðu er engin trygging fólgin í reglunni um ,,hlutfallslegan stöðugleika" því að hún er einungis viðmiðunarregla sem meiri hluti ráðherraráðsins getur breytt hvenær sem henta þykir, rétt eins og nú eru uppi áform innan ESB að endurskoða"Sameiginlegu fiskveiðistefnuna" í heild sinni og taka m.a. upp framseljanlega kvóta.

Ákvarðanir um breytingar á fiskveiðistefnunni eru teknar í ráðherraráðinu, þar sem Íslendingar myndu fá langt innan við 1% atkvæða ef þeir gengju í ESB. Fiskveiðiríki ESB hafa eyðilagt fiskistofna sína, eins og alkunna er, með gengdarlausu brottkasti, ofveiði og miðstýrðri óstjórn. ESB hefur því brýna þörf fyrir að komast að gjöfulli fiskimiðum. Ábyrgð þeirra manna er mikil og þung sem stuðla að því að íslensk fiskimið verði sett undir erlenda stjórn.

Ragnar Arnalds

(Tekið héðan.)

Evrópuherinn enn á dagskrá

Brussel áformar að koma upp höfuðstöðvum til að samhæfa hernaðaruppbyggingu Evrópusambandsins. Liður í að efla hernaðarmátt ESB er jafnframt að færa strandgæslu Evrópusambandsríkjanna undir eina yfirstjórn.

William Hague utanríkisráðherra Breta nefndi í grein um helgina hernaðaruppbygginu Evrópusambandsins sem dæmi um útþenslustefnu sambandsins.

Express segir í frétt að hernaðaruppbygging Evrópusambandsins sé enn eitt dæmið um græðgi Brussel í valdheimildir aðildarþjóða.

(Tekið héðan.)

Opin umræða í Evrópu, lokuð á Íslandi

Umræðan í Evrópu um framtíð ESB almennt og Evrulands sérstaklega er opin og lýðræðisleg. Tveir meginkostir blasa við. Í fyrsta lagi að bjarga evrunni með stóraukinni miðstýringu á efnahagslífi þeirra 17 landa sem eiga evru fyrir lögeyri. Í öðru lagi að brjóta upp evru-samstarfið með því að Þýskaland og fylgiríki gangi úr samstarfinu eða að jaðarríkin hrökkvi af skaftinu.

Umræðan á Íslandi um aðildarumsókn að ESB er lokuð og ólýðræðisleg. Samningsmarkmið Íslands eru ekki kynnt almenningi. Lokaðir fundir íslenskra ráðamanna við erlenda leiðtoga skapa tortryggni og upplýsa ekkert. Hagmunaaðilar hér heima þurfa að fara Fjallabaksleið til að fá upplýsingar.

Umsókn ríkisstjórnar Jóhönnu Sig. um aðild að Evrópusambandinu er ekki í þágu þjóðarinnar heldur í beinni andstöðu við vilja þjóðarinnar. Kerfislæg lokun á Evrópuumræðuna hér á Íslandi er tilraun til að fela umboðsleysi ríkisstjórnarinnar.

Meðhlauparar ríkisstjórnarinnar í fjölmiðlum berja í umsóknarbrestina líkt og þeir drógu fjöður yfir öfgar og óheilindi viðskiptalífsins á tímum útrásar.

Framtíð evrunnar í skoðun

Bretar andvígir aðild að Evrópusambandinu

Breska þingið samþykkti Evrópulög í vikunni sem banna valdaframsal til Evrópusambandsins án undangenginnar þjóðaratkvæðagreiðslu. Lögin munu leiða til uppgörs Breta við Evrópusambandið sem þarf nauðsynlega að gera breytingar á Lissabonsáttmálanum vegna fjármálakreppunnar á evrusvæðinu.

William Hague utanríkisráðherra Breta skrifar grein Sunday Telegraph í tilefni af nýju lögunum. Tvennt vekur sérstaka athygli. Í fyrsta lagi óskar Hague sér að Evrópusambandið verði fyrst og fremst viðskiptabandalag. Í öðru lagi að lýðræðishalli Evrópusambandsins verði lagfærður.

Hvorttveggja hugsunin er eitur í beinum samrunasinna í Brussel. Viðskiptabandalag er sambærilegt við EFTA þar sem kveðið er á um frjálsa verslun og lítið meira og fullnægir hvergi nærri metnaði þeirra sem sjá fyrir sér Stór-Evrópu. Aukin aðkoma almennings að ákvörðunum um málefni Evrópusambandsins þýðir sjálfkrafa að samrunaþróun verður erfið ef ekki ómöguleg.

Stuðningur við úrsögn Bretlands úr Evrópusambandinu vex. Nýleg könnun, sem sagt er frá í Telegraph, sýnir 49 prósent Breta fylgjandi úrsögn en aðeins 25 prósent vilja áframhaldandi aðild.

Bretland fjarlægist Evrópusambandið á sama tíma og kjarnalöndunum 17 sem nota evruna er lífsnauðsyn að auka með sér samstarfið til að ná tökum á fjármálakreppunni.

Fyrirsjáanlegt uppgjör Bretlands við Evrópusambandið staðfestir það megineinkenni ESB að það er bandalag Frakklands og Þýskalands auk næstu nágranna. Bretlandi er ekki næsti nágranni og enn síður Ísland. 

(Tekið héðan.)

Hver voru samningsmarkmið Jóhönnu á fundi með Merkel?

Bændasamtök Íslands hafa ritað bréf til Jóns Bjarnasonar, sjávarútvegs- og landbúnaðarráðherra, með tilmælum um að hann upplýsi hvaða samningsmarkmið í ESB-aðildarviðræðunum Jóhanna Sigurðardóttir kynnti Angelu Merkel, kanslara Þýskalands, á fundi þeirra í Berlín 11. júlí sl.Í bréfi Bændasamtaka Íslands til Jóns Bjarnasonar af þessu tilefni segir meðal annars:

Af fréttinni [um fundinn í Berlín] má ráða að forsætisráðherra hafi kynnt samningsmarkmið varðandi landbúnað en engin slík markmið hafa verið kynnt opinberlega á Íslandi. Sjávarútvegs- og landbúnaðarráðherra hefur hins vegar tekið undir lágmarkskröfur Bændasamtakanna sem ályktað var um á sl. Búnaðarþingi og kynnt þær fyrir ríkisstjórn. Bændasamtökin óska eftir því við yður af þessu tilefni að þér aflið upplýsinga um hvaða stefnumarkmið forsætisráðherra kynnti kanslaranum á áðurnefndum fundi þeirra.

Sjá nánar á Evrópuvaktinni.

Krefst Þorsteinn Pálsson afsagnar Jóns Bjarnasonar?

Haraldur Benediktsson formaður Bændasamtaka Íslands segir trúnaðarmann Össurar Skarphéðinssonar, Þorstein Pálsson, hafa í frammi lítt dulbúna kröfu um að Jón Bjarnason landbúnaðarráðherra segi af sér til að aðildarviðræður við Evrópusambandi fái að halda áfram.

Bændasamtökin lögðu nýlega fram ítarlega rannsóknaritgerð og í viðauka kröfur um að landbúnaðarhagsmunir þjóðarinnar verði ekki fyrir borð bornir í samningaviðræðum.

Þorsteinn Pálsson sem situr í samninganefnd Íslands við Evrópusambandið í umboði utanríkisráðherra sneri út úr málflutningi Bændasamtakanna í blaðagrein.

Haraldur Benediktsson svarar Þorsteinin með grein á Evrópuvaktinni sem lýkur með þessum orðum:

Þorsteinn Pálsson fellur í þá gryfju að taka eina varnarlínu bænda fram til að gera hana tortryggilega. Hann gerir í raun enga tilraun til að ræða málefnalega um afstöðu bænda. Ef hann vill gera það þá þarf hann að svara í heild þeim rökum sem bændur hafa sett fram Þetta eru okkur vonbrigði því Bændasamtökin tóku alvarlega áskoranir um málefnalega umræðu um ESB, þau mæta til umræðunnar með einstaka og vandaða rannsókn á því hvað er í „ESB pakkanum“ Bændasamtökin hafa fjallað um hagsmuni landbúnaðar með opinni umræðu. Undirbyggt sjónarmið sín með gildum rökum. Tekið lýðræðislega afstöðu. Hið sama er ekki hægt er að segja um stjórnvöld sem pukrast með samningsafstöðu Íslands. En kannski ekki, því eina raunverulega samningsafstaðan er að fá inngöngu – hvað sem það kostar.

Bændur eiga menn sem kunna að koma fyrir sig orði og skilja á milli kjarna og hismi.

Ragnar Arnalds: Össur boðar sýndarlausn

Yfirlýsing Össur um að Ísland þurfi enga undanþágu frá fiskveiðistefnu ESB hefur óneitanlega vakið nokkurn hroll hér á landi en hún skýrist af því að varanleg undanþága frá CFP er ekki í boði. Í stað þess að viðurkenna það hreint út bregst Össur við með því að halda því fram að við þurfum enga undanþágu heldur einungis „sérlausn“ og á þá bersýnilega við einhvers konar sýndarlausn af því tagi sem embættismenn ESB eru frægir fyrir.

Ragnar Arnalds stendur Vinstrivaktina.