Árni Páll segir umsóknina að ESB í fullu gildi

Árni Páll Árnason var skýr og ákveðinn í málflutningi sínum um stefnu Samfylkingarinnar í Evrópusambandsmálum á fundi Heimssýnar í gærkvöldi. Hann sagði umsóknina um aðild að Evrópusambandinu enn vera þjóðréttarlega í fullu gildi. „Ég tel að umsóknin um aðild að Evrópusambandinu sé þjóðréttarlega í gildi og hafi ekki verið afturkölluð“, sagði Árni Páll á líflegum stjórnarfundi Heimssýnar í gærkvöldi.

Árni sagði samþykkt Alþingis á sínum tíma og undirrituð umsókn um aðild Íslands að Evrópusambandinu hafi verið borin undir þjóðþing hvers einstaks aðildarríkis. Með því hafi skapast þjóðréttarlegt samband milli þjóðþings Íslands annarsvegar og einstakra þjóðþinga Evrópusambandsríkja og ESB-þingsins hinsvegar og sú gagnkvæma þjóðréttarlega skuldbinding hafi ekki verið rofin.

Hann rifjaði upp að tilteknir forystumenn Framsóknarflokksins og Sjálfstæðisflokksins hafi heitið þjóðaratkvæðagreiðslu um framhald aðildarviðræðnanna sem ekki hafi enn verið efnt.

Árni Páll sagðist ekki vera reiðubúinn til frekara fullveldisframsals til að fullnægja EES-samningnum en var reiðubúinn að deila hluta af fullveldinu með öðrum ríkjum þar sem allir hlutaðeigandi ættu sæti við borðið og hefðu sama rétt og áhrif á ákvarðanatökur. Er hann var minntur á lítinn hlut Íslendinga við hugsanlega aðild að ESB svaraði Árni því til að hann ætti nú von á því að íslenskir jafnaðarmenn yrðu þar fremur í samstarfi við stóran hóp jafnaðarmanna en örfáa Sjálfstæðismenn frá Íslandi.

Árni Páll reiknaði með að núverandi stjórnarandstöðuflokkar, Samfylking, Björt framtíð, Píratar og Vinstri græn muni sameinast um endurflutning á tillögu sinni frá síðastliðnum vetri um þjóðaratkvæðagreiðslu um framhald aðildarviðræðnanna að ESB. Stefna Samfylkingarinnar væri sú að leita samþykkis þjóðarinnar til að ljúka því samningsferli sem sett var í gang með aðildarumsókninni að ESB.

Árni sagði að Evrópusambandsumsóknin hefði stöðvast vegna þess að ákveðinn fagráðherra Vinstri grænna í sjávarútvegs- og landbúnaðarmálum hafi metið sjálfur fyrirvara Alþingis svo að ekki hefði verið hægt að ganga lengra í samningaviðræðunum.

Umræður á fundi Heimssýnar í gærkvöldi voru afar líflegar, en skiptar skoðanir, svo sem við var búist. 

Fjölmörgum spurningum var beint til Árna Páls sem hann svaraði greiðlega.

 

 

Athugasemdir

[Jón Valur Jensson, 17.9.2015 kl. 13:05]

Ófyrirleitni Árna Páls lýsir sér skýrast í þessu. Þeir ætla sér sannarlega, Samfylkingarmenn, að halda áfram með sína landráðaumsókn um innlimun Íslands í Evrópusambandið, umsókn sem var knúin í gegn með stjórnarskrárbrotum, í 1. lagi með því að neyða ýmsa þingmenn VG til þátttöku, þvert gegn sannfæringu þeirra, en það var þvert brot gegn 48. gr. stjírnarskrárinnar; en í 2. lagi með því að fara fram hjá valdsviði forseta Íslands í málinu og því afgeiðsluferli, sem mikilvægt stjórnarmálefni í skilningi 16.-19. gr. stjórnarskrárinnar á að fara eftir, og það veit Árni Páll ekki síður en aðrir, þótt hann hengi sig þrátt fyrir það (og þrátt fyrir ákvörðun ríkisstjórnar Íslands) í þessa ólögmætu Össurarumsókn! Sjá hér skýr rök: Árni Páll Árnason minnir óvart á að ESB-umsókn Össurar og hans eigin flokks var ólögmæt!

[Heimssýn, 17.9.2015 kl. 15:12]

Við skulum koma fram við þá sem eru okkur ósammála af fullri kurteisi og ekki vera að uppnefna þá. Árni Páll ræddi málin við okkur á mjög málefnalegum nótum í gær og tók sérstaklega fram að honum þætti miður þegar verið væri að kalla fólk ónöfnum, hvort sem þau skeyti sneru að Heimssýnarfólki, honum sjálfum eða öðrum. 

[Jón Valur Jensson, 17.9.2015 kl. 16:51]

Enginn var hér uppnefndur, en vitaskuld liggur mér ekki gott orð til Össurar-umsóknarinnar og hef rökstutt, að hún feli í 1. lagi í sér ítrekuð stjórnarskrárbrot (við 16., 18., 19. og 48. gr.), en í 2. lagi tel ég umsóknina hafa brotið í bága við ákvæði 86. gr. laga nr. 19/1940, þar sem segir (leturbr. mín):

 

"Hver, sem sekur gerist um verknað, sem miðar að því, að reynt verði með ofbeldi, hótun um ofbeldi, annarri nauðung eða svikum að ráða íslenska ríkið eða hluta þess undir erlend yfirráð, eða að ráða annars einhvern hluta ríkisins undan forræði þess, skal sæta fangelsi ekki skemur en 4 ár eða ævilangt." (Nauðungin kemur reyndar líka inn í þetta, með þvingun Samfylkingar á VG að svíkja sitt hátíðlega kosningaloforð.)

 

Þetta er úr X. kafla almennra hegningarlaga, sem nefnist Landráð. Svo geta menn rætt um, hvað séu fullframin landráð og hvað ekki.

 

PS. Viðurkennt skal að lokum, að ekki er ég skárri maður en Margaret Thatcher, sem var þekkt fyrir að "call spade a spade".