Meirihlutinn er á móti orkulöggjöf ESB

Stór meirihluti Íslendinga er á móti því að Ísland gangist undir orkulöggjöf Evrópusambandsins. Þetta er niðurstaða könnunar sem Maskína gerði fyrir Heimssýn dagana 12.-18. júní.

Þátttakendur voru spurðir hvort þeir væru með eða á móti því að Ísland ætti að vera undanþegið orkulöggjöf Evrópusambandsins og hvort þeir væru fygljandi eða andvígir þjóðaratkvæðagreiðslu um innleiðingu 3. orkupakkann. [Smelltu á myndina til að fá hana stærri]

61% af þeim sem tóku afstöðu vilja að Ísland verði undanþegið Evrópulöggjöf um orkumál en 39% telja að Íslendingar ættu að gangast undir löggjöfina.

Yfirgnæfandi meirihluti kjósenda stjórnarflokkanna, Miðflokksins og Flokks fólksins vilja að Ísland verði undanþegið orkulöggjöfinni en rúmur þriðjungur stuðningsmanna Samfylkingarinnar vill undanþágu.

53% vilja þjóðaratkvæðagreiðslu um innleiðingu 3. orkupakkans en 47% eru á móti.

Hægt að skoða könnunina undir þessari krækju.

Athugasemdir

[Þorsteinn Siglaugsson, 20.6.2019 kl. 14:43]

Þetta er fölsun á niðustöðum könnunarinnar. Það eru 2/5 sem lýsa sig andvíga orkupakkanum, og það er svo sannarlega enginn yfirgnæfandi meirihluti.

[Jón Valur Jensson, 22.6.2019 kl. 14:15]

Þorsteinn, rammhlutdrægur í orkupakkamálinu, heldur hér áfram skæruhernaði sínum gegn varnarmönnum landsins í þessari baráttu. Margítrekað hefur hann beitt sér í þágu Valhallar-forystunnar, þótt aldrei hafi komið fram nein skýr rök fyrir neins konar gagnsemi Íslands af þessum risavaxna pakka, hvað þá fyrir nauðsyn þessarar lagasetningar.

Hann fer líka með ósannindi í þessu innleggi sínu. Könnunin sýndi, að 26,2% aðspurðra eru mjög fylgjandi því, að Ísland verði undanþegið orkulöggjöf Evrópusambandsins, en einungis 10,7% mjög andvíg slíkri undanþágu. Þeir, sem voru fremur fylgjandi eða fremur andvígir því að fá undanþágu frá pakkanum, voru nánast jafnstórir hópar (15,4 og 15,5% respective).

Yfirgnæfandi er því andstaðan við orkupakkann hráan, en í svarhópinn "í meðallagi" hafa raðazt þeir, sem tóku ekki afstöðu eða voru þarna einhvers staðar á milli.

Ekki ber að horfa fram hjá því, að útbreiddustu fjölmiðlar, RÚV og Fréttablaðið, hafa beitt sér mjög í þágu orkupakkans, sá fyrrnefndi með sínum lymskulegu aðferðum, sem við þekkjum frá Icesave-báráttutímanum (og t.d. núna með því að ÞEGJA um þessa könnun), en sá síðarnefndi ekki hvað sízt með lágkúrulegum háðsárásum á Miðflokksmenn vegna meints "málþófs" þeirra, þótt raunar sé komið í ljós, að bæði ríkisstjórnin og þingforsetinn báru á því fulla ábyrgð, að málið var látið tefja þingstörfin með því að setja það efst á dagskrá hvers þingfundar vikum saman! (Já, svo miklu máli skipti þetta mál ráðherrana, þótt strax í upphafi hafi verið lagt upp með þá lygi, að þetta væri í raun mál sem litlu myndi breyta og sjálfsagt að hleypa því í gegn!!)