Evran lifir ekki af við núverandi aðstæður

Framkvæmdastjórar stærsta fjárfestingasjóðs í heimi segja að evrusvæðið muni ekki lifa af við núverandi fyrirkomulag. Eina leiðin fyrir framtíð evrunnar er sú að þau lönd sem nota evruna verði að einu ríki með sameiginlegri stjórn á sköttum og fjármálum ríkisins.

Þetta segja Andrew Bosomworth og Mike Amey sem eru framkvæmdastjórar The Pacific Investment Management Company (PIMCO) í samtali við breska blaðið The Telegraph. Þeir segja að hægagangurinn í efnahagslífinu á evrusvæðinu með litlum eða engum hagvexti að undanförnu og miklu atvinnuleysi, sem hefur verið nálægt 11% að undanförnu að meðaltali og nálægt 23% hjá ungu fólki, hafi fætt af sér öflugar stjórnmálahreyfingar á ystu vængjum stjórnmálanna til hægri og vinstri, svo sem Podemos á Spáni, Syriza í Grikklandi og Front National í Frakklandi.

Framkvæmdastjórarnir segja að sagan sýni að fyrirkomulag á borð við evruna geti ekki staðist til lengdar og vísa meðal annars til gamla norræna myntbandalagsins (1873-1914) í þeim efnum. Miðstýrð peningastefna, eins og hjá Seðlabanka evrunnar, geti ekki lifað af án þess að henni fylgi miðstýrð ríkisfjármálastjórn.  

Athugasemdir

[Jón Þórhallsson, 29.3.2015 kl. 18:53]

Sennilega væri besta lendingin í þessu máli að frysta ESB-umsóknina fram að næstu forseta-kosningum á Íslandi og láta þá forsetaframbjóðendur tjá sig um málið í framhaldi af sínu framboði.