Öllu skal fórnað fyrir inngöngu í Evrópusambandið

Sturla Böðvarsson, fyrrv. forseti Alþingis og ráðherra, flutti ávarp við hátíðarhöld á 17. júní á fæðingarstað Jóns Sigurðssonar, forseta, á Hrafnseyri við Arnarfjörð. Í ræðunni minntist Sturla m.a. óbifanlegrar sannfæringar og málatilbúnaðar Jóns Sigurðssonar og samtíðarmanna hans: „Vert er að minna okkur á að því frelsi sem Jón Sigurðsson og samtíðarmenn hans skópu megum við ekki fórna né láta fara forgörðum í ölduróti heimskreppu eða vegna stundarhagsmuna.“ Sturla gangrýndi ennfremur mjög núverandi ríkisstjórn og hvernig hún ætli sér að  að fórna auðlindum þjóðarinnar fyrir stundarhagsmuni með því að sækja um inngöngu í Evrópusambandið.

Sjá nánar á heimasíðu Heimssýnar www.heimssyn.is.

„Ekki gera sömu mistök og við gerðum!“

Dagana 14.-17. júní sl. voru staddir hér á landi á vegum Heimssýnar, hreyfingar sjálfstæðissinna í Evrópumálum, þrír gestir frá Bretlandseyjum, tveir Skotar og einn Norður-Íri. Tilgangurinn með heimsókn þeirra var að miðla Íslendingum af reynslu heimabyggða sinna af sameiginlegri sjávarútvegsstefnu Evrópusambandsins sem þær hafa búið við í á fjórða áratug. Reynslan af fiskveiðistjórnun sambandsins er vægast sagt hörmuleg og hefur hún gengt lykilhlutverki í leggja stærstan hluta sjávarútvegar aðallega í Skotalandi í rústir. Skoski fiskveiðiflotinn er í dag aðeins þriðjungur af því sem hann var þegar Bretland gekk í forvera Evrópusambandsins, aflaheimildir Skota hafa dregist stórkostlega saman og enn koma fyrirmæli frá Brussel um að skera verði sífellt meira niður.

Sjá nánar á heimasíðu Heimssýnar www.heimssyn.is.

Heimssýn óskar Íslendingum til hamingju með daginn!

Heimssýn, hreyfing sjálfstæðissinna í Evrópumálum, óskar Íslendingum nær og fjær til hamingju með 65 ára afmæli sjálfstæðisins. Sjálfstæði þjóðarinnar var landað 17. júní 1944 en þar með lauk ekki sjálfstæðisbaráttunni heldur snerist hún eftirleiðis um það að standa vörð um það sem áunnist hafði. Sennilega hefur sjálfstæði þjóðarinnar aldrei verið í eins mikilli hættu og það er í dag og því brýnt að allir þjóðhollir Íslendingar leggi sitt að mörkum til þess að tryggt verði að full ástæða verði til þess að halda 17. júní hátíðlegan um ókomna tíð.

Verður aðeins haldið ráðgefandi þjóðaratkvæði um ESB?

Ríkisstjórnin hefur langt fram frumvarp til laga um þjóðaratkvæðagreiðslur þar sem m.a. er gert ráð fyrir að einfaldur meirihluti þingmanna geti farið fram á að haldið verði ráðgefandi þjóðaratkvæði um ákveðin mál. Þetta eigi að tryggja að þjóðin eigi síðasta orðið í meiriháttar málum. Hvernig sem það er fengið út þegar þjóðaratkvæðið yrði aðeins ráðgefandi en ekki bindandi. Mat manna mun vera að til þess að þjóðaratkvæði geti verið bindandi þurfi að breyta stjórnarskránni.

Sjá nánar á heimasíðu Heimssýnar www.heimssyn.is.

Hvetja þingmenn VG til þess að hafna viðræðum við ESB

Félag Vinstrihreyfingarinnar græns framboðs í Skagafirði hefur sent frá sér ályktun þar sem segir að endurreisn íslensks samfélags sé brýnni en aðildarviðræður við Evrópusambandið. Minnt er á samþykktir og yfirlýsingar flokksins fyrir nýliðnar alþingiskosningar þar sem Evrópusambandsaðild er alfarið hafnað og þingmenn hans hvattir til þess að hafna þingsályktunartillögu Samfylkingarinnar um umsókn um aðild. Þá er að lokum bent á að það skjóti skökku við ef nota á hluta fjármuna sem til stendur að spara með niðurskurði á fjárveitingum til grunnstoða samfélagsins til þess að fjármagna mjög kostnaðarsamar aðildarviðræður.

Sjá nánar á heimasíðu Heimssýnar www.heimssyn.is.

Meirihluti Íslendinga vill viðræður en ekki umsókn

Ný skoðanakönnun sem Capacent Gallup gerði fyrir Morgunblaðið sýnir tæplega 58% stuðning við það að hafnar verði aðildarviðræður við Evrópusambandið. Er þetta talsvert minni stuðningur en mælst hefur í síðustu könnunum og bendir til þess að hann sé að dragast saman. Þannig vildu rúm 61% viðræður í sambærilegri könnun Capacent Gallup í maí sl. og 64% í mars. Skoðanakannanir Fréttablaðsins á þessu ári hafa hins vegar sýnt meirihluta gegn því að sótt verði um aðild að Evrópusambandinu, en forsenda þess að hægt sé að hefja viðræður við sambandið er að fyrst verði send inn slík umsókn.

Sjá nánar á heimasíðu Heimssýnar www.heimssyn.is.

ESB vill Ísland vegna norðurskautshagsmuna

Evrópusambandið á engin landssvæði sem liggja að norðurheimsskautinu en hefur hins vegar mikinn áhuga á að gera sig gildandi á svæðinu vegna hinna miklu náttúruauðlinda sem talið er að þar sé að finna og þá ekki síst olía og gas sem sambandið þarf nauðsynlega að tryggja sér aðgang að. Hlýnandi veðurfar og bráðnun á norðurskautinu hefur aukið mjög líkurnar á að hægt verði að nýta þessar auðlindir. En til þess að tryggja stöðu sína í þeim efnum þarf Evrópusambandið að eiga landfræðilega aðkomu að svæðinu og þar kemur til sögunnar stóraukinn áhugi sambandsins á að ná yfirráðum yfir Noregi og Íslandi.

Sjá nánar á heimasíðu Heimssýnar www.heimssyn.is.

Greiðsla Icesave forsenda inngöngu í ESB

Utanríkisráðherra Finnlands, Alexander Stubb, sagði í samtali við Morgunblaðið 9. júní sl. að hann tengdi saman greiðslu á Icesave skuldbindingum Landsbankans og inngöngu Íslands í Evrópusambandið. M.ö.o. að það væri forsenda fyrir því að Ísland gæti gengið í sambandið að Íslendingar greiddu fyrir Icesave. Fleira athyglisvert koma fram í viðtalinu við finnska utanríkisráðherrann og m.a. varaði hann Íslendinga við of mikilli bjartsýni á að viðræður um inngöngu í Evrópusambandið yrðu auðveldar, þær yrðu þvert á móti mjög erfitt ferli sem tæki langan tíma.

Sjá nánar á heimasíðu Heimssýnar www.heimssyn.is.

Segir að vinstri-grænir vilji ekki sækja um inngöngu í ESB

Haft er eftir Jóni Bjarnasyni, sjávarútvegs- og landbúnaðarráðherra, á fréttavefnum Fishupdate.com að hvorki hann né Vinstrihreyfingin - grænt framboð vilji sækja um inngöngu í Evrópusambandið. „Ég er ekki trúaður á það að knýja dyra þar sem ekki er ætlunin að ganga inn,″ hefur vefurinn eftir honum.

Sjá nánar á heimasíðu Heimssýnar www.heimssyn.is.

Evrópusambandið hefur lokaorðið

Í Morgunblaðinu í dag birtist grein eftir norska fræðimanninn Per Christiansen þar sem hann varpar fram þeirri skoðun sinni að hugsanlegar breytingar á sameiginlegri sjávarútvegsstefnu Evrópusambandsins kunni að vera hagstæðar Íslendingum þar sem uppi séu m.a. hugmyndir um að dregið verði að einhverju marki úr miðstýringu innan hennar. Reyndar er staðreyndin sú að engar ákvarðanir hafa verið teknar á vettvangi sambandsins um slíkar breytingar og því ekkert sem segir að af þeim verði.

Hitt er svo annað mál að jafnvel þó einhverjar breytingar í þessa veru yrðu að veruleika breyttu þær í raun engu í ljósi þess að Evrópusambandinu eru tryggð full yfirráð yfir sjávarútvegsmálum innan þess í fyrirhugaðri Stjórnarskrá sambandsins (Lissabon-sáttmálanum).

Sjá nánar á heimasíðu Heimssýnar www.heimssyn.is.