Birgitta Jónsdóttir: Sýnum grísku þjóðinni samstöðu

Gríska þjóðin á bágt um þessar mundir. Hún er leiksoppur fjármálaafla innanlands og erlendis og þeirra afla í ESB, AGS, Grikklandi og annars staðar sem vilja að þjóðin verði látin borga fyrir óreiðuskuldir sem stjórnmálamenn stofnuðu til. Þess vegna er hægt að taka undir með Birgittu Jónsdóttur þegar hún segir á Alþingi að við eigum að sýna Grikkjum samstöðu.

Birgitta minnti í ræðu sinni á Alþingi í morgun á að staðan í Grikklandi sýndi hvernig hefði getað farið hér á landi. Íslend­ing­um hefði hins veg­ar tek­ist að vinna úr erfiðum tím­um og væru nú að ná sér á strik. Lánar­drottn­ar Grikk­lands ætluðu sér að leysa úr skulda­mál­um lands­ins með því að setja enn meiri skuld­ir á herðar grísku þjóðar­inn­ar.

Jafnframt lýsti Birgitta, sem er kafteinn Pírata, yfir stuðningi við grísku þjóðina og hvatti hana til þess að fylgja hjarta sínu í þjóðar­at­kvæðagreiðslu sem fyr­ir­huguð er í Grikklandi á sunnu­dag­inn, eins og fram kemur í meðfylgjandi frétt mbl.is. 

(Mynd: mbl.is/Kristinn Ingvarsson)

Vill samstöðu með Grikklandi

Erfið staða hjá Grikkjum og ESB

Staða mála í Grikklandi er afar erfið fyrir stjórnvöld, efnahagslíf og almenning. Grikkir áttu aldrei að taka upp evru og evrusamstarfið jók aðeins á erfiða skuldastöðu sem var að myndast.

ESB er einnig í mjög erfiðri stöðu, ekki bara vegna Grikklands heldur líka vegna þess að vandi Grikklands og ýmissa annarra ríkja á jaðri evrusvæðisins sýnir í hnotskurn að tilraunin með evruna, eina mynt fyrir Evrópulönd, hefur ekki gengið sem skyldi. 

En ESB er ekki af baki dottið. Ekki Grikkir heldur. Þessir aðilar munu reyna að finna lausn jafnvel þótt gríska þjóðin hafni tillögum ESB í þjóðaratkvæðagreiðslu. Vitaskuld er Juncker alveg sjóðandi vitlaus yfir lýðræðisást móðurþjóðar lýðræðisins. Lýðræði og þjóðaratkvæðagreiðsla er ESB ekki að skapi - ekki fremur en var í Icesave-deilunni hér á Íslandi.

En Juncker verður búinn að jafna sig á morgun. Hann veit hve mikið er í húfi.

Sjónir beinast að Ítalíu og Spáni

Athyglisverður þáttur í norska sjónvarpinu um evrukrísuna

Skrásetjari Heimssýnarbloggins rakst á athyglisverðan þátt sem var sýndur í norska sjónvarpinu, NRK2, í kvöld, en þar var þýskumælandi fréttamaður að fjalla um efnahagskrísuna meðal annars í Grikklandi og Kýpur. Þar var lýst fantalegum tökum trojkunnar svökölluðu, AGS, ESB og SE, á þessum Miðjarðarhafslöndum.

Meðal annars kom fram að þríeykið hafði þvingað Kýpverja til að láta milljarða af hendi til að bjarga grískum banka og eiganda hans. Fulltrúar þríeykisins neituðu að ræða við þennan fjömiðlamann. 

Þátturinn verður sýndur aftur á morgun og þeir sem hafa aðgang að NRK ættu að fylgjast með. 

Sjá dagskrána hér.

Heimilin spara á því að vera utan ESB

Niðurstaða nýrrar rannsóknar í Bretlandi sýnir að heimili þar í landi myndu spara um tvö hundruð þúsund krónur á ári ef Bretland segði sig úr ESB. Matvæli yrðu ódýrari þar sem hægt yrði að flytja þau inn í auknum mæli frá ríkjum utan ESB auk þess sem úrsögn Breta úr ESB þýddi að ekki væri lengur þörf á kostnaðarsömu regluverki sambandsins sem væri til þess fallið að hækka verð til neytenda.

Fréttavefur Daily Telegraph segir frá þessu og mbl.is endursegir.

Heimilin betur sett utan ESB

Ísland smám saman af listum yfir umsóknarríki að ESB

Ísland er smám saman að fara af listum hjá ESB yfir þau ríki sem sótt hafa um aðild.

Mbl.is skýrir svo frá:

Tek­in hef­ur verið ákvörðun af ráðherr­aráði Evr­ópu­sam­bands­ins um að Íslandi verði ekki leng­ur boðið að taka af­stöðu með sam­eig­in­legri stefnu sam­bands­ins í ör­ygg­is- og varn­ar­mál­um sem um­sókn­ar­ríki. Sú ákvörðun er liður í því að taka Ísland af lista Evr­ópu­sam­bands­ins yfir um­sókn­ar­ríki að sam­band­inu í sam­ræmi við ósk­ir rík­is­stjórn­ar­inn­ar. Þetta staðfest­ir Klem­ens Ólaf­ur Þrast­ar­son, upp­lýs­inga­full­trúi sendi­nefnd­ar Evr­ópu­sam­bands­ins á Íslandi, í sam­tali við mbl.is.

Þessi breyt­ing fel­ur í sér að Ísland hef­ur ekki leng­ur sömu stöðu og um­sókn­ar­ríki að Evr­ópu­sam­band­inu í þess­um efn­um eins og landið hafði haft frá ár­inu 2010 þegar viðræður um inn­göngu þess í sam­bandið hóf­ust. Héðan í frá verði Íslandi ein­ung­is boðið að taka þátt í yf­ir­lýs­ing­um Evr­ópu­sam­bands­ins í ör­ygg­is- og varn­ar­mál­um með sama hætti og Nor­eg­ur og Liechten­stein sem ásamt Íslandi eru aðilar að Evr­ópska efna­hags­svæðinu (EES) en utan sam­bands­ins.

Rík­is­stjórn­in til­kynnti Evr­ópu­sam­band­inu form­lega um miðjan mars á þessu ári að hún teldi Ísland ekki leng­ur vera um­sókn­ar­ríki að sam­band­inu. Var óskað eft­ir því við Evr­ópu­sam­bandið að tekið yrði mið af því í störf­um sam­bands­ins. Evr­ópu­sam­bandið ákvað í kjöl­farið að fjar­lægja Ísland af list­um yfir um­sókn­ar­ríki að sam­band­inu á vefsíðum sín­um. Einnig ákvað Evr­ópu­sam­bandið að hætta að bjóða full­trú­um Íslands á þá fundi sem um­sókn­ar­rík­in hafa ann­ars rétt til að sækja.

Fær aftur sömu stöðu og Noregur

Aukin miðstýring ESB lausn á vandanum?

Þegar heimsbyggðin, og þar með forystumenn ESB, er orðin sannfærð um að núverandi staða ESB er óbærileg og hefur valdið ómældum skaða, samanber lífskjör í Grikklandi og víðar, þá heldur forysta ESB að eina lausnin sé sú að taka meira vald frá aðildarríkjunum og færa það til þeirra sem valdið hafa skaðanum.

Er þetta nú skynsamlegt?

Hvað segja Bretar? Hvað segja efasemdarmenn út um alla Evrópu sem hafa í æ ríkari mæli stutt þá flokka sem eru gagnrýnir á starfsemi ESB?

Vilja ríkissjóð fyrir evruríkin

Egill Helgason segir evrusvæðið óhagkvæmt

Egill Helgason áttar sig á því að Evrópusambandið er ekki hagkvæmt gjaldmiðilssvæði. Hann segir í nýlegri færslu: „Evrópusambandið sem er alltof ólíkt innbyrðis til að sameiginlegur gjaldmiðill virki.“

Enn fremur segir Egill: „Þau ná ekki vel saman Tsipras og Varoufakis annars vegar og  Merkel og Juncker hins vegar. Forysta ESB átti mun auðveldara með að tala við gamla spillta liðið í Nea Demokratia og Pasok en Syriza.“

Egill þekkir sjálfsagt betur til í Grikklandi en margur.

Væntanlega er hann sammála bandaríska prófessornum Robert Aliber sem segir að evran henti ekki Íslendingum.

Bretum betur borgið utan ESB segir í nýrri skýrslu

Ný og viðamikil skýrsla sýnir að Bretum er betur borgið utan ESB miðað við núverandi regluverk og aðstæður. Einungis viðamiklar breytingar á regluverki ESB gætu breytt þessu mati. Fram kemur að útflutningur breskra fyrirtækja á vörum beint til ESB sé í raun fremur lítill en samt verða þau að hlíta íþyngjandi regluverki sambandsins. 

Það verður fróðlegt að fylgjast með þróun ESB-málanna í Bretlandi næstu árin. Cameron forsætisráðherra hefur lofað þjóðaratkvæðagreiðslu um aðild landsins að ESB fyrir árslok 2017.

 

Miklar breytingar nauðsynlegar

Hræðsluáróður ESB varðandi Grikkland - enn einu sinni?

Jean-Claude Juncker, formaður framkvæmdastjórnar ESB, kom heiminum í uppnám um daginn með því að tala um að úrslitastund yrði í dag vegna Grikklands. Í dag segir hann hins vegar fundinn nánast vera spjallfund þar sem menn bera saman bækur sínar. Samt kalla sumir fundinn enn neyðarfund.

Juncker tekst sannaralega að halda mönnum við efnið.

Dvínandi vonir um samkomulag

Seðlabanki Grikklands pólitískt verkfæri ESB

Nýleg tilkynning frá Seðlabanka Grikklands er dæmi um það hvernig ESB og seðlabanki evrunnar beitir stofnunum aðildarlanda fyrir sig í pólitískum tilgangi. Með þessu reynir ESB að hafa áhrif á lýðræðislega þróun í Grikklandi. Því er haldið fram af hógværum íhaldsmönnum að ESB reyni allt til þess að vegur vinstri stjórnarinnar í Grikklandi verði sem verstur.

Við getum ímyndað okkur hvað hefði gerst ef ESB og seðlabanki evrunnar hefðu getað skipað seðlabankanum á Íslandi fyrir verkum í aðdraganda og eftirmála hrunsins hér á landi. Hefðum við þá haft okkar Papandreóa eða Tsiprasa?

ESB og AGS eru sögð keyra hagkerfið í Grikklandi fram á brún hengiflugs hrunsins til þess eins að framfylgja úreltri innheimtustefnu sinni fyrir kröfuhafa í fjármálakerfinu. Þessi hegðun þríeykisins (ESB, AGS og ECB) stefni hins vegar Grikklandi í öngþveiti og grafi í leiðinni undan lögmæti ESB og AGS og geri jafnframt framtíðarhorfur í efnahagsmálum í Evrópu og heimsbyggðinni allri mun verri fyrir vikið.

Sagt er að til úrslitastundu dragi á morgun eða í lok þessa mánaðar. Gefist ríkisstjórn Grikklands ekki upp er þó líklegast að AGS, ESB og ECB lengi í hengingarrólinni fram eftir sumri og jafnvel fram eftir ári.

Nýleg skrif Ambrese Evans-Pritchards um málið ættu að vera skyldulesning hvers áhugamanns um Evrópusambandið og efnahagsmál.

Hér er Styrmir Gunnarsson með stutta útgáfu af þessari grein Pritchards.

Þurfa ekki á AGS að halda