Samræmdar salernisferðir í ESB

Ein af jákvæðari fréttum frá Evrópusambandinu þessa dagana er tilraun framkvæmdastjórnar sambandsins til þess að spara vatn sem er af skornum skammti á svæðinu. Þetta er gert meðal annars með því að hanna salerniskassa í þessu skyni. Ekki eru þó allir sáttir við aðgerðirnar.

Evrópuvaktin segir frá þessu - sjá hér.

Enn sama atvinnuleysið á evrusvæðinu

Nýjar upplýsingar benda til þess að atvinnuleysið á evrusvæðinu sé enn það sama í heild, eða um 12,2 prósent af vinnuafli. Samtals gera þetta 19,5 milljónir manna í löndunum sautján.

Samkvæmt Hagstofu Íslands var atvinnuleysi hér á landi 5,2% í síðasta mánuði.

19,5 milljónir án atvinnu á evrusvæðinu

ESB ætlar að reyna að þvinga okkur til að flytja inn hrátt kjöt

Stofnanir ESB virðast ætla að reyna að þvinga okkur til að hverfa frá þeim reglum sem gilda hér á landi um bann við innflutning á hráu kjöti. Eins og vitað er getur bann við slíku komið í veg fyrir ýmsa sjúkdóma.

Mbl.is greinir frá þessu eins og sést á meðfylgjandi frétt.

Takmarkanir á innflutningi andstæðar EES-samningi

Af hverju getum við ekki bara tekið upp evru?

Sumir hafa haldið því fram að það myndi gera okkur auðveldara að stýra efnahagsmálunum á farsælan hátt ef við tækjum upp evru. En hvers vegna hefur það þá ekki verið gert nú þegar?

1. Við erum ekki í Evrópusambandinu. ESB er ekki hlynnt því að ríki taki upp evru nema það vilji vera í Evrópusambandinu. Ítrekað hefur komið fram í skoðanakönnunum að Íslendingar vilja ekki vera í Evrópusambandinu.

2. Einhliða upptaka á evru væri kostnaðarsöm. Stjórnvöld þyrftu að kaupa það reiðufé sem er í umferð. Nú er það ríflega 40 milljarðar króna, en margir telja að það þyrfti að vera talsvert meira við einhliða upptöku. Svokallaður myntsláttuhagnaður ríkisins (Seðlabankans), einhverjir milljarðar á ári, myndi einnig tapast.

3. Með evru værum við háð peningastjórn ESB, það er vaxtastefnu Seðlabanka Evrópu. Skýrslur hagfræðinga hafa ítrekað sýnt, nú síðast skýrsla Seðlabankans um gjaldmiðlamál sem kom út fyrir ári, að það hentar ekki að vera með sömu peningastjórn hér á landi og í Evrópu. Hagsveiflur eru annars konar, þannig að þegar uppsveifla er í Evrópu og verðbólguþrýstingur sem kallar á vaxtahækkun Seðlabanka Evrópu, þá er oft niðursveifla hér sem myndi kalla á vaxtalækkun. Slíkt misræmi í hagsveiflum gæti ýmist kallað á óþarflega mikið atvinnuleysi hér eða verðbólgu.

4. Hagkerfin í evrulöndunum eru flest talsvert ólík hagkerfinu hér á landi. Utanríkisviðskipti Íslands eru gjörólík utanríkisviðskiptum evrulandanna, framleiðslan er sömuleiðis frábrugðin í veigamiklum atriðum, auk þess sem húsnæðismarkaður og lífeyriskerfi er talsvert frábrugðið því sem er í flestum landanna. Rök evrusinna eru oft þau að þótt hagsveiflur og hagkerfi geti verið ólík í myntsamstarfi til að byrja með þá aðlagist þau. Það er erfitt að sjá það fyrir, t.d. varðandi sjávarútveginn, jafnvel þótt ónýttir flotar evruþjóðanna fengju að veiða í ríkari mæli hér við land.

5. Því er stundum haldið fram að kostnaður við að skipta úr einni mynt í aðra í viðskiptum sé svo mikill að það myndi borga sig þess vegna að taka upp sama gjaldmiðil og er á okkar helsta viðskiptasvæði. Þessu er til að svara að flestir hagfræðingar eru þeirrar skoðunar í dag, meðal annars í Danmörku sem er í ESB en ekki með evru, að þessi kostnaður sé svo lítill að hann skipti engu máli þegar heildardæmið er gert upp. Þess vegna meðal annars höfnuðu Danir evrunni.

6. Ástandið í mörgum evrulöndum er víti til varnaðar. Atvinnuleysi er að meðaltali 12 prósent, nær 30% á Spáni og í Grikklandi, auk þess sem atvinnuleysi meðal ungs fólks er víða um 50%. Þetta veldur viðvarandi fátæktargildru meðal stórs hóps í evrulöndunum. Hin sameiginlega mynt, evran, og sameiginleg peningastefna eru meðal veigamestu ástæðum fyrir þessu ástandi.

Gunnar Bragi segir ESB verða æ ólýðræðislegra

Gunnar Bragi Sveinsson, utanríkisráðherra, vonast til þess að Ísland gangi aldrei í Evrópusambandið. Hann segir ESB verða æ miðstýrðara og valdið sé að færast frá fullvalda ríkjum til embættismanna sem ekki þurfi að taka mið af lýðræðislegu ferli með sama hætti og aðrir.

Eyjan greinir frá þessu.

Þar er vitnað í viðtal sem starfsmaður Bloomberg fréttaveitunnar tók við ráðherrann.

Grikkir gefast upp

Forystumenn Grikkja segja að þeir geti ekki tekið á sig meiri byrðar vegna skuldamála. Þeir láti ekki undan frekari kúgunum Evrópusambandsins og AGS.

Þetta kemur fram á vefnum mbl.is

Þar segir:

Grikkir hafa gert það sem í þeirra valdi stendur til þess að vinna bug á kreppunni og það verður Evrópa að virða, segir Karolos Papoulias forseti Grikklands. Hann segir þjóð sína ekki geta gert meira.

Þetta kom fram í máli forsetans þegar hann hélt ræðu eftir hersýningu í Þessalónikíu í dag þar sem andspyrnu Grikkja við fasisma var minnst.

„Gríska þjóðin getur ekki gert meira.. þetta eru okkar skilaboð. Og þeir ættu að vita að við látum ekki undan kúgunum. Það höfum við aldrei gert,“ segir Papoulias, sem oft tuskar lánadrottna Grikklands, Alþjóðagjaldeyrissjóðinn og Evrópusambandið, til í ræðum sínum.

Snemma í nóvember munu starfsmenn ESB, AGS og Seðlabanka Evrópu fara yfir stöðu mála í Grikklandi en þar verður metið hvort lán upp á einn milljarð evra verður veitt.

Grikkir geta ekki meira

Fiskveiðifloti ESB er þrisvar sinnum of stór

Fjöldi fiskiskipa ESB-ríkjanna er allt að þrisvar sinnum stærri en þörf er á. Það er álit framkvæmdastjórnar ESB. Samt er ennþá mikill vilji til að niðurgreiða skipasmíðar á svæðinu og tókst með naumindum í síðustu viku að koma í veg fyrir samþykkt tillögu um slíkt.

Europaportalen.se greinir frá þessu.

Í sárabætur fá útgerðir 85 þúsund skipa þó styrk til að skipta um vélar í skipum sínum. Við vitum þá hvert verkefnalausar útgerðir í ESB munu horfa á næstu árum ef íslensk yfirvöld halda áfram aðlögun að sambandinu. Á Íslandsmiðum er góður makríll og margt fleira ......

Sigmundur Davíð Gunnlaugsson og sögufalsanir ESB-aðildarsinna

Það voru athyglisverð ummæli Sigmundar Davíðs Gunnlaugssonar forsætisráðherra á Bylgjunni í morgun að sumir hópar og fjölmiðlar séu að reyna að endurhanna raunveruleikann, þ.e. að falsa hann. Hann tiltók sem dæmi utanríkisstefnu ríkisstjórnarinnar.

Sigmundur kom þarna inn á það sem kalla má spunameistara í fjölmiðlum. Þeir eru margir og sumir hverjir ansi góðir. Eins og Sigmundur nefndi er algengt að slíkir spunameistarar reyni að hanna atburðarás. Hins vegar er það nýtt, sagði Sigmundur, að þessir aðilar eru að reyna að endurhanna raunveruleikann í huga fólks. Og þeim virðist hafa tekist þokkalega upp því þeim er trúað á ýmsum stöðum.

Dæmi um þetta er hvernig nokkrir fjölmiðlar og hópar hafa reynt að endurhanna það sem raunverulega stendur í stjórnarsáttmála ríkisstjórnarinnar um ESB-málið. Þessir hópar hafa reynt að halda því fram að ríkisstjórnin hafi lofað þjóðaratkvæði um áframhald viðræðnanna.

Ýmsir virðast trúa þessu og halda fram þessari firru í tíma og ótíma, svo sem heyra má oft í umfjöllun RUV og 365 miðla.

Þessir hópar og fréttamenn virðast hins vegar ekki hafa lesið stjórnarsáttmálann né þær samþykktir flokkanna sem hann byggir á.

Ríkisstjórnin hefur hvergi lofað þjóðaratkvæði - eins og margoft hefur verið sýnt fram á á þessari bloggsíðu.

Landsfundur Sjálfstæðisflokksins lofaði ekki þjóðaratkvæðagreiðslu - og það gerði flokksþing Framsóknarflokksins ekki heldur.

Stjórnin og flokkarnir eru á móti aðild að ESB. Ríkisstjórnin er á móti aðild að ESB. Ríkisstjórnin lofaði að gera hlé á viðræðum við ESB. Hún lofaði einnig að taka saman skýrslu um stöðu viðræðna.

Síðan segir ríkisstjórnin, Sjálfstæðismenn og Framsóknarflokkurinn, þ.e. æðstu samkundur þeirra:

Fari svo (ólíklega má bæta við) að halda eigi áfram viðræðum verður það ekki gert NEMA að undangenginni þjóðaratkvæðagreiðslu.

Þetta hefur orðið í munni sumra fjölmiðlamanna og ESB-sinna að loforði stjórnarinnar eða einstakra ráðherra um að halda skuli þjóðaratkvæðagreiðslu. Og þessum aðilum virðist hafa orðið nokkuð ágengt í þessari sögufölsun sinni.

Þetta er náttúrulega verulegt umhugsunarefni - og mjög athyglisvert af Sigmundi Davíð að benda á þessar skipulögðu tilraunir ýmissa til að endurhanna veruleikann - þ.e. falsa söguna.

Efnahagslegir og pólitískir erfiðleikar ESB í erlendum fjölmiðlum

Í erlendum fjölmiðlum má lesa þessa dagana að ekki hafi tekist að leysa þau vandamál sem valda efnahagslegum erfiðleikum í ESB, pólitísk kreppa geti verið framundan vegna stöðugs niðurskurðar í rekstri hins opinbera og ef til vill verði eina lausnin tvískipting ESB.

Páll Vilhjálmsson greinir hér frá því helsta hvað þetta varðar í erlendum miðlum nýverið:

Næsta kreppa í ESB og tvískipting sambandsins

Blindir fjölmiðlar í ESB og umbótatilraunir úti í mýri

Það er merkileg lesning á vefmiðlinum Eyjunni um árangurslausan leiðtogafund ESB og lok kreppunnar í augum fjölmiðla. Textinn lýsir fálmkenndum umbótatilraunum leiðtoga ESB og alvarlegum efnahagserfiðleikum víða í álfunni.

Hægr er að skoða textann hér: Árangurslaus leiðtogafundur í ESB - kreppunni er lokið í augum fjölmiðla

Eitt er víst: Kreppunni er ekki lokið í augum þeirra tugmilljóna sem ganga atvinnulausar í ESB.