Evran kremur efnahag Finna

Þátttaka Finna í gjaldmiðilsbandalagi Evrópu, evrunni, hefur gert það að verkum að vinnuaflskostnaður er fimmtungi hærri í Finnlandi en í samkeppnislöndunum Svíþjóð og Þýskalandi. Þess vegna hefur útflutningur átt undir högg að sækja í Finnlandi, hagvöxtur verið daufur og atvinnuleysi of mikið. Þetta bitnar svo að sjálfsögðu á þjónustugetu hins opinbera í Finnlandi.

Fyrir vikið er Finnland kallað veiki maðurinn í Evrópu.

Nú hafa stjórnvöld í Finnlandi í bígerð að bregðast við þessu með því að fækka frídögum og veikindagreiðslum. 

Það er líklegt að Finnum muni þykja óbragð að þeim meðulum sem þeir þurfa að taka vegna þeirra kvilla sem evran veldur þeim.

Forsetinn um fullveldi þjóðarinnar

Jón Bjarnason, formaður Heimssýnar og fyrrverandi ráðherra og þingmaður, bendir á að Ólafur Ragnar Grímsson, forseti Íslands hafi lagt þunga áherslu á það við setningu Alþingis í dag að fullveldið væri ein stærsta auðlind þjóðarinnar. Í krafti þess hafi Íslendingar sótt eigið forræði á fiskveiðilögsögunni og landgrunninu. Enn fremur hafi þjóðin í krafti þess hafnað að bera ábyrgð á óreiðuskuldum einkaaðila, eins og fram kemur í bloggi Jóns Bjarnasonar.

Í ræðu sinni við setningu Alþingis í dag minnti forsetinn á það að allt frá lýðveldisstofnun hafi Íslendingum tekist að stunda fjölþætt alþjóðasamstarf með ýmsum alþjóðastofnunum og öðrum ríkjum.

Þá minnir Jón Bjarnason á það í innleggi sínu að ESB-aðildarsinnar hafi viljað skerða fullveldisákvæði í stjórnarskránni til að auðvelda sér leið inn í ESB. Það hafi ráðherrar í ríkisstjórn Jóhönnu Sigurðardóttur reynt að gera en ekki tekist.

Því megi búast við því að ESB-aðildarsinnar á Alþingi muni áfram sækja hart að fullveldinu í umræðum um breytingar á stjórnarskránni. 

Hvað var Ólafur Ragnar að meina?

Fari Bretar úr ESB er ESB-málið búið hér á landi

Meðfylgjandi frétt segir frá því að nú sé meirihlutastuðningur við það meðal Breta að yfirgefa Evrópusambandið. Jafnframt segir að stuðningur við úrsögn hafi farið stöðugt vaxandi.

Gangi þetta eftir í væntanlegum kosningum í Bretlandi er ESB-málið endanlega dautt hér á landi.

Það verður þá einungis örlítill hópur strangtrúaðra aðildarsinna sem mun reyna að halda því á lofti. En þjóðin getur þá hins vegar haldið áfram að takast á hendur mikilvægari mál.

Meirihluti Breta vill yfirgefa ESB

Flóttamenn kljúfa Evrópusambandið

Straumur flóttamanna til Evrópulanda veldur sundrungu meðal stjórnmálamanna í álfunni. Schultz, forseti ESB-þingsins, er einn þeirra, sem óttast þetta. Ýmsir halda því fram að landamærasamstarfið sé í upplausn og þar með einn af hornsteinum ESB, nefnilega frjáls för fólks.

Orban, forsætisráðherra Ungverjalands, segir að flóttamenn séu fyrst og fremst vandi Þýskalands vegna þess að þeir vilji flestir fara þangað. Flóttamönnum dauðleiðist á Spáni, merkilegt nokk - og þeir vilja margir halda norður á bóginn. Margir vilja fara til Englands en Tjallarnir hafa nánast skellt í lás. Samt eru aðfluttir óvíða fleiri. 

Danir hafa eitthvað verið að klóra sér í höfðinu yfir þessum málaflokki, en Svíar reyna enn að ástunda sína vingjarnlegu stefnu, þótt einhverjir séu nú farnir að efast eftir uppgang Svíþjóðardemókrata upp á síðkastið.

Og nú er á landamærastöðvum suður í Evrópu farið að skilja á milli stríðshrjáðra flóttamanna og þeirra sem vilja bara komast í betra djobb.

Það er margt í þessu alveg skelfilegt. Einna verst er að horfa upp á saklaus börnin sem þurfa að líða fyrir þann hrylling sem stríðandi hópar koma þeim í.

En sem betur fer vilja margir rétta nauðstöddum hjálparhönd. Þótt oft sé sælla að gefa en að þiggja skiptir gjöfin í þessu samhengi langtum meiru fyrir hinn nauðstadda. Þegar um einhvern umtalsverðan fjölda og mikla flutninga er að ræða útheimtir hjálparstarfið skipulag og talsverða fjármuni. Þar koma stjórnvöld og hinn sameiginlegi vilji þjóðarinnar til sögunnar.

Lyfjaiðnaður ESB ver 6 milljörðum í þrýstiaðgerðir á hverju ári

Lyfjaiðnaðurinn átti yfir 50 fundi með framkvæmdastjórn Junckers á fyrstu fjórum og hálfum mánuði sem hún var við stjórnvölinn í ESB. Iðnaðurinn ver árlega sem svarar um sex milljörðum króna í þrýstiaðgerðir í Brussel, 15 sinnum meira en þau félagasamtök sem vinna að almannaheilsu eða að því að almenningur hafi aðgang að lyfjum.

Þeir sex miljarðar sem hér um ræðir að lyfjaiðnaðurinn notaði er fyrst og fremst kostnaður við alls kyns fundi með stjórnmálamönnum og viðvera ráðgjafahópa í Brussel.

EUObserver greinir frá þessu.

Cameron skikkaður til að breyta ESB-aðildarspurningunni

Nú hefur David Cameron forsætisráðherra og stjórn hans í Bretlandi verið skikkuð til að breyta þeirri spurningu um aðild eða úrsögn úr ESB sem ætlunin er að leggja fyrir bresku þjóðina fyrir lok árs 2017. 

Spurningin sem Cameron ætlaði af stað með var svona: Á Bretland að vera áfram í ESB? Svarmöguleikarnir áttu að vera Já eða Nei.

Nú hefur óháð rannsóknarstofnun komist að því að þessi spurning er ekki nógu hlutlaus því hún ýtti frekar undir að fólk segði já.

Þess vegna er sú spurning sem nú er ætlunin að leggja fyrir þjóðina svohljóðandi: Á Bretland að vera áfram í ESB eða yfirgefa ESB? Svarmöguleikarnir verða: Vera áfram í ESB eða Yfirgefa ESB.

Það er jafnvel talið hugsanlegt að þessar kosningar fari fram á næsta ári.

 

433 milljónum hent út um gluggann

Evrópustofu var lokað í gær samkvæmt álímdri frétt fréttastofu Ríkisútvarpsins. Þar er greint frá atburðinum eins og um einhverja afmælisveislu hafi verið að ræða. Af hverjum spurði fréttamaðurinn, Heiðar Örn Sigurfinnsson, ekki hvað herlegheitin hafa kostað? Reyndar er hægt að sjá út frá gamalli frétt að samningsbundnar greiðslur vegna reksturs Evrópustofu hafi verið 433 milljónir króna. Stór hluti af þessu hefur farið til nokkurra vel launaðra starfsmanna og annað í pappír og annan áróður.

ESB fitar sína á meðan aðrir svelta.