Það eru 28 pakkar til að kíkja í!

Það var fróðleg umræða í kosningaútvarpi RUV í kvöld. Þar var það einungis fulltrúi Samfylkingar sem tjáði sig ótvírætt um að vilja Ísland inn í ESB. Fulltrúar annarra flokka voru annað hvort á móti eða voru óvissir og vildu sumir kíkja í pakkann. Benti þá fulltrúi eins flokksins á að það væri óþarfi að setja eitthvert flókið ferli í gang svo hægt yrði að kíkja í pakkann því þeir pakkar sem hægt væri að kíkja í væru jú 28. Það væri nóg að kanna stöðuna í þeim 28 ríkjum sem eru aðilar að ESB (27 þegar Bretar verða farnir út). 

Þegar pakkarnir eru skoðaðir kemur í ljós gífurlegur lýðræðishalli þar sem vald hefur verið fært frá ríkjunum til embættismanna og stjórnenda í Brussel. Það sjáum við meðal annars á því hvernig tekið hefur verið á málefnum Grikklands, Spánar, Portúgals, Írlands og fleiri jaðarríkja evrunnar sem lent hafa í fjárhagserfiðleikum. Þar miða björgunaraðgerðir ekki síst við það að bjarga þeim þýsku bönkum sem lánað hafa til jaðarlandanna.

Þegar haldið er áfram að kíkja í pakkana sést t.d. að atvinnuleysið er að meðaltali um 10% og allt að þrjátíu prósentum í tveimur löndum. 

Og þegar nánar er skoðað sést að lönd sem eru aðilar að ESB þurfa að undirgangast sameiginlega sjávarútvegsstefnu ESB þar sem endanlegt vald í þeim málaflokki er fært til Brussel.

Reynsla ýmissa minni ESB-ríkja til þessa og fyrirkomulag sjávarútvegs- og annarra auðlindamála ætti að vera víti fyrir Íslendinga til að varast.

Könnunarviðræður eru blekking

Gluggað er í bók Jóns Torfasonar, Villikettirnir og vegferð VG: „Samfylkingin mátti ekki heyra á slíkt minnst enda er ekkert til sem heitir „könnunarviðræður,“ slíkt tal er aðeins fyrirsláttur. Annað hvort er sótt um aðild í þeim tilgangi að ganga í ESB eða menn setjast niður og lesa sáttmála sambandsins og samþykktir til að kynna sér hugmyndafræði og skipulag þess og geta þá metið hvort þeim lýst vel eða illa á. Umsóknarlönd geta ekki samið um að breyta reglum ESB, aðeins um það hversu hröð eða hæg aðlögunin skuli vera. Allt tal um „könnunarviðræður“ er því út í hött, byggist annað hvort á vísvitandi blekkingum eða mikilli vanþekkingu.“ Úr Villikettirnir og vegferð VG, eftir Jón Torfason, útgefið haustið 2016. 

Það er um þetta að segja: Kosning um áframhaldandi viðræður er af svipuðum meiði og könnunarviðræður. Þar byggist umræðan "annað hvort á vísvitandi blekkingum eða mikilli vanþekkingu."

 

Ósk um viðræður er ósk um aðild - en þjóðin er á móti aðild

Til að viðræður um aðild að ESB geti farið fram þarf að sækja um aðild að ESB. Ósk um aðild felur í sér vilja til að ganga í ESB. Viðræður fela þá það í sér hvernig aðlaga eigi regluverk umsóknarlands að regluverki ESB. Þetta liggur fyrir.

Ísland sótti um aðild að ESB árið 2009. Viðræður um aðild á grundvelli þeirrar umsóknar sigldu fljótlega í strand meðal annars vegna þess að Íslendingar sætta sig ekki við að Brussel nái yfirráðum yfir auðlindum Íslands. Skilyrðin sem Alþingi setti í umsókninni hindruðu frekari viðræður.

Þjóðin vill ekki gerast aðili að ESB. Það er því algjörlega á skjön við eðlilegan framgangsmáta að halda áfram viðræðum um aðild að ESB. 

Ef einhver vilji er til að endurlífga umsóknina og setja viðræður í gang er það jafnframt yfirlýsing um að falla frá þeim skilyrðum sem Alþingi setti í samþykktina um umsókn frá 2009. Það yrði yfirlýsing um að Íslendingar ætluðu að fela embættismönnum í Brussel úrslitavald við stjórn mikilvægra auðlindamála á og í kringum Ísland. Hver vill það?

 

 

Ályktun Framsóknar um ESB

Eftirfarandi var samþykkt á 34. flokksþingi Framsóknarflokksins um síðustu helgi:

Framsóknarflokkurinn telur hag lands og þjóðar best borgið utan Evrópusambandsins og hafnar því aðild að sambandinu. Framsóknarflokkurinn fagnar því að ríkisstjórn undir forystu Framsóknarflokksins afturkallaði aðildarumsóknina að ESB. Ljóst má vera að forsendur þeirrar umsóknar eru brostnar. Gæta skal íslenskra hagsmuna í hvívetna varðandi útgöngu Breta úr Evrópusambandinu. Bretland er stærsta viðskiptaland Íslands, bæði hvað varðar vöru- og þjónustuviðskipti. Ísland skal hafa frumkvæði að viðræðum við stjórnvöld í Bretlandi þar sem markmiðið er að tryggja a.m.k. jafn góð viðskiptakjör milli þjóðanna og nú eru í gildi. Í ljósi þeirra grundvallarbreytinga sem orðið hafa á vettvangi EES, meðal annars með útgöngu Bretlands og í ljósi vandamála er tengjast Schengen samstarfinu er orðið tímabært að meta árangurinn af þessum samningum og velta upp valkostum.

 

Sjá nánar: Ályktanir 34. flokksþings Framsóknarflokksins 1. - 2. október 2016.

ESB er fyrir forréttindahópa segir Theresa May

Bogi Ágústsson fréttamaður benti ágætlega á það í morgunþætti Óðins Jónssonar í Ríkisútvarpinu rétt í þessu að Bretar líta almennt þannig á að ESB sé fyrst og fremst fyrir forréttindahópa en gagnist lítið venjulegu launafólki. Þessu til staðfestingar flutti Bogi hljóðbút með ræðu Theresu May, núverandi forsætisráðherra Breta.

Sjá enn fremur hér: May vill sanngjarnara Bretland.

Evran er á undanhaldi hér á landi

Það er ljóst af svörum fulltrúa þeirra stjórnmálaflokka sem visir.is ræðir við að evran er heldur á undanhaldi. Viðreisn hefur gefið evru upp á bátinn. Það eru helst Samfylking og Björt framtíð sem enn vilja skoða evruna. Aðrir flokkar stefna ekki á evruna fremur en meirihluti þjóðarinnar. 

Viðsnúningur Viðreisnar í gjaldmiðlamálinu er athyglisverður og sætir reyndar talsverðri furðu þar sem Benedikt Jóhannesson, formaður flokksins, hefur talað einarðlega fyrir upptöku evru á undanförnum árum og í aðdraganda og við stofnun flokksins. Það er greinilegt að hann hefur orðið undir í flokknum hvað þetta varðar. Það er hins vegar ærið óljóst hverjir hafa velt formanninum í þessu máli. Þessi viðsnúningur virðist hins vegar sýna í hnotskurn þann vanda sem nýir flokkar eiga við að glíma. Stefnan í mikilvægum málum getur snúist skyndilega og ört eftir því hvernig vindar blása - líkt og gildir um vindhana sem notaður er til að kanna hvaðan vindur blæs.

Ljóst er einnig að Seðlabankinn hefur vísað hugmyndinni um myntráð út í hafsauga fyrir Ísland, líkt og Össur Skarphéðinsson hefur bent á.

Af fréttum að dæma hefur staða efnahagsmála aldrei verið betri á Íslandi en nú er. Eins og kemur fram í riti Seðlabankans, Valkostir Íslands í gjaldmiðils og gengismálum, eru það helst lönd sem búa við miklar og erfiðar þrengingar sem tekið hafa upp myntráð.

Blaðamaður virðist ekki leggja rétt út af ummælum fólks

Af þessu að dæma virðist blaðamaður ekki hafa hlustað nægilega vel eða skilið það sem sagt var, samanber: 

Villandi fyrirsögn, ef marka má það sem er skrifað í fréttinni

Vilja spyrja þjóðina um viðræðurnar

Alþingi á gráu svæði með fullveldisframsal

Alþingi virðist vera á gráu svæði varðandi fullveldisframsal í því máli sem fjallað er um í meðfylgjandi frétt. Fulltrúar í stjórnskipunar- og eftirlitsnefnd Alþingis eru ekki á einu máli um það hvort framsal á fullveldi vegna fyrirhugaðrar innleiðingar á evrópskum reglum hér á landi um fjármálaeftirlit samrýmist stjórnarskránni, eins og fram kemur í fréttinni. Lögspekingar virðast ekki heldur sammála.

Það er því varla ofsagt að Alþingi sé hér á gráu svæði.

Skiptar skoðanir um fullveldisframsal

CNN leggur áherslu á að ESB eigi í tilvistarkreppu

Það er athyglistvert að ýmsir af stærstu fjölmiðlum heimsins, eins og CNN, taka það helst úr nýlegri ræðu Jean-Claude Junckers, forseta framkvæmdsastjórnar Evrópusambandsins, að sambandið eigi í tilvistarkreppu. Slík kreppa getur merkt að tilgangur sambandsins sé óljós og að framtíð þess sé óviss. 

Þetta eru í raun engin ný sannindi. ESB hefur átt í vaxandi tilvistarkreppu undanfarinn áratug. 

Almenningur og fyrirtæki í Bretlandi og víðar lætur sér í raun fátt um finnast - ýmis fyrirtæki með viðskipti í Bretlandi blómstra raunar sem aldrei fyrr ef marka má fréttaflutning CNN.

Úr því að Brexit er staðreynd er líklega best fyrir alla að líta fram á veginn með þá staðreynd í huga.

Það er athyglisvert að ESB-aðildarsinnar hér á landi virðast ekki enn hafa fregnað af tilvistarvanda Junckers og ESB. 

Bretar geta ekki valið úr að vild

Össur gleymdi ESB - um stund

Það var fróðlegt að heyra í þættinum á Sprengisandi á Bylgjunni rétt í þessu þegar Össur Skarphéðinsson og Ragnheiður Ríkharðsdóttir voru að fara yfir helstu kosningamálin að Össur mundi ekki eftir ESB fyrr en allri upptalningu var lokið. Þá mundi Össur skyndilega eftir ESB og bætti því við að allir væru sammála um að kjósa þyrfti um áframhaldandi viðræður. Hinn nýi þáttastjórnandi, Kristján Kristjánsson, minnti Össur þá á það að fáir virtust hafa áhuga á ESB-málunum enda væri ESB í tómum vandræðum þessi dægrin. 

Það er líklega til marks um það hversu lítilvægt þetta mál er orðið þegar utanríkisráðherra í þeirri ríkisstjórn sem sótti um aðild Íslands að ESB skuli varla muna eftir málinu.