Valþór í Athygli og hlutlausar ESB-upplýsingar

Athygli er almannatenglafyrirtæki sem fær 115 milljónir kr. frá Evrópusambandinu í kynningarstarf hér á landi. Fréttablaðið greindi frá samningi Athygli og spurði Valþór Hlöðversson hvers væri að vænta.

Valþór Hlöðversson, framkvæmdastjóri Athygli, er ánægður með að fá verkefnið og segir að skrifstofan verði væntanlega opnuð með haustinu. Hann þvertekur fyrir að þaðan verði rekinn áróður.
"Nei, öðru nær. Það er lögð mikil áhersla á það í útboðsgögnum að þarna sé verið að safna saman fagfólki sem er fært um að miðla óhlutdrægum upplýsingum um kosti og galla ESB og efna til samræðu við fólkið í landinu. Annars hefðu menn bara notað sendiskrifstofu ESB í þetta, ef þetta hefði átt að vera áróður," segir hann.

Þessi sami Valþór skrifaði leiðara í auglýsingablaðið Sóknarfæri sem kom út 24. mars í vor. Fyrirsögnin er ,,Við erum Evrópuþjóð." Leiðarinn er samfelld lofgjörð um Evrópusambandið og nauðsyn þess að Ísland verði aðili að sambandinu.

Valþór umgengst hlutlausar upplýsingar eins og sannur almannatengill.

ESB-umsóknina á að afturkalla, tillagan liggur fyrir

Meirihluti landsmanna vill draga tilbaka umsókn Íslands um aðild að Evrópusambandinu, samkvæmt könnun í júní. Í ágúst sýndi skoðanakönnun að 64,5 prósent landsmanna eru andvígir aðild að Evrópusambandinu.

Formaður Sjálfstæðisflokksins talar fyrir meirihluta þjóðarinnar þegar hann segist vilja slíta aðildarviðræðum við Evrópusambandið.

Á alþingi liggur fyrir tillaga Unnar Brár Konráðsdóttur um að afturkalla umsóknina. Væntanlega kemst tillagan á dagskrá þegar þing kemur saman í haust.

 

Vill slíta aðildarviðræðum

Ítalía bjargar evrunni

Niðurskurður á fjárlögum Ítala bjargar evrunni. Silvio Berlusconi forsætisráðherra ákvað að við svo búið mætti ekki standa me efnahagskerfi heillar heimsálfu í uppnámi og greip til aðgerða. Ítalir verða auðvitað skilvirkari framleiðendur, skilvísari skattgreiðendur og mæta niðurskurði velferðarþjónustu með skilningi - af því að Berlusconi segir það.

Í kjölfarið verður enginn hagvöxtur á Ítalíu en það er allt í lagi vegna þess að skuldir hverfa af sjálfu sér þegar maður er í Evrópusambandinu.

Berlusconi er nýjasta stjarnan á himni evrópskra stjórnmála. Með slíkan mann í brúnni þarf ekki að örvænta um framtíð Evrópusambandsins.

Forseti ESB fagnar niðurskurði á Ítalíu

Stór-Evrópa til bjargar evrunni; Ísland yrði í pakkanum

Evran mun ekki lifa af sem gjaldmiðill nema evru-ríkin 17 taki upp víðtækt samstarf á sviði ríkisfjármála, segir George Osborne fjármálaráðherra Bretlands. Hann þvertekur fyrir að Bretland verði þátttakandi í því samtarfi.

Til að bjarga evrunni verða þau þjóðríki sem hafa hana að lögeyri að framselja vald til fjárlagagerðar frá höfuðborgum 17 ríkja til Brussel. Þessi þróun er þegar hafin.

Umsókn Íslands um aðild að Evrópusambandinu felur í sér skuldbindingu að Ísland gangi að þeim breytingum sem verða á Evrópusambandinu á með aðlögunarferlið stendur yfir. Ísland þarf þess vegna að ganga í inn Stór-Evrópu nema að semja um undanþágu frá evru.

En evran er einmitt helsta röksemd aðildarsinna á Íslandi.

Gunnfáni getuleysisins

 Fyrrverandi þingkona Sjálfstæðisflokksins, sem virðist telja okkur betur borgið innan sambandsins, benti á að kreppan, sem dunið hefði yfir Íslendinga og leikið þá grátt, gæfi vísbendingar um að það væri þjóðinni hollt að hafa einhvern sem gætti okkar og liti yfir öxlina á okkur. Af þessu og ýmsu í svipuðum dúr, sem birst hefur opinberlega, er ljóst að nú á 68. aldursári lýðveldisins eru í gangi alvarlegar hugleiðingar um að Íslendingar hafi alls ekki til þess getu og burði að reka sjálfstætt ríki. Hér hefur sem sagt verið reistur gunnfáni getuleysisins. Málsmetandi menn hafa skipað sér undir hann.

Tilvitnuð orð eru úr pistli Tómasar Inga Olrich í Morgunblaðinu í dag. Tómas Ingi er fyrrverandi þingmaður og ráðherra. Undanfarnar vikur hefur hann skrifað reglulega um Evrópusambandið og umsókn Íslands.

Tilfinningaflokkur aðildarsinna

Jón Bjarnason sjávarútvegsráðherra mætir aðildarsinnum úr röðum stjórnarsinna með skilningi, einkum þeim tilfinningaverum sem blanda saman hvalveiðum og umsókn Íslands um aðild að Evrópusambandinu.

Jón er maður að meiri að hafa samúð með fólki eins og Árna Þór Sigurðssyni, Álfheiði Ingadóttur, Merði Árnasyni og Ólínu Þorvarðardóttur.

Í ljósi óheillavænlegrar stöðu vinstrimanna gæti verið kominn grunnur að nýjum stjórnmálaflokki. 

Tilfinningaflokkurinn, sem styður aðild að ESB og er á móti hvalveiðum, myndi áreiðanlega sópa til sín fylgi - úr kaffihúsum í Reykjavík 101.

(Tekið héðan.)

Gerir alvarlegar athugasemdir við framgöngu Marðar

Evran þarf skjól fyrir frjálsum markaði

Evrulandið, sem myndað er af 17 ESB-ríkjum er hafa evru að lögeyri, þolir ekki dagsljós hins frjálsa markaðar og leitar vars með banni á skortsölu. Bann Evrulands á skortsölu afhjúpar betur en flest annað eymdarlega stöðu evrunnar.

Bann á skortsölu er pólitísk viðurkenning Evrulands að dagar gjaldmiðlasamstarfsins eru senn á enda.

Evran er ein helsta röksemd aðildarsinna á Íslandi. Síðasta hálmstráið?

Ólík afstaða til skortsölu

Aðildarsinnar með leiksýningu um hvalveiðibann

Aðildarsinnar úr röðum stjórnarliða efndu til pólitískrar leiksýningar á sameiginlegum fundi þriggja þingnefnda í gær. Tilefnið er þrýstingur Evrópusambandsins á að Ísland styðji alþjóðlegt hvalveiðibann. Jón Bjarnason sjávarútvegsráðherra hefur haldið fram fullveldisrétti Íslands að ákveða hvort og hvernig hvalveiðar skuli stundaðar.

Árni Þór Sigurðsson, helsti stuðningsmaður Evrópusambandsaðildar innan þingflokks Vinstri grænna, hannaði leiksýninguna en Mörður Árnason skrifaði handritið.

Á meðan andstaða þjóðarinnar við aðild að Evrópusambandinu mælist 64,5 prósentog evru-samstarfið riðar til falls finnst íslenskum stjórnarliðum sæmandi að leggjast flatir fyrir kröfu Brusselvaldsins um hvalveiðibann.

Hörð gagnrýni á ráðherra

Aðlögunarferlið að ESB steytir á skeri þjóðarvilja

Þjóðin vill ekki aðild að Evrópusambandinu, síðasta mæling okkar í Heimssýn sýnir 64,5 prósent andstöðu og er það hækkun úr sambærilegri mælingu sem birt var í júní og sýndi 57 prósent andstöðu.

Eftir því sem þjóðin fær meiri upplýsingar um hvað Evrópubandalagið stendur fyrir og hvaða áhrif það hefur á fullveldi landsins að ganga til liðs við sambandið eykst andstaðan.

Umsóknin 16. júlí 2009 var misráðin og hvorki með stuðningi hjá þingi eða þjóð. Eini flokkurinn sem vildi aðild, Samfylkingin, fékk 29 prósent atkvæða í þingkosningum þá um vorið.

 

Vaxandi andstaða við aðild að ESB

Aðildarsinnar fá 115 milljónir í stuðning

Aðildarsinnar á Íslandi fá 115 milljónir króna í stuðning til að berjast fyrir því að Ísland verði aðili að Evrópusambandinu. Almannatengslaskrifstofan Athygli fær peningana frá Evrópusambandinu, samkvæmt Fréttablaðinu.

Til samanburðar ákvað alþingi að veita samtals 37 milljónum króna til umræðu félagasamtaka um kosti og galla aðildar. Þeim peningum á að skipta jafnt á milli aðildarsinna og fullveldissinna.

Aðildarsinnar á Íslandi eru vel fjármagnaðir.