Ráðherra segir kostnaðarmat vegna ESB-umsóknar óraunhæft

Jón Bjarnason, sjávarútvegs- og landbúnaðarráðherra, segir kostnaðarmat utanríkisráðuneytisins vegna umsóknar um inngöngu í Evrópusambandið upp á 990 milljónir króna vera algjörlega óraunhæft. Sú upphæð eigi eftir að hækka verulega. Hann segir ótímabært að sækja um inngöngu nú, í það eigi ekki að eyða fjármunum og vinnu.

Sjá nánar á heimasíðu Heimssýnar www.heimssyn.is.

Hvað kostar að sækja um inngöngu í Evrópusambandið?

Utanríkisráðuneytið áætlar að umsókn um inngöngu í Evrópusambandið og viðræður í kjölfarið kunni að kosta skattgreiðendur allt að einn milljarð króna. Hæglega má gera ráð fyrir að þessi kostnaður gæti farið í mun hærri fjárhæðir ef miðað er reynsluna af áætluðum kostnaði vegna ýmissa annarra verkefna á vegum hins opinbera í gegnum tíðina. Þetta var m.a. rætt á Alþingi í dag og voru útreikningar ráðuneytisins harðlega gagnrýndir fyrir að byggja á óskhyggju. Miklir óvissuþættir væru í þeim og gæti kostnaðurinn því hæglega margfaldast.

Sjá nánar á heimasíðu Heimssýnar www.heimssyn.is. 

Þing ESB jafn valdamikið og ríki sambandsins

Fráfarandi forseti þings Evrópusambandsins, Hans Gert Pöttering, lét þess m.a. getið er hann lét af embætti 8. júlí sl. að þingið væri nú jafn valdamikið og ríki sambandsins. Hann hvatti við sama tækifæri eftirmann sinn til þess að berjast fyrir hagsmunum þingsins og lýsti ennfremur þeirri skoðun sinni að þingið ætti að beita sér fyrir því að auka enn völd sín gagnvart ríkjunum.

Sjá nánar á heimasíðu Heimssýnar www.heimssyn.is. 

Íslenskar auðlindir mikilvægar fyrir ESB

„Ég tel að frá sjónarhóli Evrópusambandsins sé það mjög áhugavert fyrir okkur að fá Ísland um borð. Þetta er mjög gömul menning og þeir búa við traustar lýðræðishefðir sem myndu styrkja norrænar hefðir um gegnsæi og góða stjórnsýslu. Og þeir eiga einnig náttúruauðlindir sem eru mikilvægar fyrir Evrópu eins og orku og fisk. Þannig að ég tel að það væri mjög gott fyrir okkur - og einnig fyrir þá - að verða hluti af Evrópusambandinu,“ sagði Eva Joly í viðtali við þýska fréttamiðilinn Deutsche Welle í dag.

Sjá nánar á heimasíðu Heimssýnar www.heimssyn.is.

Hvernig Írland hentar Evrópusambandinu?

Forsætisráðherra Írlands, Brian Cowen, lét þau orð falla nýverið í umræðum á írska þinginu að það væri tímabært að ræða það hvers konar Írland væri æskilegt í Evrópusambandinu í stað þess að ræða hvers konar Evrópusamband hentaði Írum best. Þetta eru fyrir margt athyglisvert ummæli og þá ekki síst frá sjónarhóli Íslendinga. Evrópusambandið verður aldrei klæðskerasaumað fyrir Ísland. Það liggur fyrir vikið þegar fyrir í öllum meginatriðum hvað innganga í sambandið hefði í för með sér fyrir hagsmuni Íslendinga.

Sjá nánar á heimasíðu Heimssýnar www.heimssyn.is.

Trúa Íslendingar á jólasveininn?!?

Lars Peder Brekk, landbúnaðarráðherra Noregs, segir að Íslendingar trúi greinilega á jólasveininn úr því þeir haldi að þeir geti fengið sérstakar undanþágur varðandi sjávarútvegsmál innan Evrópusambandsins. Þetta kemur fram á norska vefnum VG. „Íslandi mun ekki takast að fá samþykki Evrópusambandsins fyrir því að þeir fái sérstakar undanþágur í sjávarútvegsmálum. Það er eins og að trúa á jólasveininn,” segir Brekk í samtali við fréttastofuna ANB.

Sjá nánar á heimasíðu Heimssýnar www.heimssyn.is.

ESB reyndi að múta forsætisráðherra Króatíu

Króatía hefur sem kunnugt er sótt um inngöngu í Evrópusambandið en viðræður við landið hafa einkum strandað á landamæradeilum sem Króatar hafa átt í við Evrópusambandsríkið Slóveníu. Slóvenar hafa vegna þessara deilna staðið í vegi fyrir inngöngu Króatíu í sambandið. Króatíski forsætisráðherrann, Ivo Sanader, sagði af sér í dag m.a. vegna þessara deilna. Sanader upplýsti jafnframt af þessu tilefni að Evrópusambandið hefði boðið sér starf á sínum vegum með það fyrir augum að liðka fyrir lausn á deilunni við Slóvena en hann hafnaði því boði.

Sjá nánar á heimasíðu Heimssýnar www.heimssyn.is.

Evran hefði ekki hjálpað Dönum í efnahagskreppunni

Það hefði ekki hjálpað Dönum að vera með evrur í veskinu í stað danskra króna í yfirstandandi efnahagskreppu. Það er álit meirihluta 60 helstu hagfræðinga Danmerkur að því er danska viðskiptablaðið Börsen greinir frá. Börsen og fréttastofan Ritzau fengu svör 52 hagfræðinga við spurningunni. Um 60% voru þeirrar skoðunar að evran hefði ekki breytt ástandinu til batnaðar en 37% voru þeirrar skoðunar að evran hefði gagnast betur en krónar.

Sjá nánar á heimasíðu Heimssýnar www.heimssyn.is.

Ragnar Sær til starfa hjá Heimssýn

Ragnar Sær Ragnarsson hefur verið ráðinn til Heimssýnar til að hafa umsjón með daglegum rekstri samtakanna. Ragnar Sær var þar til nýlega framkvæmdastjóri hjá THG arkitektum en var þar áður framkvæmdastjóri sveitarfélagsins Bláskógabyggðar. Ragnar Sær er varaborgarfulltrúi í Reykjavík þar sem hann er búsettur og stundar meistaranám í opinberri stjórnsýslu og stjórnun við Háskóla Íslands. Ragnar er kvæntur Unni Ágústu Sigurjónsdóttur hjúkrunarfræðingi og eiga þau tvö börn. Heimssýn býður Ragnar velkominn til starfa.

Sjá nánar á heimasíðu Heimssýnar www.heimssyn.is.