Nýr flokkur ef ekki er farið að þjóðarvilja

Fráfarandi ríkisstjórn sótti um aðild að ESB án þess að spyrja þjóðina álits, og reyndar án þess að stjórnin væri öll á bak við umsóknina. Síðan hefur meirihluti þjóðarinnar verið andvígur aðild að ESB. Ef gengið verður áfram gegn þjóðarvilja með þessum hætti er líklegt að hér spretti upp stór ESB-andstöðuflokkur líkt og er að gerast í Bretlandi, Þýskalandi og víðar.

Þetta kemur m.a. fram í nýlegum pistli Björns Bjarnasonar á Evrópuvaktinni.

Um þetta segir Björn:

Flokkur breskra sjálfstæðissinna eða fullveldissinna, UKIP, sem er í andstöðu við aðild að ESB hlaut um 23% atkvæða í sveitarstjórnakosningum á Englandi fimmtudaginn 2. maí. Þessi mikli árangur hefur valdið pólitískum jarðskjálfta í Bretlandi og sérstaklega innan Íhaldsflokksins.

David Cameron, forsætisráðherra og leiðtogi íhaldsmanna, sagði föstudaginn 3. maí þegar úrslitin lágu fyrir og flokkur hans var í sárum: „Það ber að sýna kjósendum UKIP virðingu.“ Hann hafði áður lýst UKIP og fylgismönnum flokksins sem „sérvitringum, furðufuglum og rasistum í dulargervi“.

UKIP-flokkurinn var stofnaður 1993 eftir að Maastricht-sáttmálinn og sameiginlega myntsamstarfið kom til sögunnar. Helsta baráttumál flokksins er að Bretar segi tafarlaust skilið við Evrópusambandið. Þá leggur hann einnig áherslu á harðari stefnu gegn innflytjendum.

Undanfarið hefur Íhaldsflokkurinn boðað aðgerðir til að sporna gegn komu innflytjenda til Bretlands og í janúar 2013 flutti David Cameron ræðu þar sem hann hét Bretum að þeir gætu kosið um aðild að ESB fyrir árslok 2017 yrðu íhaldsmenn þá enn við völd en kosið verður til breska þingsins 2015.

Sagan kennir Bretum að stóru flokkarnir segjast ætla að bera aðildina að ESB eða þætti tengda henni undir atkvæði kjósenda en svíkja hins vegar loforð í þá veru þegar á hólminn er komið. Margir telja því Cameron hafa búið til enn eina kosningabrelluna með loforði um þjóðaratkvæði fyrir árslok 2017.

David Davis, áhrifamaður í þingflokki íhaldsmanna, brást við útreið flokksins í sveitarstjórnakosningunum með kröfu um að þjóðaratkvæðagreiðslunni yrði flýtt til að ná ESB-málinu úr höndum UKIP. Theresa May innanríkisráðherra hefur hafnað þessari hugmynd en sagt að almenningur eigi rétt á „meiri fullvissu“ um að efnt verði til þjóðaratkvæðagreiðslunnar.

Hér á landi bíða menn eftir nýjum stjórnarsáttmála til að átta sig á næstu skrefum í ESB-málinu. Þau hljóta að felast í fyrirheiti um að þjóðin eigi síðasta orðið um hvort haldið verði áfram á umsóknarbrautinni og úr því verði skorið á þessu kjörtímabili með þjóðaratkvæðagreiðslu.

Fráfarandi ríkisstjórn klúðraði ESB-umsókninni áður en hún var send til Brussel af því að hún leitaði ekki álits þjóðarinnar áður en aðlögunarferlið hófst. Án náins samráðs við íslensku þjóðina í ESB-málum verður til flokkur hér á landi í anda UKIP og sambærilegra flokka hvarvetna í ESB-löndunum. Almenningur sættir sig ekki við fyrirmæla- og ofríkisstefnuna frá Brussel og undirgefni heimastjórnmálamanna gagnvart Brusselvaldinu.

Athugasemdir

[Friðrik Friðriksson, 5.5.2013 kl. 21:51]

Þær voru nokkrar skoðunarkannarnir á árinu 2009 sem sýndu alltaf sömu niðurstöðuna...það var alltaf meirihluti fyrir þessari umsókn, það er ekki hægt að þræta fyrir það og halda eitthvað allt annað!

Átti að fara fram þjóðaratkvæðagreiðsla hvort það ætti að leggja fram ESB-frumvarp fyrir þingið!..ég kannast ekki við svoleiðis vinnureglur hjá Alþingi.

Alþingi samþykkti að fara í viðræður og að loknum viðræðum við sambandið verði haldin þjóðaratkvæðagreiðsla um væntanlegan aðildarsamning.

Þetta er ekki flókið.

[Eyjólfur (IP-tala skráð) 5.5.2013 kl. 22:22]

Friðrik,

http://euobserver.com/enlargement/28524

http://visir.is/article/20090126/FRETTIR01/140609051/-1

http://vefblod.visir.is/index.php?s=2985&p=73056 (efst til vinstri)

http://www.mbl.is/frettir/innlent/2008/11/24/minnkandi_ahugi_a_esb_adild/

[Elle_, 5.5.2013 kl. 23:03]

Friðrik, það er ægilega flókið ef þú ætlar að fara um Moggabloggið með rangfærslur.

[rafn gudmundsson (IP-tala skráð) 5.5.2013 kl. 23:15]

þetta er auðvitað rétt hjá Friðrik - og svo eru þið komin með svona nei flokk - xJ en hann fékk 1,1% í síðustu kostningum

[Elle_, 5.5.2013 kl. 23:44]

Rafn, dálítið órökrétt að kalla 59,8% (nú hærra) minnihluta.  Það er enginn svona grænn að segja þetta ekki viljandi.

[Eggert Sigurbergsson, 6.5.2013 kl. 07:54]

Þjóðin er að átta sig á því að það verður engin samningur til að blaða í yfir góðum kaffibolla.

Þjóðin er að átta sig á því að það er búið að ljúga að henni um að hún fái að ráða enda verður aðlögun lokið þegar hún fær aðkomu að málinu.

Þjóðin situr uppi með fulla aðlögun að öllu regluverki sambandsins hvort sem hún kýs að standa fyrir utan sambandið eða ekki.

Þjóðin er að átta sig á að markmið sambandsinna er að klára aðlögunarferlið hvað sem það kostar enda verður þá hægt að kjósa endalaust um inngöngu í sambandið með engum fyrirvara ef það hefst ekki í fyrstu atrennu.

Þjóðin vill ekki ganga í sambandið en samt er fullur þriðjungur hennar sem skilur ekki aðildarferlið og fellur fyrir lyginni um að það sé "samningur" í boði sem ábyrgðarlaust sé að kíkja í.

Þjóðin hefur aldrei fengið tækifæri til að sjá "samning" sem gerður hefur verið eftir nýja fyrirkomulaginu frá 2000 sem allar nýjar þjóðir verða að gangast undir enda eru þeir ekki til þótt fjöldi Austur-Evrópuþjóða hafi gengið í sambandið.

Þjóðinni stendur til boða að fá að sjá lista yfir gálgafresti sem veittir hafa verið í aðildarferlum frá 2000 enda er það eina sem er í boði.

Þjóðin er að átta sig á því að krafa sambandssinna sem byggir á skoðanakönnun sem byggð er á vanþekkingu vegna gengdarlausrar lygi fráfarandi stjórnvalda er aðför að þjóðinni.

[Anna Sigríður Guðmundsdóttir, 6.5.2013 kl. 11:29]

Aðlögun að ESB var ekki samþykkt af þinginu.

Það var samþykkt með fyrirvara, að fara í samningaviðræður og þjóðin fengi að kjósa áður en aðlögun hæfist.

Rétt skal vera rétt.

M.b.kv.