Þjóðin verður að fá að kjósa um þessa þvinguðu aðlögun að ESB

Það er verið að þvinga þjóðina inn í ESB. Um það fjallar Sigurbjörn Svavarsson, stjórnarmaður í Heimssýn, í grein sem birt er í Morgunblaðinu í dag.

Sigurbjörn segir í upphafi greinarinnar:

ESB ætlast til að Ísland hefji strax upptöku ESB-lagabálka svo að aðlöguninni verði örugglega lokið tímanlega fyrir inngöngu. Stjórnmálamenn eru að blekkja almenning.

Upphaf aðlögunar

Í frétt frá framkvæmdastjórn ESB 27. júlí 2010 um stækkun ESB með innlimun Íslands segir : 1)

– „Inngönguferlið í ESB hefur í för með sér að Ísland verður að fara í tímanlega og afkastamikla setningu ESB-lagabálka í heild sinni eins og þeir eru við inngönguferlið. Það er lykilatriði að búið sé að þróa afkastagetu stjórnkerfisins og dómstóla nægilega til þess að hægt sé að uppfylla skyldur sem fylgja aðild að ESB.“

– „ESB undirstrikar enn frekar að á meðan Ísland er á leiðinni inn í sambandið verður landið að halda áfram aðgerðum til þess að laga sín lög að lögum ESB og tryggja að þau verði að fullu komin í framkvæmd. Áríðandi er að raunverulegt átak verði gert til að svo verði, sérstaklega á sviði sjávarútvegs, landbúnaðar, byggðamála, umhverfismála, í frjálsu flæði fjármagns og fjármálaþjónustu til þess að mæta aðildarkröfum. Í þessu átaki mun ESB fylgjast vandlega með framgangi Íslands á öllum sviðum. Regluleg endurskoðun á framgangi umsóknlands að aðild mun nú taka til Íslands eins og annarra.“ –

Í lokin segir Sigurbjörn:

Blekkingaleikur stjórnmálamanna

Umræða um að þjóðin fái að kjósa um aðildarsamning er því blekking ef búið er að innleiða allan lagabálk ESB í íslenskt lagasafn áður en slík kosning á sér stað. Hvað ætla stjórnvöld að gera ef þjóðin segir nei? Ætla þau að vinda ofan af öllum lögunum sem breytt var? Það er aðeins eitt sem kemur í veg fyrir slíka ólýðræðislega lagasetningu sem þessi þvingaða aðlögun krefst, það er að þjóðin fái að kjósa um hvort hún vilji ganga í ESB eða ekki, áður en lengra er haldið. Stjórnmálamenn sem hlynntir eru inngöngu í ESB hafa blekkt almenning vísvitandi allan þennan tíma um „hvað sé í pakkanum“ og spyrja má, hvers vegna? Núna reyna stjórnvöld að koma á breytingum á fullveldisákvæðinu í stjórnarskránni til að geta haldið áfram þessari aðlögun sem alls ekki fólst í samþykkt Alþingis um að hefja viðræður. Ætlar stjórnarandstaðan að taka þátt í þessum blekkingarleik og breyta fullveldisákvæði stjórnarskrárinnar?

Sjá nánar:

1) http://www.eu-un.europa.eu/articles/en/article_9992_en.htm

2) http://europa.eu/rapid/press-release_MEMO-12-767_en.htm?locale=en

Forsetinn vekur heimsathygli

Þórhallur Heimisson fjallar um Icesave og ESB

Þórhallur Heimisson sóknarprestur fjallar um sigurinn í Icesave-málinu og tengslin við ESB-málið í pistli á Pressunni í dag.

Hann segir til að byrja með:

Sigur Íslands í deilunni við Breta, Hollendinga og Efnahagsbandalagið um Icesave- reikningana, minnir okkur á hversu litlu getur oft munað að við glötum frelsi okkar og fullveldi. Í þessu tilviki var það einn maður sem stòð á mòti kröfunni um fullveldisafsal, forsetinn, og gaf þannig þjòðinni tækifæri til að rísa gegn misvitrum stjòrnmálamönnum og erlendu valdi. Því ef Icesave- samningarnir hefðu verið keyrðir í gegn, hefðum við glatað fjárhagslegu fullveldi.

Og í lokin segir Þórhallur: 

Margir virðast enn trúa því að eina leiðin úr ógöngum liðins áratugar sé að fela fjöreggið erlendu valdi í hendur eins og forðum daga. Það er án efa rétt að fjöreggið verður vel geymt í Brussel, London, París eða Berlín. Þaðan verður ekki auðvelt að ná því aftur, þó einhverjir láti sér detta það í hug í framtíðinni uppi á Íslandi. Með fjöregginu mun lífskrafturinn enn á ný hverfa frá landinu. Með því mun hverfa íslensk bændastétt sem þó var ákölluð sem eina von landsins þegar Evrópubúar beittu okkur hryðjuverkalögum vegna þess að við vildum ekki samþykkja Icesave-vöndinn. Með því munu fiskimiðin komast í hendur Breta og Spánverja á ný. Þeirra sem nú vilja beita okkur efnahagsþvingunum sumir. Örugglega gerist það ekki strax. En hægt og bítandi rétt eins og forðum daga.

Það tók 400 ár síðast. Evrópa hefur nægan tíma.

Og eitt eða tvö atkvæði okkar á Evrópuþinginu sem telur 732 þingmenn mun verða hjáróma og broslegt. Ef einhver þá lætur svo lítið að taka eftir því.
 
 
             

Við borgum milljarða króna aðlögunar- og áróðursstyrki úr eigin vasa!

Svona virkar ESB-aðlögunar- og áróðursmaskínan. Milljarðar króna eru settir í styrki til útvalinna verkefna sem henta fyrst og fremst ESB-bákninu, samkvæmt svarinu sem Vigdís Hauksdóttir fékk frá fjármálaráðherra.

Það er merkilegt að stór hluti af þessum styrkjum er sóttur í vasa íslenskra skattgreiðenda, þótt meirihlutinn sé kominn úr sjóðum ESB.

Skyldi einhver styrkur vera veittur til þess að skoða hvaða áhrif svona fjármunir hafa á afstöðu þeirra til ESB sem þessara styrkja njóta?

Skoski sjávarútvegsráðherrann sagði að 500 milljónir Evrópubúa ættu nú að fara létt með að aga 300 þúsund Íslendinga til hlýðni í makrílmálinu.

Skyldu ESB-skrifræðispostularnir hugsa eitthvað svipað varðandi styrkja- og útgjaldamálin?

Rúmlega 2,4 milljarðar í mótframlag

Við erum meira en þúsundfalt fleiri en þessir Íslendingar - við hljótum að geta unnið þá!

500 milljóna Evrópusamband hlýtur að geta komið böndum á 300 þúsund manna þjóð, segir sjávarútvegsráðherra Skota, sem krefst þess að Evrópusambandið beiti efnahagslegum refsiaðgerðum gegn Íslendingum og Færeyingum vegna makrílveiða. Þetta kemur fram á Eyjunni:

Skoski sjávarútvegsráðherrann, Richard Lochhead, segir makríldeiluna ekki geta staðið lengur, að hans mati sé fiskistofninn í hættu vegna ofveiði Íslendinga og Færeyinga. Hann mælir með því að Evrópusambandið, í krafti stærðar sinnar, beiti eyþjóðirnar tvær í norðurhöfum refsiaðgerðum.

Magnús Orri Schram er auðmjúkur í meðfylgjandi frétt Morgunblaðsins. En sú spurning vaknar hvort hann og hans félagar hafi hræðst sjónarmið á borð við þau sem skoski ráðherrann viðhefur í áðurnefndri frétt. Batnandi mönnum er þó best að lifa.

Magnús Orri segir:

„Ég var í hópi þeirra sem vildu reyna að ná samningum um málið – taldi dómstólaleiðina áhættusama ... Ábyrgt stjórnvald þurfti að leita samninga – tel ég. En ég vil taka hatt minn ofan fyrir þeim sem voru á öndverðum meiði og óska þeim til hamingju. Grasrótarsamtökum, forsetanum, málsvarnarteyminu og öðrum. Þetta var frábær niðurstaða og margir geta verið stoltir af sínu framlagi.

Vill aukna samvinnu við ákvarðanatöku

Sumir sleppa sér algjörlega í gleði yfir Icesave-úrskurði

Úrskurðurinn í Icesave-málinu er ein stærsta og jákvæðasta efnahagsfréttin sem heyrst hefur á Íslandi frá því fyrir bankahrunið haustið 2008.

Þessi úrskurður eykur líkur á bættu lánshæfismati íslenska ríkisins og lægri vaxtakostnaði, eykur líkur á styrkari hagvexti og hraðari losun gjaldeyrishafta.

Úrskurðurinn merkir að skuldaklafi okkar verður minni og framtíðin bjartari fyrir þau sem erfa landið.

Jóhanna Sigurðardóttir, forsætisráðherra, sagði í gær að allir ættu að fagna þessari niðurstöðu.

Það er rétt að taka undir með henni og sjálfsagt að fyrirgefa henni þótt hún hafi misst sig aðeins og tekið talsvert gleðihopp að fjölmiðlum viðstöddum.

Við getum líka fyrirgefið Jóhannesi Þór Skúlasyni fyrir að hafa hoppað af gleði á fréttastofu Útvarps svo innanstokksmunir færðust úr stað.

En er ástæða til þess að fyrirgefa þeim sem framast og fimlegast gengu fram í því að hengja skuldasnöruna um háls Íslendinga, aðallega til að þjóna þeim löngunum sínum að keyra Ísland inn í Evrópusambandið?

Moody's segir dóminn jákvæðan

Þetta eru sökudólgarnir og hér eru hetjurnar

Nú eru menn óneitanlega dregnir í dilka þegar niðurstaða í Icesave-málinu liggur fyrir með fullnaðarsigri Íslendinga.

Mörg og stór orð hafa verið látin falla um málefni og menn á þessari vegferð.

Sjálfsagt gerðu flestir sitt besta í góðri trú.

Það er hins vegar ljóst að heiður þeirra er mestur sem alltaf höfðu óbilandi trú á rétti Íslendinga í málinu, þeir sem lögðu á sig ómælt erfiði til að halda fram málstað Íslendinga og þeir sem hrifu þjóðina með sér til stuðnings þessu sjónarmiði.

Skömm þeirra er hins vegar mest sem hrópuðu hæst um hrikalegar afleiðingar af því fyrir Íslendinga ef kröfur Breta og Hollendinga yrðu ekki samþykktar. Allra mest er þó skömm þeirra sem í raun gerðust handbendi ESB, hagsmuna Breta og Hollendinga og þeirra erlendu afla sem vildu þvinga Íslendinga til að taka á sig byrðar sem þeim ekki bar.

Mikil er niðurlæging þeirra úr þessum hópi sem skreyttu sig með fínum titlum sem áttu að gefa orðum þeirra um þjónkun við ESB aukið vægi og meiri tiltrú. 

Svíar streitast á móti miðstýringartilburðum Merkel

Fredrik Reinfeldt forsætisráðherra Svíþjóðar sættir sig ekki við nýjar tillögur Angelu Merkel Þýskalandskanslara um sérstakan samkeppnissáttmála og aukið valdaframsal til Brussel.

Merkel lagði fram tillögu um þessi atriði á ráðstefnunni í Davos í Sviss í síðustu viku, eftir því sem sænski vefmiðillinn Europaportalen skýrir frá.

Það er komið nóg af því að Brussel sé að segja okkur hvað við eigum að gera, segir Reinfeldt við fjölmiðla af þessu tilefni.

Tillögur Merkel gerðu ráð fyir að Brussel gæti fyrirskipað aðildarlöndum að breyta fyrirkomulagi launamála, rannsókna, samgöngu- og samskiptamála og opinberri stjórnsýslu.

Við látum ekki segja okkur fyrir verkum í þessum efnum, segir Reinfeldt.

En það er greinilegt að miðstýringartilhneigingin heldur áfram í ESB og að Brussel reynir að soga til sín meiri og meiri völd.

ESB og ESB-sinnar fengu nú duglega á baukinn

Í dag fengu þeir duglega á baukinn sem predikuðu að við yrðum að lúta vilja Breta og Hollendinga og þar með ESB-bákninu í Icesave-málinu.

Þeir sem sögðu að Íslendingar myndu segja sig úr siðaðra manna samfélagi ef þeir samþykktu ekki hvern Icesave-samninginn á fætur öðrum hafa reynst vera lafhræddir aftaníossar ESB-veldisins.

Það var þetta ESB-veldi sem tafði framgang mála Íslands hjá Alþjóðagjaldeyrissjóðnum sem varð til þess að björgunaraðgerðir hér á landi eftir hrunið hófust mun seinna en annars hefði orðið. Þetta hefur valdið ómældum kostnaði.

Þeir fræðingar og forystumenn sem töluðu um að Ísland yrði „Kúba norðursins“ eða að hér myndi allt hrynja og hrikalegt atvinnuleysi herja á landsmenn - þessir menn eru aðhlátursefni í dag.

Þökk sé hinum sem fylgdu fordæmi Jóns forseta og viku hvergi heldur börðust allt til enda.

Tekið undir nær öll rök Íslands

Réttlætinu er fullnægt!

Það braust út fögnuður víða hér á landi í morgun þegar fréttir bárust af niðurstöðu EFTA-dómstólsins sem sýknaði Íslendinga af kröfum ESB, þvert á álit ýmissa svokallaðra ESB-sérfræðinga.

Réttlætinu er fullnægt, segir Björk Guðmundsdóttir tónlistarkona í meðfylgjandi frétt. Við getum, hygg ég, flest tekið undir það.

Okkur fannst fæstum réttlátt að skattborgarar yrðu gerðir ábyrgir fyrir bankaskuldum. Ýmsum okkar leið jafnvel ónotalega yfir óvissunni sem þessu máli fylgdi. Þeim mun meiri er ánægjan nú þegar óvissunni hefur verið bægt burt. Þetta var fullnaðarsigur. Nú eru bjartari tímar framundan. Nýtum þá tíma vel. En það er sjálfsagt að hugsa hlýlega til þeirra sem stóðu í fylkingarbrjósti í þessari erfiðu baráttu.

Björk: Stundum er réttlætinu fullnægt

Fullnaðarsigur Íslendinga í Icesave-málinu

Fyrstu fréttir benda til að Ísland hafi unnið fullnaðarsigur fyrir EFTA-dómstólnum sem hafi hafnað öllum kröfum Eftirlitsstofnunar EFTA (ESA) í Icesave-málinu.

Þá vekur það einnig sérstaka athygli að ESA og Evrópusambandinu verði gert að greiða málskostnað.

Þetta sýnir að málatilbúnaður ESB gegn Íslandi var byggður á sandi.

Jafnframt sýnir þetta að framganga ríkisstjórnarinnar í málinu framan af var vægast sagt ákaflega veik og niðurstaðan hefði orðið allt önnur og verri ef stórir hópar landsmanna hefðu ekki risið upp og mótmælt áætlunum ríkisstjórnar.

En það er svo sem við hæfi að óska ríkisstjórninni og landsmönnum öllum til hamingju með niðurstöðuna.

Sjá hér hlekki á nokkrar fréttir:

Frosti Sigurjónsson ætlar að gera sér glaðan dag:  http://www.mbl.is/frettir/innlent/2013/01/28/allir_geri_ser_gladan_dag/

Maður dagsins:
http://www.pressan.is/Kaffistofan/Lesakaffistofu/madur-dagsins

 

Ísland vann Icesave-málið