Þriðjungur Grikkja atvinnulaus og eignir lækka í verði í evrulöndum

Í fyrirheitna landi Samfylkingarinnar vex atvinnuleysi stöðugt og eignaverð lækkar. Það er stöðugleikinn sem Samfykingin og Björt framtíð vilja bjóða Íslendingum.

Atvinnuleysið í Grikklandi er farið að nálgast 30%, er 27,2 en var 21,5 fyrir ári.  Fasteignaverð á Spáni og Slóveníu hefur lækkað um 9-13%.

Ástandið er ekki gott í þessum evrulöndum og fer versnandi.

 

27% atvinnuleysi í Grikklandi

Vandinn á Kýpur mun meiri en áður var talið

Það eru greinilega ekki öll kurl komin til grafar á evrusvæðinu. Samkvæmt meðfylgjandi frétt Morgunblaðsins þurfa kýpversk stjórnvöld að leggja til um þrjátíu prósentum meira en áður var talið. Ástandið er því mun alvarlegra en áður var talið.

Um leið og vandinn dýpkar á Kýpur breiðist hann út á evrusvæðinu. Lagarde forstjóri AGS og Olli Rehn efnahagsmálastjóri ESB beina alvarlegum tilmælum til Spánar og Slóveníu um að þau taki til í opinberum fjármálum og bankamálum.

Fréttir frá Frakklandi eru einnig fremur daprar. Lítill sem enginn hagvöxtur, vaxandi atvinnuleysi og ríkisfjármálavandi.

Á sama tíma vill Gylfi Arnbjörnsson forseti ASÍ að Íslendingar taki upp evru sem gæti haft í för með sér sams konar atvinnuleysi og á Spáni og Grikklandi. Á sama tíma lítur öll Evrópa til þess hvernig Ísland hefur leyst sín mál eftir kreppuna - og í sjálfri framvinduskýrslu ESB um Ísland kemur fram að það hafi verið Íslendingum til góða að hafa eigin gjaldmiðil eftir bankakreppuna.

5,5 milljarða evra munur

Framvinduskýrsla ESB um Ísland viðurkennir ágæti sjálfstæðs gjaldmiðils

Framvinduskýrsla ESB um aðildarviðræður viðurkennir með opnum hætti að það hafi komið Íslendingum til góða í yfirstandandi kreppu að vera með eigin gjaldmiðil.

Í skýrslunni segir í lauslegri þýðingu að á heildina litið sé Ísland enn að hafa hag af styrkri verð-samkeppnisstöðu gagnvart viðskiptakeppinautum sínum og að það séu afleiðingar af gengisbreytingum krónunnar í yfirstandandi kreppu.

Á ensku hljóðar þetta svo: „Overall, Iceland still benefits from strong price competitiveness vis-á-vis its main trading partners as a result of the marked depreciation of the króna during the crisis."

Það er ljóst að mörg ríki á suðurjaðri evrusvæðisins öfunda okkur af þessari stöðu.

Hvernig Íslandi verður komið inn í ESB þótt Íslendingar vilji vera fyrir utan

Umsóknin að ESB og aðlögunarferlið gerir það að verkum að það er hægt að koma Íslandi inn í Evrópusambandið þótt Íslendingar vilji alla jafna vera fyrir utan það. Það þarf bara að bíða nógu lengi og finna þann eina tímapunkt sem mögulegt getur verið að ná fram meirihlutavilja - svona líkt og sænska ríkisstjórnin gerði til að koma Svíum inn í ESB.

Atli Harðarson, heimspekingur og skólameistari, skrifar athyglisverða grein sem birt er í Morgunblaðinu í dag. Greinin ber heitið Hvernig er hægt að komast í Evrópusambandið þótt flestir vilji vera fyrir utan það?

Þar segir Atli í upphafi:

„Í augum þeirra sem standa að umsókn Íslands um inngöngu Evrópusambandið kann andstaða við aðild að sýnast vandamál. Almennt er gert ráð fyrir að á einhverju stigi verði þjóðaratkvæðagreiðsla og það kann að virðast erfitt að koma málinu í gegn ef flestir eru á móti. Þetta vandamál er þó alls ekki eins stórt og virðast kann. Ef réttum aðferðum er beitt er hægt að komast inn þótt fylgi við það sé nær öllum stundum vel innan við helming.
En hverjar eru þessar réttu aðferðir?“

Stuttu síðar segir Atli:

„Þetta síðara, að umsóknin geti staðið opin í ótiltekinn tíma, virðist næstum í höfn. Samt þarf áfram að passa að enginn geti knúið á um að málið verði klárað og þannig eyðilagt allt saman. Það er ágætt að láta við og við í veðri vaka að það sé verið að opna einhverja kafla eða kíkja í einhverja pakka eða semja um eitthvað – en umfram allt ekki gera neitt sem getur orðið til þess að það verði rokið í þjóðaratkvæðagreiðslu um aðild á kolvitlausum tíma. Málið er að láta fullgilda umsókn standa opna. Svo er bara að bíða.“

Og undir lokin segir hann:

„Á næstu áratugum koma vísast kollsteypur, alls konar hryðjuverk, ógnir og skelfingar, kannski stríð úti í heimi, nýjar kreppur – eitthvað sem hristir vel upp í fólki svo almenningsálit sveiflast til í nokkrar vikur, jafnvel mánuði. Ef umsóknin stendur munu á endanum atburðir verða sem valda því að fylgi við aðild sveiflast aðeins yfir 50% í dálitla stund og þá skiptir öllu að hægt sé að vinna hratt. Þegar þar að kemur má sem best láta svo heita að búið sé að opna alla kaflana og kíkja í alla pakkana en það skiptir ekki öllu máli. Bara að kýla á fjandans þjóðaratkvæðagreiðsluna og málinu er reddað.“

Þessi grein Atla er skyldulesning fyrir alla áhugamenn um Evrópusambandið - og líka hina sem hafa ekki áhuga á því!

Yfirmaður AGS segir að loka verði evrubönkum

Christine Lagarde, yfirmaður Alþjóðagjaldeyrissjóðsins, hvetur yfirvöld í Evrópu til þess að flýta endurbótum á bankakerfinu, og þar með að loka bönkum reynist það nauðsynlegt.

Þetta kemur fram í EUbusiness. 

Þrátt fyrir allar aðgerðir sem gripið hefur verið til í ESB hefur greinilega ekki verið nóg að gert að mati yfirmanns AGS.

Djísis kræst - hvar endar þetta?

Ekki skánar þetta í ESB. Nú er það Slóvenía og Spánn sem fá alvarlegt tiltal frá framkvæmdastjórn ESB.

Tiltalið frá framkvæmdastjórninni er orðið þekkt: Of miklar og illviðráðanlegar opinberar skuldir, of hæg efnahagsstarfsemi, hæpinn bankarekstur, of lítil tekjumyndun í hagkerfinu, of mikið atvinnuleysi.

Erfiðleikar Slóveníu og Spánar eru ógn við fjármálastöðugleika, eftir því sem fram kemur í EUbusiness.

Þetta er allt orðið kunnuglegt.

Varar við efnahag Spánar og Slóveníu

Pólitískt landslag færist frá ESB, evru og Schengen

Þessi frétt frá Noregi er aðeins enn ein vísbending um að hið pólitíska landslag í álfunni er að hreyfast í átt frá ESB, evru og Schengen.

Æ fleiri efast um ágæti evrunnar og efnahagssamstarfs ESB, en vegna þess hefur efnahagskreppan á svæðinu dregist á langinn.

Það er enginn áhugi fyrir ESB-aðild í Noregi, enginn áhugi fyrir evru í Svíþjóð og lítill áhugi í öðrum löndum, eins og Póllandi, sem þó eiga samkvæmt samningum við ESB að taka evru upp.

Norski miðflokkurinn vill nú að Normenn fari út af Shengen og sú umræða hefur einnig heyrst að Norðmenn eigi að losa sig við EES-samninginn og gera í staðinn tvíhliða samninga við ESB.

Hér á landi hjálpaði varaformaður Samfylkingarinnar í sjónvarpsumræðunum í gær landsmönnum að átta sig á því að Evrópustefna flokksins er að miklu leyti byggð á sandi.

Miðflokkurinn vill Noreg úr Schengen

Frakkar orðnir þreyttir á efnahagsleiðsögn Þjóðverja

Frakkar eru uggandi yfir sínum hag. Þeir eru vart búnir að jafna sig á því að ráðherra þeirra þurfti að hætta með skottið á milli lappanna, er upp komst að hann treysti fjármunum sínum betur á frankareikningum í Sviss en á evrureikningum í Frakklandi, þegar í ljós kemur að efnahagsmálin eru enn í frosti í Frans ....

Þessu er meðal annars lýst hér á vef Financial Times í dag.

Þrátt fyrir að Frakkar hafi að sumu leyti staðist þjóða best skilyrði evrusamstarfsins um verðbólguþróun hafa þeir átt í ströggli með framleiðslugeirann og hagvöxtur verið lítill eða enginn með þeim afleiðingum að atvinnuleysi bara eykst.

Eftirspurn og neysla duga ekki til að efla franskan hag, og útflutningur tekur vart við sér í samanburði við samkeppnislönd. Kaupmáttur dregst saman, ekki síst vegna skattahækkana sem eru komnar til vegna þeirra hugmynda sem liggja til grundvallar efnahagsstjórn í ESB og flestum ríkjum sambandsins. Það eru ekki hvað síst Þjóðverjar sem taldir eru keyra áfram þessar hugmyndir um sparnað og skatta. Fyrir vikið ná hjól atvinnulífs ekki að snúast á nægum hraða í Evrópu.

Ýmsir spá því að þess sé ekki langt að bíða að upp úr sjóði á milli Þjóðverja og Frakka sem eru orðnir langþreyttir á því að lúta forsögn Angelu Merkel og annarra Þjóðverja í efnahagsmálum.

Slóvenía næsta evruríkið sem þarfnast aðstoðar

Þeim fjölgar stöðugt evruríkjunum sem eru í vandræðum. Nú fjalla fjölmiðlar um að ástand bankamála í Slóveníu sé orðið þannig að ríkið verði að leita sér aðstoðar ef ekki á illa að fara.

Þannig greinir vefritið EUbusiness frá því að alþjóðlegu fjármálasamtökin Institute for International Finance segi að yfirvöld í ESB-löndunum verði að grípa til varúðarráðstafana til að koma í veg fyrir meiriháttar erfiðleika í Slóveníu. Samtökin virðast ekki hafa trú á því að Slóvenum takist sjálfum að koma sér út úr þeim vanda sem við blasir bæði í ríkisfjármálum og bankamálum.

Alenka Bratusek forsætisráðherra Slóveníu segist vera að vinna í málinu dag og nótt, meðal annars með viðræðum við forystumenn í ESB á borð Jose Manuel Barroso.

Financial Times fjallar einnig um þetta mál í dag.

Varaformaður Samfylkingar út af sporinu í evrumálunum

Það vakti athygli í kosningaþætti sjónvarpsins í kvöld hversu óöruggur varaformaður Samfylkingarinnar var í umræðunum um ESB og evru. Þáttastjórnendur slógu fimlega úr höndum varaformannsins rökin um að velsæld, stöðugleiki og öryggi fylgdi evrunni  og vísuðu þáttastjórnendur þar til evrulanda í vanda.

Varaformaðurinn sagði að Samfylkingin væri með evruna á heilanum af því að flokkurinn væri með lífskjör fólks á heilanum. Þegar þessi orð voru sögð var greinilegt að flestir aðrir en Katrín Júlíusdóttir, varaformaður Samfylkingar, væru með lífskjör í vandaþyngdum evrulöndum í huga, enda bætti varaformaðurinn vandræðalega við að menn væru jafnvel að sjá ríki í ESB sem gengu vel og ef menn ynnu rétt að með evruna kæmist á stöðugleiki!!

En varaformaðurinn kórónaði  fyrst sjálfan sig þegar hann sagði: Þegar við erum komin af stað í þann leiðangur að sækja um aðild þá verður allt betra.

Bíðið nú við: Var þetta ekki sagt áður en umsóknin var send? Þá sagði Samfylkingin að um leið og tekin yrði ákvörðun um að senda inn umsókn um aðild að ESB myndi stöðugleiki, öryggi og velsæld komast hér á!