Svanur Kristjánsson og sambandsríkið ESB

Svanur Kristjánsson prófessor í stjórnmálafræði segir að aðild Íslands að ESB myndi þýða formlega aðild að ríkjabandalagi sem hefur ýmsa þætti sambandsríkis. Það kom fram á Eyjunni í gær.

Aðildarsinnar hafa reyndar flestir til þessa viljað horfa fram hjá því hvernig ESB hefur verið að þróast í átt til sambandsríkis sem tekur til sín æ meiri völd.

Lýðræðið hefur aldrei verið mjög virkt innan ESB. Vald kjörinna þingmanna er að jafnaði talsvert minna en víða gerist fyrir utan það að þátttaka í kosningum til þings ESB er lítil. Hlutur Íslendinga yrði væntanlega innan við eitt prósent gerðumst við aðilar. Vald embættismanna er talsvert svo og ráðherra - en þá eru það fyrst og fremst ráðherrar stærstu þjóðanna sem ráða ferðinni. 

ESB er sem sagt að verða sambandsríki, segir prófessorinn. En í þessu sambandsríki ráða ferðinni ráðherrar tveggja eða þriggja stærstu þjóðanna þegar til kastanna kemur. Hver man ekki eftir umræðunni um Merkozy? 

Hvenær breytist blíðmælgi ESB aftur í hótanir í makrílmálinu?

Það hefur vakið athygli hversu fögrum orðum forystumaður í sjávarútvegsmálum og einn ráðamaður hér á landi fóru um nýlega og breytta afstöðu ESB-forystunnar í makrílmálum. Það er stutt síðan ESB hótaði okkur Íslendingum hörðum refsiaðgerðum vegna deilunnar.

Nú kemur skyndilega ný ásjóna ESB í ljós. Eftir allar hótanirnar. Þetta vekur upp spurningar. Hvað býr undir hjá ESB? Er ekki ástæða til að vera á varðbergi gagnvart þessu valdaapparati sem hefur hótað okkur öllu illu undanfarin ár vegna þess að við höfum staðið á rétti okkar? 

Er ekki líka ástæða til að vera á varðbergi gagnvart þessu ríkjasambandi sem virðist ekki hafa neinar áreiðanlegar tölur um makrílveiðar í sambandinu. 

Íslendingar og Norðmenn vilja ekki ganga í ESB

Áhuginn á inngöngu í ESB er ekki mikill á Íslandi og enn minni í Noregi. Alls eru 71% Norðmanna sem vilja ekki ganga í sambandið. Andstaðan við aðild að ESB er mikil og stöðug í Noregi.

 

Þetta kemur fram í mbl.is. Þar segir ennfremur:  

 

 

Mikill meirihluti Norðmanna er andsnúinn því að ganga í Evrópusambandið samkvæmt niðurstöðum nýrrar skoðanakönnunar fyrir norsku dagblöðin Nationen og Klassekampen sem birtar eru í dag. 71% Norðmanna vilja ekki ganga í sambandið samkvæmt könnuninni en 19% eru því hlynnt.

Ekki hafa orðið miklar breytingar á afstöðu Norðmanna frá því að hliðstæð skoðanakönnun var gerð í nóvember síðastliðnum samkvæmt frétt Nationen en þá voru 69,3% andsvíg aðild að ESB og 19,1% henni hlynnt.

Haft er eftir Heming Olausen, formanni samtakanna Nei til EU sem berjast gegn aðild að ESB að það sé ánægjulegt að andstaðan sé stöðug í kringum 70% og að ríkisstjórnarskiptin í Noregi síðastliðið haust hafi ekki breytt afstöðu Norðmanna til málsins. Jan Erik Grindheim, formaður norsku Evrópusamtakanna, segir mikla andstöðu ekki koma á óvart í ljósi efnahagserfiðleikanna innan ESB. Hann vonist til þess að staðan breytist. 

71% Norðmanna vilja ekki í ESB

Gríðarleg spilling í Evrópusambandinu

Gríðarleg spilling þrífst í ríkjum Evrópusambandsins. Kostnaðurinn af hennar völdum nemur jafnvirði hátt í 19 þúsund milljarða króna á ári. Þetta kemur fram í skýrslu sem framkvæmdastjórn ESB kynnti í dag.

Ofangreint kemur fram í frétt Ríkisútvarpsins í dag. Sjá einnig frétt á BBC og skýrslu framkvæmdastjórnar ESB um málið.

 

Fréttamaður Ríkisútvarpsins segir hefur þetta um málið að segja: 

 

Cecilia Malmström, innanríkismálastjóri Evrópusambandsins, kynnti hina nýju spillingarskýrslu undir hádegi. Segja má að hún hafði hleypt henni úr hlaði með grein sem birtist í Gautaborgarpóstinum í dag. Þar segir hún að umfangið sé slíkt að það grafi undan lýðræði og stórskaði hið löglega efnahagskerfi í löndunum. Malmström tekur fram að vissulega sé vandamálið mis-stórt í löndunum 28. Svíar geti til dæmis vel við unað miðað við margar aðrar þjóðir.

Samkvæmt skýrslunni hefur spillingin í för með sér gríðarlegan kostnað fyrir ESB-ríkin, - um 120 milljarða evra, jafnvirði hátt í nítján þúsund milljarða króna, á ári. Fram kemur að það séu mun frekar ríkisstjórnir aðildalandanna sem reyni að taka á spillingunni en stofnanir Evrópusambandsins. Vissulega sé starfrækt sveit sem leiti uppi fjármálaspillingu í tengslum við fjárhagsáætlun ESB, en hún hafi úr litlum fjárframlögum að spila og geti því beitt sér að takmörkuðu leyti.

Í skýrslunni er greint frá tveimur skoðanakönnunum sem sýna að þrír fjórðuhlutar aðspurðra töldu að spilling væri víðtæk ESB-ríkjunum. Forsvarsmenn fjögurra af hverjum tíu fyrirtækjum sem leitað var til sögðu að spilling stæði því fyrir þrifum að stunda viðskipti í Evrópulöndum. 

 

 

Bloggari Heimssýnar hefur engu við þetta að bæta. 

64,8 prósent þeirra sem taka afstöðu eru á móti aðild að ESB

Hvað á þetta brölt allt saman að þýða? Að kíkja í pakkann? Ekki bara einu sinni, heldur oftar? Landsmenn eru á móti aðild að ESB. Um 65 prósent þeirra sem taka afstöðu eru á móti aðild að ESB eins og fram kemur í Fréttablaðinu í dag. Við vitum að svokallaðar aðildarviðræður eru ekkert annað en aðild í hægfara skrefum. Hversu lengi geta aðildarsinnar þyrlað upp ryki í þessum málum? 

Eins og Svandís Svavarsdóttir sagði í Bylgjuþætti í morgun þá hafa Íslendingar almennt lítinn áhuga á ESB. 

Hversu lengi ætla Vinstri græn að berjast gegn eigin stefnumáli?

Flestir þingmenn Vinstri grænna hafa þá sérstöðu í hinum pólitíska heimi að berjast hatrammlega gegn einu grundvallar stefnumáli sínu. Að jafnaði vinna flokkar að því að ná fram stefnumáli sínu. Stöku sinnum kemur það fyrir að flokkur hefur mál í stefnu sinni án þess að vinna að því. En að flokkur vinni beinlínis gegn stefnumáli sínu, og það af talsverðu afli, ár eftir ár, er algjört einsdæmi.

Vinstri græn eru nefnilega algjörlega á á móti því að ganga í Evrópusambandið. Samt létu ráðandi öfl innan flokksins Samfylkinguna fá sig í þá vegferð að sækja um aðild að ESB. Allir, sem eitthvað hafa kynnt sér málin, vita að svokallaðar aðildarviðræður eru ekkert annað en hægfara aðlögun umsóknarríkis að ESB.

Hversu lengi ætla Vinstri græn að láta þetta viðgangast? Fyrir ári samþykktu þau að gefa viðræðum séns í ár til viðbótar. Sá séns rennur út í þessum mánuði. Ætla vinstri græn líka að svíkja þá samþykkt sína? Af hverju minna engir aðrir fjölmiðlar en Heimssýnarbloggið á þessa staðreynd? 

Svandís Svavarsdóttir segir ESB ekki vera neitt meginmál fyrir almenning á Íslandi

Það var athyglisvert að heyra Svandísi Svavarsdóttur, þingmann

 Vinstri grænna, segja frá þeirri skoðun sinni í umræðuþætti á Bylgjunni í morgun að ESB væri ekki neitt meginmál fyrir almenning á Íslandi. Þar með er hún að segja að nýleg skoðanakönnun um vilja fólks til þjóðaratkvæðagreiðslu um áframhald viðræðna við ESB risti ekki djúpt.

Bryjnar Níelsson, þingmaður Sjálfstæðisflokksins, tók undir með Svandísi. Hann sagði auk þess að ef það ætti að kjósa um eitthvað þá væri það um aðild að ESB. Við vissum hvaða pakka við fengjum, þ.e. ESB með öllum sínum kostum og göllum. Spurningin væri bara um til hve langs tíma við fengjum einhverjar undanþágur.

Bjarni Benediktsson segir kosningu um áframhald viðræðna við ESB ekki á dagskrá á næstunni

Bjarni Benediktsson, fjármálaráðherra og formaður Sjálfstæðisflokksins, sagði í viðtalsþætti á Stöð 2 í dag að það færi ekki fram þjóðaratkvæðagreiðsla um áframhald viðræðna við ESB í tengslum við sveitarstjórnakosningarnar í vor. Bjarni undirstrikaði að Sjálfstæðisflokkurinn væri á móti aðild að ESB. 

Bjarni Benediktsson vill eðlilega vinna að framgangi stefnu flokks síns. Það að halda áfram aðildarviðræðum þýðir það að gengið verður í átt til aðildar að ESB í smáum skrefum. Viðræður eru í raun og veru ekkert annað en það sem kallað hefur verið hin vel þekkta koníaksaðferð Monnet.

Þess vegna er engin ástæða til að halda áfram viðræðum - og ekki heldur ástæða til þess að láta fara fram kosningar um það meðal þjóðarinnar hvort halda eigi viðræðum áfram. Ríkisstjórnin er á móti aðild og hefur gert hlé á viðræðum.

Hið eina rétta í stöðunni er því að Alþingi samþykki að afturkalla umsóknina. 

Vigdís Hauksdóttir segir að virða verði niðurstöður þingkosninga árið 2013

Vigdís Hauksdóttir, þingmaður Framsóknarflokksins og formaður Heimssýnar, sagði í nýum þætti á Stöð 2 í dag að það yrði að virða niðurstöður þess lýðræðislega ferlis sem fólst í niðurstöðum þingkosninganna síðast liðið vor. Þá unnu þeir flokkar stórsigur sem voru á móti aðild að ESB.

Í framhaldi af kosningunum var myndaður stjórnarsáttmáli Sjálfstæðisflokksins og Framsóknarflokksins. Þar kemur skýrt fram sú stefna sem æðstu samkundur flokkanna höfðu samþykkt, nefnilega að vinna gegn aðild að ESB og hætta viðræðum.

Þingið ákvað að setja viðræður í gang án þess að spyrja þjóðina. Þess vegna er eðlilegt að Alþingi samþykki að afturkalla umsóknina.

Það að halda áfram viðræðum er ekkert annað en að stíga skref inn í ESB í smáum skömmtum. Þjóðin vill ekki ganga í ESB. Þess vegna er ekki ástæða til að halda áfram viðræðum. 

Davíð Þorláksson fyrrverandi formaður SUS vill draga umsóknina til baka

Davíð Þorláksson, þáverandi formaður Sambands ungra sjálfstæðismanna, lýsti því yfir í sumar að eðlilegt væri að draga umsókn um aðild að ESB til baka.

 

Mbl.is greinir frá svo frá þessu sjónarmiði Davíðs: 

 

„Það væri galið að standa í aðildarviðræðum þegar báðir stjórnarflokkarnir hafa það á stefnuskrá sinni að standa utan ESB og það er hvorki vilji til þess hjá meirihluta þingsins né þjóðarinnar að ganga í sambandið.“

Þetta segir Davíð Þorláksson, formaður Sambands ungra sjálfstæðismanna (SUS), á Facebook-síðu sinni í dag vegna umræðu síðustu daga um það með hvaða hætti ríkisstjórnin hyggist taka á umsókninni um inngöngu í Evrópusambandið.

Davíð segir að óþarft sé að halda þjóðaratkvæðagreiðslu um málið þegar staða mála er með þessum hætti. „Eina vitið er að draga umsóknina til baka og fara að einbeita sér að endurreisn og uppbyggingu.“

 

 

Davíð Þorláksson gerir sér grein fyrir því eins og fleiri að áframhald viðræðna við ESB felur það í sér að ný skref verða stigin í átt til aðildar að ESB. Það vill Davíð ekki.