Ísland i hernaðarsamstarfi ESB

Evrópusambandið byggir upp hernaðarmátt sinn til að geta staðið undir nafni sem stórveldi. Samninganefnd Íslands um aðild að Evrópusambandinu fór fram á undanþágu frá því að taka þátt í hernaðaruppbyggingu ESB. Í grein í Fréttablaðinu í dag skrifar forysta samninganefndar Íslands

Í viðræðunum við ESB lagði samninganefndin þunga áherslu á herleysi Íslands. Evrópusambandsríkin viðurkenna að fullu þessa sérstöðu sem birtist í sérstakri yfirlýsingu sem verður hluti af aðildarsamningi. Þótt utanríkis-, öryggis- og varnarmálin séu vissulega að fullu á forræði aðildarríkjanna er þessi yfirlýsing mikilvæg og undirstrikar þá einstöku stöðu sem Ísland hefur að þessu leyti.

Grein þeirra Stefáns Hauks Jóhannessonar formanns samninganefndar Íslands og tveggja varaformanna staðfestir þrennt sem hefur verið umdeilt um umræðunni á Íslandi.

a) ESB er með her og hyggst byggja upp hernaðarmátt - annars þyrfti enga yfirlýsingu.

b) Ísland fær ekki varanlega undanþágu frá hernaðarsamstarfi ESB, þar sem ekkert mun standa um undanþágu í aðildarsamningi.

c) Ísland fær sérstaka yfirlýsingu um að tekið verði tillit til herleysis landsins. Þessi yfirlýsing getur hvenær sem er verið numin úr gildi, t.d. af dómsstól Evrópusambandsins.

 

Samtök iðnaðarins vilja hvorki ESB né evru

Enn einu sinni er staðfest einangrun sértrúarsafnaðar Samfylkingar. Samtök iðnaðarins, sem hafa verið einu samtökin er styðja ESB-umsóknina, eru á stórflótta frá málinu.

Um 70 prósent aðildarfélaga Samtaka iðnaðarins eru á móti aðild Íslands að Evrópusambandinu. Þá er meirihluti félagsmanna á móti upptöku evru.

Meirihluti aðildarfélaga Samtaka iðnaðarins eru með óbrjálaða dómgreind, rétt eins og meirihluti þjóðarinnar. Illu heilli er stjórnarráðið hersetið af sértrúarsöfnuði sem ekki hlustar á nein rök.

 

Iðnaðurinn á móti aðild að ESB

Íslensk umræða um ESB eða ESB-umræða um Ísland

Evrópusambandið freistar þess að kaupa sér vilhalla umræðu um aðild Íslands að sambandinu. Evrópusambandinu er í lófa lagið að teppaleggja með evrum alla króka og kima umræðunnar á Íslandi.

Evrópustofa, sem hefur úr yfir 200 milljónum króna að ráða, efnir til funda og útgáfu með það að markmiði að fegra málstaðinn. Hvergi á fundum eða útgáfum Evrópustofu er rætt um tilvistarvanda ESB né heldur skuldakreppu aðildarríkjanna sem kikna undan ósveigjanleika sameiginlegrar myntar.

Þegar fyrir liggur að Evrópusambandið ætlar að bera fé á landsmenn vegna aðildarumsóknar samfylkingarhluta ríkisvaldsins þá er lágmark að þær opinberu stofnanir sem eiga að hafa fagmennsku og hlutlægni að leiðarljósi láti ekki glepjast.

Spyr um samskipti RÚV við ESB

Þjóðaratkvæði um ESB-umsókn

Þingmenn Vinstrihreyfingarinnar græns framboðs voru án umboðs kjósenda sinna þegar þeir 16. júlí 2009 greiddu atkvæði með þingsályktun Össurar Skarphéðinssonar um að sækja um aðild að Evrópusambandinu.

Yfirlýst stefna VG var og er að Íslandi sé betur borgið utan ESB en innan. Út á þá stefnu náðu þingmenn VG kjöri vorið 2009. Samfylkingin, sem einn flokka er með ESB-aðild á stefnuskrá sinni, fékk 29 prósent atkvæðanna í þingkosningunum.

Án svika þingmanna VG við kjósendur sína hefði umsókn ekki verið send til Brussel. Lýðræðislegur vilji þjóðarinnar stendur ekki til þess að ganga í Evrópusambandið.

Umsóknina um ESB-aðild Íslands ber að afturkalla. Til vara má efna til þjóðaratkvæðagreiðslu um það hvort við viljum halda áhugamáli Samfylkingarinnar til streitu.

Vilja fá að kjósa um aðildarviðræður

EES er innan við 10% af ESB-aðild

Verulega stórir málaflokkar standa utan EES-samningsins, svo sem landbúnaður, sjávarútvegur, tollamál, viðskiptasamningar við önnur ríki og peningamál. A árabilinu 2000 til 2009 tóku gildi í Evrópusambandinu samtals 34 733 tilskipanir, reglur og aðrir löggjörningar. Aðeins rúmlega þrjú þúsund (3 119) af þessum löggjörningum fengu gildi í EES-samningnum, eða 8,9 prósent.

Upplýsingarnar eru sóttar úr gagnabönkum og gefa raunsanna mynd af hlutfalli ESB löggjörninga sem teknir eru upp í EES-samningnum.

Ef EES-samningnum yrði sagt upp myndu sjálfkrafa taka gildi fríverslunarsamningar sem voru í gildi áður en EES-samningurinn var gerður, sbr. 120. grein samningsins.

Við getum róleg sagt upp EES-samningnum og kvatt Evrópusambandið áður en það sekkur undan eigin þunga.

Fredrik Sejersted, prófessor og formaður norsku EES-endurskoðunarnefndarinnar og Ulf Sverdrup, prófessor og framkvæmdastjóri nefndarinnar kynntu niðurstöður nefndarinnar með fyrirlestri í Þjóðarbókhlöðunni í dag.

Enginn áhugi er í Noregi að ganga í Evrópusambandið. Allar líkur eru á að EES-samningurinn muni halda gildi sínu um sinn þótt vaxandi krafa sé í norskri umræðu að endurskoða samninginn og færa hann í búning tvíhliða samkomulags.

Tvöfeldni í ESB-viðræðum

Þögn ríkir um viðræður íslenskra ráðherra við æðstu embættismenn Evrópusambandsins. Í þessum viðræðum kemur framraunveruleg staða ESB-umsóknar Íslands. Steingrímur J. Sigfússon allsherjarráðherra fór í heimsókn til Brussel upp úr áramótum og ræddi þar við embættismenn ESB. Í frétt mbl.is segir af fyrirspurn Ragnheiðar Elínar Árnadóttur þingmanns Sjálfstæðisflokksins um þessa ferð Steingríms.

Þingmaðurinn kallaði eftir því að fleiri gögn tengd málinu væru sett á netið og þannig gerð aðgengileg almenningi. Spurði hún sérstaklega um fundargerðir vegna funda Steingríms J. Sigfússonar, sjávarútvegs- og landbúnaðarráðherra, með ráðamönnum innan Evrópusambandsins á þessu ári. Í það minnsta væri æskilegt að utanríkismálanefnd væri upplýst um þau gögn.

Sagðist Össur ekki hlynntur því að setja slíkt efni á netið enda færu fram trúnaðarsamtöl á slíkum fundum. Mikilvægt væri að þeir sem íslenskir ráðamenn ræddu við gætu treyst því að trúnaður ríkti um þau samtöl og að þau væru ekki komin í fjölmiðla strax á eftir. Það væri líka ávísun á að menn ræddu málin á mun opinskárri hátt en ella.

Ráðamenn Íslands eru upplýstir um raunverulega stöðu aðildarviðræðnanna við Evrópusambandið. Gagnvart almenningi er aftur á móti alið á blekkingum um stöðu mála.

Vilja meira samráð við þingið

RÚV selur sig ESB

Auglýsing Evrópusambandsins um byggðastyrki sæmdi sér álíka vel í Landanum og krækiber í helvíti. RÚV er opinbert fyrirtæki og þarf að gera grein fyrir þeirri nýrri stefnu að flytja auglýsingar í dagskrárliðum.

Hver fékk greiðslu fyrir auglýsinguna? RÚV sjálft? Hver er auglýsingataxtinn?

RÚV er komið á hálan ís.

Björn sakar RÚV um áróður

Evru-lönd betla í Asíu, verðbólga á uppleið

Evrópusambandið er á kúpunni og leitar ásjár hjá asískum fjárfestum að kaupa eignir og rekstur í iðnríkjum gömlu Evrópu. Horfurnar eru ekki góðar. Viðvarandi ójafnvægi er á milli Norður-Evrópu, sem er í þokkalegum málum, og Suður-Evrópu þar sem sum ríki eru gjaldþrota en önnur á leiðinni í þrot, s.s. Portúgal og Spánn.

Spáð er viðvarandi árlegri verðbólgu upp á 3 til 4 prósent í evru-landi. Það er langt yfir verðbólgumarkmiði upp á tvö prósent. Skýringin á verðbólguhorfunum er ódýru lánin frá Seðlabanka Evrópu sem prentar peninga til að forðast ríkisgjaldþrot sunnarlega í álfunni.

Þjóðverjar, sem borga stærstan hluta af björgunaraðgerðum fyrir Suður-Evrópu, munu ekki láta verðbólgu yfir sig ganga þegjandi og hljóðalaust.

Reynir að selja Ítalíu til Asíu

Enginn nennir að tala við Jóhönnu

Forsætisráðherra bauð upp á þjóðarsátt um evru og Evrópusambandið, en enginn hefur fyrir því að svara Jóhönnu Sigurðardóttur segir Þorsteinn Pálsson í pistli í Fréttablaðinu.

Þorsteinn er hluti af fámennum hópi sjálfstæðismanna sem vill Ísland í Evrópusambandið og er trúnaðarmaður Össurar Skarphéðinssonar utanríkisráðherra. Þorsteinn sér ekkert nema svarnætti framundan fyrir aðildarsinna.

Að þessu virtu er ljóst að forsætisráðherra ber pólitíska ábyrgð á þeirri erfiðu stöðu sem aðildarumsóknin er komin í. Nái frjálslyndari armur Samfylkingarinnar ekki vopnum sínum missir flokkurinn einfaldlega allan trúverðugleika sem forystuflokkur fyrir nýrri peningapólitík og Evrópusambandsaðild. Verkurinn er sá að ekki er ljóst hver gæti tekið við því kefli að kosningum loknum.

Enginn nennir að tala við Jóhönnu og enginn vill bera ábyrgð á ESB-umsókninni. Er ekki sjálfhætt?

Leiðindi til langs tíma í ESB

Evrópusambandið stefnir á langt hnignunarskeið með litlum hagvexti, miklu atvinnuleysi og pólitísku þrátefli. Evru-samstarfið og óhemju tíma- og fjármagnsfrekir björgunarleiðangrar fyrir skuldug ríki munu draga allan þrótt úr samstarfinu.

Deilur um hverjir eigi að bera afskriftir að óráðssíu Suður-Evrópuríkja í áratug munu setja mark sitt á samstarfið í Brussel.

Ísland á ekkert erindi með sín málefni inn í þessa moðsuðu þarna suður frá.

Merkel: Evrukreppunni ekki enn lokið