SDG: makríldeilan sannar ágæti þess að standa utan ESB

Sigmundur Davíð Gunnlaugsson forsætisráðherra segir makríldeiluna sanna ágæti þess fyrir Íslendinga að standa utan Evrópusambandsins.

Evrópuvaktin fjallar um þetta.

Þar segir:

Sigmundur Davíð Gunnlaugsson forsætisráðherra var í Brussel þriðjudaginn 16. júlí þegar rétt fjögur ár voru frá því að alþingi samþykkti ESB-aðildarumsóknina. Erindi ráðherrans var að upplýsa æðstu menn ESB um stefnu ríkisstjórnar um fráhvarf frá aðildarumsókninni.

SDG með Herman Van Rompuy, forseta leiðtogaráðs ESB, í Brussel 16. júlí 2013.

Daginn áður en Sigmundur Davíð hitti ESB-ráðamennina sagði sjávarútvegsstjóri ESB, Maria Damanaki, að hún ætlaði að taka ákvörðun um refsingu Íslendinga og Færeyinga fyrir makrílveiðar fyrir lok þessa mánaðar.

Á visir.is er Sigmundur Davíð spurður hvort hótun Damanaki sýni ekki að betra sé að vera innan ESB en utan við það þegar deilt sé um mál af þessu tagi, Sigmundur Davíð svaraði:

„Þá hefðum ekki haft aðstöðu til að verja rétt okkar. Þetta er því þvert á móti áminning um mikilvægi þess að hafa yfirráð yfir eigin auðlindum. Verja fullveldið til þess að geta varið hagsmuni þjóðarinnar út á við.“

Forsætisráðherra lítur á reynsluna af makríldeilunni sem rök fyrir að vera utan ESB. Í samtalinu segir Sigmundur Davíð að hann hafi rætt makrílmálið við Herman Van Rompuy, forseta leiðtogaráðs ESB, og José Manuel Barroso, forseta framkvæmdastjórnar ESB. Sigmundur Davíð segir við visir.is:

„Barroso lagði áherslu á að Evrópusambandið vildi leysa málið með samningum og að það vildi ekki beita þvingunaraðgerðum sem gengju í berhögg við EES-samninginn og WPO-samningana. Það var auðvitað mjög jákvætt og æskilegt viðhorf enda er nú ekki langt síðan Evrópusambandið fór illa út úr því að sækja að Íslandi án þess að hafa til þess lagalegan grundvöll. Menn vilja því varla eiga á hættu að fara út í aðgerðir sem síðar verða dæmdar ólögmætar.“

Fréttamaður 365 sem spyr á visir.is spyr: En nú áttu Íslendingar ekki fulltrúa á fundi sjávarútvegsráðherranna [ESB í Brussel 15. júlí], sýnir þessi staða ekki að það er vont fyrir þjóðina að standa fyrir utan sambandið?

Sigmundur Davíð svarar:

„Þvert á móti. Ef við værum innan sambandsins hefði þetta ekki einu sinni komið upp. Þá hefði sambandið bara ákveðið hvernig það ætlaði að hafa þetta. Þá hefðum ekki haft aðstöðu til að verja rétt okkar. Þetta er því þvert á móti áminning um mikilvægi þess að hafa yfirráð yfir eigin auðlindum. Verja fullveldið til þess að geta varið hagsmuni þjóðarinnar út á við.“

Áfram atvinnuleysi á evrusvæðinu

OECD, Efnahags- og framfarastofnunin, varar við því að atvinnuleysi ungs fólks á evrusvæðinu verði enn mikið næstu misseri. Í árlegri spá stofnunarinnar um atvinnuhorfur segir að þrengingar gætu líka blasað við eldra fólki á vinnumarkaði, eftir því sem harðnar á dalnum.

Þetta kom fram í frétt Ríkisútvarpsins.

Þar segir ennfremur:

Sjónum er beint að því hve misjafnt atvinnuástandið er í löndunum. Búist er við því að atvinnuleysi á evrusvæðinu verði um 12,3% í lok næsta árs að meðaltali, einu prósentustigi meira en meira en það mælist nú. Í Þýskalandi, einu evrulanda, gera menn ráð fyrir því að atvinnuástand batni og atvinnuleysi verði undir 5% en í Grikklandi og á Spáni um 28%. Nú eru hátt í 48 milljónir manna atvinnulausar í OECD löndunum, sextán milljónum fleiri en þegar kreppan skall á fyrir sex árum.

Sjá hér einnig frétt Viðskiptablaðsins um sama efni.

Hvorki Sjálfstæðisflokkur né Framsókn vilja kosningu um viðræður

Æðstu stofnanir Sjálfstæðisflokks og Framsóknarflokks, og ríkisstjórnin, telja enga ástæðu til að láta kjósa um áframhald viðræðna við ESB nema því aðeins að til þess bær stjórnvöld vilji halda viðræðunum áfram.

Þessi afstaða er alveg skýr í samþykktum æðstu stofnana flokkanna og í stjórnarsáttmálanum.

Létu flokkarnir fara fram þjóðaratkvæðagreiðslu um áframhald viðræðna væri það ekkert annað en stór svik við kjósendur, engu minni en svik Vinstri grænna við kjósendur sína vorið og sumarið 2009.

Þetta ætti hverjum einstaklingi að vera ljóst. Það er alveg ljóst að Framsóknarflokkurinn og Sjálfstæðisflokkurinn vilja vera utan ESB og því hætta viðræðum um aðild. Þeir vilja ekki hefja viðræður að nýju. Komi hins vegar til þess, þvert gegn öllum vísbendingum, að ætlunin sé að hefja viðræður að nýju þá verði það ekki gert öðruvísi en svo að afstaða verði tekin til slíkra viðræðna í atkvæðagreiðslu.

Í sáttmála ríkisstjórnar Framsóknarflokks og Sjálfstæðisflokks segir um umsóknina um aðild að ESB: Gert verður hlé á aðildarviðræðum Íslands við Evrópusambandið og úttekt gerð á stöðu viðræðnanna og þróun mála innan sambandsins. Úttektin verður lögð fyrir Alþingi til umfjöllunar og kynnt fyrir þjóðinni. Ekki verður haldið lengra í aðildarviðræðum við Evrópusambandið nema að undangenginni þjóðaratkvæðagreiðslu.

Það er fróðlegt að bera sáttmálatextann við samþykktir æðstu stofnana flokkanna sem að ríkisstjórninni standa.

Landsfundarsamþykkt Sjálfstæðisflokksins hljóðar svo: „Landsfundur telur að hagsmunum Íslands sé betur borgið með því að standa fyrir utan Evrópusambandið. Áréttað er að aðildarviðræðum við ESB verði hætt og þær ekki teknar upp aftur nema að undangenginni þjóðaratkvæðagreiðslu.“

Flokksþingssamþykkt Framsóknarflokksins hljóðar svo: „Framsóknarflokkurinn telur hag lands og þjóðar best borgið utan Evrópusambandsins. Ekki verði haldið lengra í aðildarviðræðum við Evrópusambandið nema að undangenginni þjóðaratkvæðagreiðslu.“

Skýrsla um ESB kynnt í haust

Stjórnvöldum í Evrópu mistekst að auka atvinnu

Eins og þessi frétt ber með sér hefur stjórnvöldum í Evrópu mistekist að bæta atvinnuástandið. Sparnaður hefur verið mikill í opinberum rekstri víðast hvar og Seðlabanki Evrópu gerir lítið annað en að halda í horfinu, því þrátt fyrir lága vexti og víðtæk lán til fjármálafyritækja hefur ekki tekist að fá hjól atvinnulífsins til að snúast hraðar.

Eins og fréttin ber með sér er staðan þó ólík eftir löndum. Atvinnuleysi er tiltölulega „lítið“ í Þýskalandi, eða 5%, en það er næstum 30% í Grikklandi og á Spáni, en í þessum löndum eru 55-60% ungmenna án atvinnu.

Atvinnuleysið er að meðaltali 12,3% á evrusvæðinu.

Svartnættið blasir við ungu fólki

Hundalæti í ESB

ESB er búið að urra og gjamma og nú vill ráðherra á Írlandi að ESB sýni Íslendingum tennurnar. Þannig vonast hann til að ná af okkur makrílnum.

Eftir aldalangt sambýli við hunda vita Íslendingar að hundur sem sýnir tennurnar vonast yfirleitt til að það dugi og ekki er víst að hann sé tilbúinn í slaginn.

Það er þó vissara að umgangast ESB líkt og hund - og við vitum að það er aldrei hægt að treysta því fullkomlega að rándýrseðlið nái ekki yfirhöndinni hjá þessum skepnum.

Þess vegna skulum við alveg vera undir það búin að á eftir urri, gjammi og tannskini geti ferlíkið farið að glefsa.

Vill að ESB „sýni tennurnar“

Evrukreppan kemur niður á lánshæfi Frakka

Evruvandræðin hafa valdið því að lánshæfismatsfyrirtækið Fitch hefur lækkað lánshæfiseinkunn franska ríkisins um einn flokk. Þar með mun lántökukostnaður franska ríkisins að líkindum aukast á alþjóðlegum mörkuðum.

Ástæðan fyrir lægri einkunn Frakka er evrukreppan sem veldur samdrætti í framleiðslu í Frakklandi og rekstrarvandræðum franska ríkisins. Alþjóðagjaldeyrissjóðurinn reiknar með að framleiðsla í Frakklandi dragist saman um 0,2% á þessu ári.

Bloomberg.com fjallar meðal annars um þetta.

Evrópuvaktin fjallar einnig ítarlega um þetta hér.

Frakkar sviptir hæstu einkunn

Leynilegri skýrslu lekið sem segir að suðurevrusvæðið sé að bresta

Suður-Evrópa er að bresta efnahagslega. Viðbrögð evruríkjanna við skuldakreppunni þar hafa ekki skilað árangri. Endurreisn efnahags þessara ríkja hefur ekki orðið að veruleika. Skuldahlutfallið hækkar hratt. Pólitísk samstaða um aðhaldsaðgerðir er að splundrast í nær öllum evruríkjum.

Þetta kemur nýlega fram á Evrópuvaktinni, þar sem vitnað er í grein í Daily Telegraph eftir alþjóðlegan viðskiptaritstjóra blaðsins, Ambrose Evans-Pritchard. Á Evrópuvaktinni segir m.a. ennfremur:

Skýrsla sem tekin hefur verið saman á vegum framkvæmdastjórnar Evrópusambandsins og lekið hefur verið til fjölmiðla sýni að Grikkir séu ekki að ná þeim markmiðum, sem samið hafi verið um og að það muni miklu. Í skýrslunni sé því haldið fram, að Grikki skorti vilja og getu til að innheimta skatta. Raunveruleikinn sé hins vegar sá, að stjórnvöld í Aþenu nái ekki umsömdum markmiðum vegna þess að efnahagslífið sé í frjálsu falli og ástæðan fyrir því sé sú að of langt hafi verið gengið í aðhaldi. Grísk hugveita segir að samdráttur í efnahagslífi verði 5% á þessu ári. Í einkasamtölum við blaðamenn segja forráðamenn hugveitunnar að samdrátturinn verði nær 7%. Fréttir um aukinn stöðugleika í Grikklandi sé blekking.

Efnahagskrísan á Ítalíu sé vaxandi. Skuldastaðan sé komin í 129% miðað við verga landsframleiðslu. Það sé meira en ríki án eigin gjaldmiðils geti ráðið við. Samanlagður efnahagslegur samdráttur á Ítalíu frá árinu 2007 stefni í 10%. Þetta þýði að Ítalía sé í kreppu. Sá gjaldmiðill sem Ítalir notist við þyrfti að lækka um 20-30%.

Á Spáni sé komið upp stórfellt pólitískt hneyksli, sem Lýðflokkurinn geti ekki lengur lokað augunum fyrir. Flokkurinn geti ekki lengu fylkt þjóðinni að baki sér í aðhaldspólitík. Spænska dagblaðið El Mundo segir að andrúmsloftið á Spáni einkennist í vaxandi mæli af þvi að „bylting“ sé í aðsigi.

Portúgal er á fallanda fæti. Efnahagslægð sem nú nemi 3% dragi úr skatttekjum. Þess vegna nái stjórnvöld ekki settum markmiðum. Heildarskuldir Portúgala nemi 370% af vergri landsframleiðslu. Opinberar skuldir séu komnar í 123% af vergri landsframeiðslu. Fjölmiðlar í Portúgal haldi því fram að Evrópusambandið vinni nú í leynd að öðru björgunarláni fyrir Portúgal.

Þetta er pólitískt jarðsprengjubelti segir í grein Evans-Pritchard. Nýtt neyðarlán yrði að fara fyrir þýzka þingið. Ef það gerðist fyrir kosningar yrðu skilyrðin grimmdarleg.

Nú sé spurningin hvort forráðamenn evruríkjanna viðurkenni í fyrsta sinn að skattgreiðendur verði að taka á sig kostnað til að halda gjaldmiðilsbandalaginu saman. Hingað til hafi allt byggzt á lánum.

Á sama tíma hafi ákvörðun Seðlabanka Bandaríkjanna um að draga úr kaupum á markaði haft þau áhrif að lántökukostnaður ríkja í Evrópu hafi hækkað um 70 púnkta. Raunvextir fari stórhækkandi.

Matvæli eru ódýrust hér á landi

Matarkarfan er ódýrust á Íslandi af Norðurlöndunum. Sérstaklega er tekið til þess að verð á kjöt- og mjólkurvörum sé lægra á Íslandi en í nokkru öðru Norðurlandanna.

Viðskiptablaðið greinir frá þessu og vitnar til könnunar á vegum Eurostat og OECD.

Í könnuninni er verðið umreiknað svo það sé samanburðarhæft miðað við kaupmátt.

Viðskiptablaðið segir svo frá:

Mikill munur er á matvöruverði innan ESB. Ódýrust er matarkarfan í Póllandi, eða 61% af meðaltali ESB, en dýrust í Danmörku þar sem verðið er 43% hærra en að meðaltali í ESB. Verð á kjöt- og mjólkurvöru er lægra á Íslandi en í nokkru öðru Norðurlandanna. Matvaran er þó um 18% dýrari en að meðaltali í ESB.

Svo er vitnað í Finn Árnason, forstjóra Haga og varaformann Samtaka verslunar og þjónustu:

„Íslensk verslun er að bjóða marga vöruflokka á hagstæðu verði í samanburði við nágrannalöndin,“ segir Finnur.

Írar líta með ugg til Portúgals og Kýpur eru í vaxandi klandri

Kreppan í Portúgal sýnir að Írar þurfa að vera við öllu búnir, segir í vefriti blaðsins Independent. Í Portúgal tekur nú stjórnarkreppa við í kjölfar evrukreppunnar. Og lánshæfismatsfyrirtæki telur verulega hættu á því að Kýpur fari í þrot.

Í ljósi þessara hremminga er sérstakt ánægju efni að ástandið virðist vera að braggast á Írlandi sem enn hefur þó ekki verið útskrifað af Alþjóðagjaldeyrissjóðnum. Fyrir utan um 14% atvinnuleysi hefur ástandið einna verst komið niður á eigendum íbúðarhúsnæðis en verð á því hefur víða fallið í verði um 50%.

Kerfisvandi ESB og evrusvæðisins hefur ekki enn verið leystur, en hann veldur viðvarandi viðskiptaójafnvægi á milli kjarnaríkja og jaðarríkja.

Íslenska sumarið er dásamlegt og engu líkt

Ferðamenn fylkja liði til Íslands sem aldrei fyrr, þökk sé íslenskri náttúru, íslensku veðurfari, óbilandi bjartsýni Íslendinga og hagstæðu gengi íslenskrar krónu sem knýr okkur út úr efnahagslægðinni.

Það er engin lægð í hjörtum þessara glöðu ferðamanna sem hingað streyma, né þeirra fjölmörgu Íslendinga sem arka upp um fjöll og firnindi, suður firði eða út á nes. Það jafnast ekkert á við þetta dýrindis veður á Norðausturlandinu sem verið hefur, né hressandi úðann í loftinu hér fyrir sunnan og blæinn sem frískar þreyttar sálir jafnt sem viðkvæmar jurtir.

Að fólk sé að flýja í mengunina og sollinn í yfirfullum Evrópuborgum - er það ekki bara lævís áróður?

Veðurbarða Íslendinga dreymir um Evrópu