Heimssýn fullveldis eða ESB-aðild

Ungir og aldnir kjósendur í forsetakosningunum standa frammi fyrir sömu spurningunni: hvort á að kjósa sér forseta sem styður að forræði íslenskra mála skuli áfram vera á Íslandi eða forseta sem talar fyrir aðild Íslands að Evrópusambandinu.

Aðeins tvö framboð eiga raunhæfa möguleika á sigri í forsetakosningunum, framboð sitjandi forseta, Ólafs Ragnars Grímssonar og framboð Þóru Arnórsdóttur.

Ólafur Ragnar styður fullveldið en Þóra er ESB-sinni til margra ára.

Fyrir fullveldissinna er valið einfalt.

Átta nýir árgangar kjósa forseta

Ein mynt, einn seðlabanki en ekkert fjármálaráðuneyti

Í evrulandi er ein mynt og einn seðlabanki en heil 17 fjármálaráðuneyti aðildarríkjanna sem mynda evru-samstarfið. Til að evran eigi sér einhverja framtíð þarf eitt fjármálaráðuneyti að standa á bakvið myntina.

Fjárlagabandalagið, sem samþykkt var í vetur, en nýr Frakklandsforseti vill ekki að taki gildi að óbreyttu, var skref í átt að einu fjármálaráðuneyti evru-ríkjanna 17.

Rifjum að eins upp hvað fjármálaráðuneyti gerir: ákveður skatta og hvernig ríkisfjármálum skuli háttað.

Eitt fjármálaráðuneyti fyrir evru-ríkin 17 þýðir bara eitt: Stór-Evrópa. Og þangað á Ísland nákvæmlega ekkert erindi.

Evrusvæðið var „mjög nálægt hruni“

Evru-skekkjan ekki leiðrétt með hagvexti

Suður-Evrópa tapaði samkeppnishæfni gagnvart Norður-Evrópu jafnt og þétt í rúman áratug - eða allar götur frá upptöku evrunnar. Ástæðan er sú að Suður-Evrópuríki notuðu evruna, sem þeir fengu á þýskum vöxtum, til að fjármagna eyðslu.

Norður-Evrópa, Þýskaland sérstaklega, skar niður kostnað í hagkerfinu þegar evran var tekin upp til að fyrirbyggja þenslu.

Suður-Evrópa þarf á bilinu 30-50 prósent gengisfellingu til að vinna tilbaka tapaða samkeppnishæfi. Enginn hagvöxtur leiðréttir ekki þessa skekkju.

Ekkert samkomulag án hagvaxtar

Þjóðríkin í uppreisn gegn ESB

Evran reyndist skrefinu of langt í samrunaþróun Evrópusambandsins, sem vel að merkja, var keyrð áfram af embættismönnum í Brussel en ekki þjóðarvilja aðildarríkjanna. Eftir að evran hætti að framleiða fölsk lífskjör handa fátækari hluta ESB tapaði hún vinsældum og sambandið komst í ónáð.

Grikkir gerðu uppreisn gegn Evrópusambandinu, Frakkar sömuleiðis og brátt kemur að Spánverjum og Portúgölum.

Þegar nýr utanríkisráðherra Frakklands segist vilja ,,öðruvísi" ESB þá getur hann aðeins átt við tvennt: nánari samruna ESB-ríkjanna eða að vinda ofan af samstarfinu, og þá einkum evrulandi.

Enginn pólitískur markaður er fyrir meiri samruna ESB-ríkja - leiðin liggur niður á við.

Fabius vill „öðruvísi“ Evrópu

Forskot að standa utan ESB, segir ráðherra

Guðbjartur Hannesson velferðarráðherra segir Ísland standa betur að vígi til að takast á við kreppuna en ríki Evrópusambandsins. Guðbjartur heggur í sama knérunn og Jóhanna Sigurðardóttir nýverið en hún sagði fátækt og eymd einkenna Evrópusambandið.

Hvað ætli Össur segi við þessum yfirlýsingum samfylkingarráðherranna?

 

Skapar forskot á leið út úr kreppunni

Sérást Samfylkingar á evru

Aðeins 12 prósent Svía vilja fórna sænsku krónunni og taka upp evru, sambærilegt hlutfall í Danmörku er 17 prósent, samkvæmt Smugunni.

Hagfræðingar verða æ vissari í sinni sök um að evrusamstarfið sé dauðadæmt: Paul Krugman gefur evrunni nokkra mánuði í viðbót.

Almennt er viðurkennt að íslenska krónan bjargaði okkur frá langtímakreppu sem blasir við á Írlandi, sem býr við evru og lenti í bankakreppu á sama tíma og Ísland.

Þrátt fyrir yfirþyrmandi rök gegn evru heldur Samfylkingin áfram að líta til evrulands sem áfangastaðar. Hvað veldur?

Evran áhrifamikil á Asíumörkuðum

Ráða Grikkir evrunni, eða evran Grikkjum?

Grikkir telja sér trú um að geta sett Þjóðverjum stólinn fyrir dyrnar: annað hvort fallist þið á að milda niðurskurðarkröfurnar og látið okkur fá fjárhagsaðstoð eða við förum gjaldþrotaleiðina og setjum þar með evru-svæðið allt í uppnám.

Samtímis vilja Grikkir fyrir hvern mun vera innan evrusvæðisins og hrýs hugur við að taka upp sjálfstæðan gjaldmiðil á ný.

Grikkir geta ekki bæði sleppt og haldið.

Enn er stjórnarkreppa í Grikklandi

Aþena, Brussel og lýðræðið

Grískir kjósendur eru ekki í kallfæri við raunverulega valdamenn Grikklands - þeir sitja í Brussel. Þegar Grikkir kjósa sér þing eru þeir í raun aðeins að velja sendimenn með bænaskár til Brussel. Evrópusambandið er ekki í þágu lýðræðis heldur skipulags.

Frá sjónarhóli Brussel er vandi Grikkja of lítið skipulag. Til að koma skikki á grísk ríkisfjármál verður að endurskipuleggj þau og það kunna Grikkir ekki, segja þeir í Brussel.

Skipulag án lýðræðis er aftur dálítið vandamál, sem Brussel kann aðeins eina lausn á: lýðræðið verður að víkja. 

Grikkir reyna enn stjórnarmyndun

Vinstri grænir með Svarta Pétur

Vinstri grænir gengu til kosninga með það loforð að halda Íslandi fyrir utan Evrópusambandið. Daginn eftir kosningar sveik VG stærsta kosningaloforðið og gekk ESB-umsókninni á hönd.

Vinstri grænir halda enn lífi í ESB-umsókninni þótt margstaðfest er að Íslendingar vilja ekki inn í Evrópusambandið. Aðlögunarferlið að ESB, sem Vinstri grænir standa að þrátt fyrir flokkssamþykkir um bann við aðlögun, sýnir hversu forhert lygamaskína forysta flokksins er orðin.

ESB-umsóknin klauf þingflokk VG og mun kljúfa fylgið frá flokknum við næstu kosningar.

Segir ESB-umsókina vera að drepa VG

Kreppukerfi ESB þvingað upp á Ísland

Evrópusambandið er í pólitískri kreppu vegna þess að evru-tilraunin er að fara út um þúfur. Hagkerfi 17 evru-ríkja eru of ólík, félagsgerð viðkomandi þjóð of sundurleit og sameiginleg stjórnmálamenning er ekki fyrir hendi.

Evrópusambandið er byggt upp eins og stórveld og sammerkt öllum stórveldum á öllum tímum er að viðurkenna ekki ósigur sinn. Í stað þess að vinda ofan af evrunni, t.d. með því að fækka þeim löndum sem eiga aðild að samstarfinu, mun valdakerfið í Brussel freista þess að handstýra evru-svæðinu með sífellt víðtækara regluverki.

Bjarni Benediktsson formaður Sjálfstæðisflokksins vekur athygli á þeim hættum sem blasa við Íslendingum stafar af kreppukerfi Evrópusambandsins. Hann þvertekur fyrir að stjórnarskránni verði breytt til að auðvelda yfirtöku ESB-reglna á íslensku þjóðlífi. Gott hjá Bjarna.

Merkel vill að Frakkar standi við gerða samninga