Krugman: evran er elítuverkefni

Evran er að deyja drottni sínum. Spurt er um dánarstund og hvernig fer fyrir þrotabúinu. Paul Krugman nóbelsverðlaunaður bandaríkur hagfræðingur er ekki í vafa um hvar ábyrgðin á evru-klúðrinu liggur - hjá valdaelítunni.

Leiðtogar Evrópu skópu sameiginlegan gjaldmiðil, evruna,  án þess að búa til stofnanir sem þarf til að glíma við hæðir og lægðir evrusvæðisins. Áherslan á sameiginlegan evrópskan gjaldmiðil var öll í efstu lögum samfélagins, draumsýn elítunnar var þvinguð á almenning sem var tregur í taumi.
(The real story of Europe’s crisis is that leaders created a single currency, the euro, without creating the institutions that were needed to cope with booms and busts within the euro zone. And the drive for a single European currency was the ultimate top-down project, an elite vision imposed on highly reluctant voters.)

Smitið frá valdaelítunni í Evrópu barst til Íslands. Samfylkingin er hýsilinn. Nú þegar greining liggur fyrir ætti að vera hægt að koma í veg fyrir meira tjón með því að kjósa Samfylkinguna út úr íslenskum stjórnmálum.

Fyrrum formaður Sjálfstæðisflokksins: kjósum Samfylkingu

Þorsteinn Pálsson var einu sinni formaður Sjálfstæðisflokksins, þar á eftir talsmaður Baugs sem ritstjóri Fréttablaðsins og er núna orðinn kosningasmali fyrir Samfylkinguna. Hjörtur J. Guðmundsson rýnir í nýjasta útspil Þorsteins og kemst að eftirfarandi niðurstöðu

Ég get ekki skilið skrif hans öðruvísi en svo að hann vilji að Evrópusambandssinnar í öðrum flokkum kjósi Samfylkinguna í næstu þingkosningum til þess að tryggja "örugga og ábyrga forystu" flokksins og Össurar Skarphéðinssonar í Evrópumálum.

Ástæða er að óska Samfylkingunni til hamingju með nýja liðsmanninn.

 

Kristnitakan og Evrópusambandið

Árið þúsund tóku Íslendingar kristni og beygðu sig fyrir heimsveldi þess tíma, kaþólsku kirkjunni. Kristnitakan var pólitísk ákvörðun en ekki trúarleg. Tvær meginástæður stóðu til þess að Íslendingar játuðust nýrri trú. Í fyrsta lagi var hér kominn flokkur manna sem játaði kristni. Í öðru lagi var kristni orðin ríkistrú í Noregi og konungsvaldið þar kappsamt um að norrænar byggðir í vestri tækju sama sið.

Pólitíska málamiðlunin sem var gerð árið 1000, sumir segja 999, fólst í því að kristni skyldi lögtekin en heiðni leyfð í laumi og var það málamiðlun gagnvart þeim sem tóku trú alvarlega. Nýr siður var lengi að festa rætur, tíund ekki lögtekin fyrr en um 1100. Heiðnu goðarnir íslenskuðu kaþólskuna með því að gerast kirkjuhöfðingjar.

Staða Íslands andspænis Evrópusambandinu er að breyttu breytanda spurning hvort Íslendingar vilji taka nýja trú. Evrópusambandið er reist á þeirri sannfæringu að þjóðríki fái ekki þrifist í álfunni nema þau séu í samrunaferli og afsali sér fullveldi og forræði eigin mála.

Aðildarsinnar láta einatt eins og Evrópusambandið sé forskrift að alþjóðlegri þróun. Svo er ekki enda sjást þess ekki merki í öðrum heimsálfum að ríki búi sér samband áþekkt ESB. 

Evrópusambandið verður til fyrir sérstakt vandræðaástand í Evrópu sem skapast þegar Þýskaland verður til sem þjóðríki 1871. Þýskaland var búið til úr stríði við Frakka árið áður og hefur ekki verið til friðs síðan, samanber fyrri og seinni heimsstyrjöld.

Evrópusambandið verður til í skjóli Bandaríkjanna sem sátu Vestur-Evrópu framan af kalda stríðinu. Samþætting vesturhluta álfunnar var orðin nógu fjölþætt til að taka inn Austur-Evrópu þegar kalda stríðinu lauk með falli Berlínarmúrsins. Í austri er þó enn spurningum ósvarað, hvort Rússland og nágrannar þeirra Úkraína og Hvíta-Rússland, sem dæmi, verði hluti af Evrópusambandinu.

Endastöð Evrópusambandsins er ókunn. Eimreiðin sem knýr samrunann höktir og skröltir vegna gjaldþrota jaðarríkja er standa ekki undir tapaðri samkeppni vegna sameiginlegs gjaldmiðils sem stýrt í samræmi við þarfir stærsta iðnríkisins í sambandinu, Þýskalands. 

Kaþólska kirkjan átti eftir 500 ára glæsta sögu þegar Íslendingar ákváðu að ganga til liðs við hana. Ekki fyrr en með siðbyltingunni á 16. öld var yfirtaki rómversku kirkjunnar hnekkt á pólitísku og andlegu lífi á meginlandinu. (Og auðvitað átti þýskur vandræðagemsi, Marteinn Lúther, hlut að máli).

Þjóðveldið stóðst atlögu norskra konunga í þúsaldarfjórðung eftir kristnitökuna. Ísland varð síðasta landið byggt norrænum mönnum í vestri til að falla undir Noregskonung, Færeyjar og Grænland urðu fyrr skattlönd konungsvaldsins. Málafylgja kaþólsku kirkjunnar skipti sköpum að brjóta Ísland undir konungsvald. Fyrst hirti kirkjan jarðir höfðingjanna og í framhaldi voru skipaðir útlendir biskupar til að stýra málum þannig að höfðingjarnir skyldu lúta konungi.

Óeining íslensku höfðingjanna á Sturlungaöld ásamt sterku konungsríki í Noregi og atfylgi kaþólsku kirkjunnar leiddi Ísland í faðm Hákonar Hákonarson um miðja 13. öld.

Ísland var hjálenda erlends konungsvalds í rúm 650 ár. Eins og títt er með hjálendur varð Ísland eftirbátur nágrannaríkja í menntun og atvinnuháttum. Heimastjórnin í byrjun 20. aldar gjörbreytti aðstæðum til að skapa hér velmegun. Í fyrri og seinni heimsstyrjöld nýttu Íslendingar tækifærið að losna endalega við hlekki Gamla sáttmála sem höfðingjarnir sóru  Hákoni Hákonarsyni forðum.

Trúin á Evrópusambandið hefur ekki fest rætur á Íslandi. Einn stjórnmálaflokkur, Samfylkingin, flaggaði Evrópusambandsaðild í aðdraganda kosninganna 2003 og 2007 aðeins til að fella merkið í kosningabaráttunni. Samfylkingin sat í hrunstjórninni sem sagði af sér 2009. Á meðan þjóðin var í taugaáfalli bauð Samfylkingin enn á ný Evrópusambandsaðild sem lausn allra mála.

Samfylkingin fékk 29 prósent atkvæðanna í kosningunum 2009 sem þýðir að innan við þriðjungur kosningabærra manna telur Evrópusambandsaðild hagfellda Íslandi.

Evrópusambandið er ekki sannfærandi bandalag fyrir Ísland. 

(Tekið héðan.)

Aðildarsinnar berja í brestina á Evrópudegi

Aðildarsinnar á Íslandi eru fáir, fylgisrýrir og á málefnalegum flótta. Í dag á Evrópudeginum sem tileinkaður er samrunaferli Evrópu segir fátt af rökum aðildarsinna um að Íslandi eigi samleið með Evrópusambandinu.

Gísli Baldvinsson, sem einatt er málflutningsmaður utanríkiráðherra, bloggar í dag um Þorstein Pálsson sem áður var í verktöku hjá Baugi að boða útrás en er nú á mála utanríkisráðherra að kynna Brusselfræði

Þorsteinn hefur góða sýn frá sínum sjónarhóli, sæmilega óháður og dugandi að berja í brestina.

Að berja í brestina er að fela leynda galla. Takk fyrir hreinskilnina, Gísli.

 

ESB-blekkingin, þingið og þjóðin

Sjálfstæðisflokkur, Framsóknarflokkur og Vinstri grænir eru með þá yfirlýstu stefnu að hagsmunum Íslands sé betur borgið utan Evrópusambandsins en innan. Samtals eru þessir flokkar með afgerandi meirihluta á alþingi.

Aðeins einn stjórnmálaflokkur, Samfylkingin, er með aðild Íslands að Evrópusambandinu sem yfirlýsta stefnu.

Ísland er í aðlögunarferli að Evrópusambandinu þrátt fyrir eindregna andstöðu allra stjórnmálaflokka utan Samfylkingar og staðfasta andstöðu þjóðarinnar.

Mál er að linni.

Steingrímur J. afneitar ESB tvisvar á hálfum mánuði

Í tvígang síðustu 14 daga ítrekar formaður Vinstrihreyfingarinnar græns framboðs og fjármálaráðherra að hagsmunum Íslands sé betur borgið utan Evrópusambandsins en innan. Fyrst með grein i Smugunniog nú með viðtali við Dow Jones.

Líklega eru kosningar í nánd.

Stöndum betur utan ESB

Ríkisútsala í Portúgal

Að kröfu Evrópusambandsins þarf Portúgal að selja ríkisflugfélagið TAP og hluti ríkisins í orkuveitum og öðrum rekstri sem hægt er að koma í verð. Þetta eru meðal þeirra skilyrða sem Portúgal eru sett vegna neyðarláns Evrópusambandsins og Alþjóða gjaldeyrissjóðsins.

Önnur skilyrði eru að fækka ríkisstarfsmönnum, frysta laun og draga saman velferðarþjónustu.

Samkvæmt Telegraph verður Portúgal á framfæri Evrópusambandsins næstu tvö árin en eftir það fái landið lán á almennum markaði á sjálfbærum kjörum.

Osama bin Laden var Evrópusinni

Hryðjuverkaleiðtoginn Osama bin Laden hafði ísaumaðar evrur í fötum sínum þótt dollarar séu helsti gjaldmiðillinn í Pakistan næst á eftir lögeyri þarlendra. Andstyggð bin Laden á Bandaríkjunum gæti verið ástæða þess að hann gekk ekki með myndir af forseta lands hinna frjálsu og heimili þeirra hugrökku.

Con Coughlin á Símfréttum telur ástæðuna aðra: bin Laden var Evrópusinni í laumi.

Með 500 evrur og símanúmer

ESB eykur valdheimildir sínar

Sérfræðinefnd með aðild alþýðusambands Svíþjóðar, LO, kemst að þeirri niðurstöðu að nýorðnar breytingar á stofnsamþykktum Evrópusambandsins, svokallaður evru-plús sáttmáli, gefi Brussel heimild til að grípa inn í kjarasamninga aðildarríkja.

Í útgáfu sænska alþýðusambandsinskemur fram að aukin miðstýring frá Brussel vegna fjármálakreppunnar gefi Evrópusambandinu víðtækar valdheimildir til að ráðskast með innanríkismál aðildarríkja s.s. með forskrift um hvernig kjarasamningar skuli gerðir og jafnvel krafist launalækkana.

Þjóðverjar leggja áherslu á aukna miðstýringu Brussel á ríkisfjármálum evru-ríkjanna til að ná tökum á fjármálakreppunni. Í krafti stærðar sinnar getur Þýskaland lagt línurnar. 

(Tekið héðan.)

Sækja um aðild án þess að stefna að henni

Aðlögun að Evrópusambandinu er eina leiðin inn í sambandið. Í Brussel gefa menn sér að þjóð sem sækir um aðild er búin að gera upp við sig að vilja inn í Evrópusambandið. Ísland sótti um aðild í taugaáfalli eftir hrun, þökk sé yfirgangi Samfylkingarinnar og lydduskap Vinstri grænna.

Einar K. Guðfinnsson þingmaður Sjálfstæðisflokksins vakti athygli á því í dag að Evrópusambandið krefðist aðlögunar samhliða viðræðum um aðild. Össur utanríkisráðherra neitar að aðlögun sé krafa frá Brussel en gerir samtímis út stjórnarerindreka sem biðja um undanþágu frá aðlöguninni.

Evrópuvaktin fylgdist með umræðunni á alþingi í dag og vitnar í þingmann Vinstri grænna

Guðfríður Lilja sagði augljóst að gjörólík viðhorf væru til þessara mála hér á landi og í Brussel, þar sem menn áttuðu sig greinilega ekki á því, að þjóð gæti sótt um aðild að ESB án þess að stefna að henni.

Guðfríður Lilja dregur dár að forystu Vinstri grænna sem vill telja fólki trú um að hægt sé að sækja um aðild að Evrópusambandinu án þess að stefna að aðild. Blekkingin verðu okkur dýrkeyptari eftir því sem hún stendur lengur. Við eigum að kannast við stöðu málsins og draga umsóknina tilbaka.

Grímulaus tilhneiging til ESB-aðlögunar