Af hverju er ráðherrann að ítreka að Kýpur muni ekki yfirgefa evrusamstarfið?

Það er merkilegt að fjármálaráðherra Kýpur skuli þurfa að ítreka æ ofan í æ að landið sé ekki á leiðinni að yfirgefa evrusamstarfið. Ástæðan er sú að sú krafa og þau sjónarmið eru lífseig að best væri fyrir landið að hætta að nota evruna og taka upp eigin mynt.

Kýpverjar eru margir hverjir öskuillir yfir því hvernig ESB og Seðlabanki Evrópu tóku á þeirra málum. Ráðherrann þarf greinilega að hafa sig allan við til að verjast þeim sem vilja segja skilið við evruna.

Myndi færa Kýpur aftur um aldir

Vantreysta þeir evrureikningunum?

Meðfylgjandi frétt Morgunblaðsins bendir til þess að annað hvort þyki Frökkum eðlilegt að fela evrurnar sínar á frankareikningum í Sviss, eða að þeir trúi flestu illu upp á stjórnmálamenn.

Hvort tveggja er náttúrulega slæmt. Hins vegar er viðbúið að aðgerðir ESB gegn sparifjáreigendum á Kýpur vekji upp spurningar og vangaveltur meðal fólks í öðrum evrulöndum um mögulega meðferð opinberra aðila á sparifénu.

Neitar ásökunum um leynireikninga

Kröfur ESB gegn Portúgal utan laga og réttar

Nú er komið í ljós að kröfur ESB gegn Portúgölum standast ekki lög eins og fram kemur í meðfylgjandi frétt Morgunblaðsins. Dómstóll hafnaði því að bætur avinnulausra, sjúkra og aldraðra yrðu skertar frekar.

Forsætisráðherra Portúgals, Pedro Passos Coelho, segir að staða Portúgals sé mun viðkvæmari nú en nokkru sinni áður. Erfitt verði að mæta kröfum ESB nú.

Boða stóraukinn niðurskurð í Portúgal

Kýpur orðið að Kúbu Evrópu

Lýsing Gylfa Magnússonar dósents og fyrrverandi ráðherra á ástandinu á Kýpur í vefritinu EUobserver leiðir hugann að ummælum hans um Kúbu norðursins. Gylfi lýsir fálmkenndum viðbrögðum ESB við ástandinu á Kýpur og segir gjaldeyrishöftin þar mun skaðlegri en þau sem sett voru hér á landi.

Í vefritinu er einnig talað við Þorfinn Ómarsson, sem segir sjálfstæðan gjaldmiðil hafa hjálpað okkur á sársaukaminni hátt út úr bankakreppunni en ef við hefðum verið með evru.

(Reyndar vekur fullyrðing vefritsins um að gengið hafi lækkað um 100% upp ýmsar spurningar - en svona hugsanavilla hefur reyndar sést áður á virðulegum stöðum ....)

Könnun: Lítill áhugi á aðalmáli Samfylkingarinnar

Hér til hliðar er hægt að taka þátt í laufléttri skoðanakönnun um það hvaða mál eru talin mikilvægust fyrir komandi kosningar.

Fáeinum klukkustundum eftir að þessi könnun var útbúin var birt frétt um vandaða skoðanakönnun Félagsvísindastofnunar um mikilvægustu kosningamálin í huga kjósenda. Þannig var nú púðrið aðeins bleytt í okkar litla könnunarleik (þótt enn sé hægt að taka þátt!), en niðurstaða Félagsvísindastofnunar vekur talsverða athygli.

Í könnuninni kemur fram að skuldamálin eru mikilvægustu kosningamálin í huga kjósenda. Þrír fjórðuhlutar kjósenda telja skuldamálin eitt af mikilvægustu málunum. Hins vegar telur aðeins fimmtungur kjósenda Evrópumálin vera eitt af þremur mikilvægustu kosningamálum.

Þetta þótti félagsvísindamanninum Rúnari Vilhjálmssyni ein merkilegasta niðurstaðan. Núverandi forysta Samfylkingarinnar telur Evrópumálin mikilvægasta kosningamálið og núverandi ríkisstjórn hefur einnig lagt mikla áherslu á þennan málaflokk.

Kjósendur eru bara ekki sammála því að Evrópumálin séu þau mál sem mikilvægast er að vinna í .

Samfylkingin, ríkisstjórnin - og Björt framtíð - eru því ekki í takt við kjósendur í landinu.

Skuldamál heimilanna mikilvægust

Staðan á Íslandi er mun betri en á Írlandi

Staðan í efnahagsmálunum á Íslandi er mun betri en á Írlandi. Það var niðurstaðan í máli Stephens Kinsella, írsks hagfræðings, í Silfri Egils í dag. Íslendingar eru að komast út úr kreppunni á meðan Írar eru í henni miðri, nú fjórum árum eftir að bankakreppan hófst.

Fram kom í þættinum að um helmingur húseigenda á Írlandi væri með neikvæða eiginfjárstöðu. Atvinnuleysi er mjög mikið, eða 15% og um 200 þúsund manns hafa verið án atvinnu í meira en ár. Írska ríkið glímir nú við skuldir bankakerfisins sem það tók á sig og nemur fjárhæðin um tíu þúsund milljörðum íslenskra króna, sem ætlunin er að velta yfir á herðar skattgreiðenda. Kinsella sagði að þessi leið sem ESB þvingaði Íra til að fara í bankamálunum væri dýrustu mistökin sem gerð hefðu verið þar í landi.

Þá var það athyglisvert sem fram kom í viðtalinu að efasemdir um ágæti evrunnar og ESB hafa aukist á Írlandi þótt þeir telji sig ekki geta gert annað sem stendur en að halda áfram á sömu braut. Það kom fram hjá viðmælandanum það væri almennt mat fólks á Írlandi að ESB væri ekki að hjálpa Írum núna.

Þá nefndi hagfræðingurinn að staðan hér á landi væri mun betri meðal annars vegna þess að Íslendingar hefðu sjálfstæðan gjaldmiðil. Þess vegna væru Íslendingar að komast út úr kreppunni en Írar væru enn í henni miðri.

Það er því miklu meiri munur á Íslandi og Írlandi en einn bókstafur og sex mánuðir eins og einhver spaugari sagði árið 2008.

Evrópustofa á gráu svæði

Það þarf greinilega að skoða gaumgæfilega hvort starfsemi Evrópustofu hér á landi samræmist íslenskum lögum og alþjóðasamningum. Þetta kom fram í viðtali við Sigmund Davíð Gunnlaugsson í þættinum Á sprengisandi í morgun.

Rætt var um ályktun frá flokksþingi Framsóknarflokksins nýverið, en þar segir að Framsóknarflokkurinn telji fulla ástæðu til að setja án tafar lög sem fyrirbyggja að erlend stjórnvöld eða erlendir aðilar geti stundað eða fjármagnað pólitískan áróður hér á landi. Ljóst megi vera að ef íslenskir stjórnmálaflokkar búi við takmörkuð fjárráð en erlendir aðilar megi dæla hingað ótakmörkuðum fjárhæðum til að vinna sjónarmiðum sínum fylgi þá sé lýðræðinu í landinu hætta búin.

Í viðtalinu var ekki annað að heyra á Sigmundi en að hann teldi að starfsemi Evrópustofu gæti nú þegar brotið í bága við íslensk lög og alþjóðlega samninga sem við höfum undirgengist varðandi starfsemi erlendra ríkja.

Fram hefur komið að ESB hefur ráðstafað ríflega 200 milljónum króna í starfsemi Evrópustofu.

Dugar fyrir skuldaleiðréttingu og meiru til

Gjaldmiðilsmálið er ekki á dagskrá segir Bjarni Benediktsson

Bjarni Benediktsson formaður Sjálfstæðisflokksins sagði í útvarpsþættinum Á sprengisandi í dag að gjaldmiðilsmálið væri ekki á dagskrá í þessum kosningum. Það væru allt önnur mál sem þyrfti að vinna að á næstunni.

Bjarni sagði að það væri enginn annar góður valkostur í gjaldmiðlum á næstunni en krónan. Hann sagði mikilvægustu verkefnin að ná samstöðu við aðila vinnumarkaðar um aðgerðir í efnahagsmálum, að halda verðbólgu niðri, ná jöfnuði í ríkisfjármálum og koma almennt á meiri stöðugleika.

 

Sagði Árni Páll þetta virkilega?

Árni Páll Árnason hefur greinilega ekki trú á ESB-vegferð Samfylkingar og Vinstri grænna. Að hans mati eru Íslendingar greinilega ekkert á leið inn í Evrópusambandið þrátt fyrir umsókn um aðild og aðlögunarferli.

Árni sagði í þættinum á Sprengisandi í dag nokkurn veginn orðrétt að vextir hér á landi myndu lækka strax og við settum okkur það markmið að ganga inn í Evrópusambandið.

Þetta var undarleg framsetning hjá formanninum. Það er því greinilegt að hann hefur enga trú á því að umsóknin muni skila árangri. Íslendingar hafa það ekki að markmiði að ganga í Evrópusambandið þótt þeir hafi sótt um aðild að sambandinu!

Þetta leiðir hugann að fullyrðingum Árna Páls og fleiri Samfylkingarmanna fyrir og í upphafi þessa kjörtímabils um að um leið og Íslendingar tækju ákvörðun um að sækja um aðild að ESB myndu vextir lækka hér á landi.

Lítið hefur farið fyrir því að Samfylkingin hafi sýnt fram á að aðildarumsóknin hafi skilað þeim árangri í þessum efnum sem hún áður hélt fram.

 

Lægri vextir ekki sjálfkrafa með evru segir Guðmundur Steingrímsson

Það var athyglisvert í viðtali Sigurjóns M. Egilssonar við Guðmund Steingrímsson á Sprengisandi Bylgjunnar í dag að Guðmundur hafði ekki trú á því að lægri vextir fengjust sjálfkrafa ef evra yrði tekin upp hér á landi. Fyrst þyrfti að uppfylla ýmis skilyrði.

Það var greinilegt að fjölmiðlamaðurinn taldi mögulegt að ná þessum skilyrðum óháð því hvaða gjaldmiðil Íslendingar væru með.

Það er því efnahagsstjórnin sem skiptir máli fremur en gjaldmiðillinn.