Bjarni Benediktsson segir evrusamstarfið valda katastrófu í Evrópu

Bjarni Benediktsson, fjármálaráðherra og formaður Sjálfstæðisflokksins, sagði í viðtali við Gísla Martein Baldursson í morgunsjónvarpsþætti Ríkisútvarpsins að evrusamstarfið hefði í för með sér algöra katastrófu fyrir mörg evruríki.

 

Bjarni sagði að þróunin síðustu ár hefðu sannfært hann um að það væri ekki gott að hafa sameiginlega mynt þegar efnahagskerfin færu ólík. Það sæist meðal annars á því að ríkin á suðurhluta evrusvæðisins hefðu verið að safna gífurlega miklum ríkisskuldum.

 

Þegar skýrsla Hagfræðistofnunar um ESB-málin kemur út verður án efa rætt miklu meira um erfiðleikana á evrusvæðiðinu, þ.e. gífurlegt atvinnuleysi, vaxandi fátækt og mikla skuldasöfnun jaðarríkjanna.

Gísli Marteinn leiðréttur um afstöðuna til krónunnar

Það var einkennileg áhersla hjá Gísla Marteini að segja í upphafi sjónvarsþáttar síns í dag að helmingur þjóðarinnar vildi losna við krónuna þegar stuðningur við krónuna hefur aukist verulega á undanförnum árum og samkvæmt nýlegri skoðanakönnun vilji nú meira en helmgingur Íslendinga halda krónunni. Óljóst er hvað hinn helmgingurinn vill því það kom ekki fram í skoðanakönnuninni. 

Það var ekki minnst á evruna. 

Rétt fréttamat hjá Gísla hefði verið að stuðningur við krónuna hefði stóraukist á undanförnum árum og að ríflega helmgingur þjóðarinnar vildi nú halda krónunni.  

Flokksráðsfundur Vinstri grænna þegir um ESB-málið

Katrín Jakobsdóttir minntist ekki einu orðið á ESB-málið í ræðu sinni á flokksráðsfundi Vinstri grænna sem haldinn var í vikunni. Hún varð líka undir á fundi flokksins fyrir ári þegar ályktað var að gefa umsóknarviðræðum eitt ár til viðbótar. Hún var ekki á því heldur vildi þá láta kjósa um áframhaldið.

Nú er árið liðið og því er kannski eðlilegt að Vinstri græn telji enga ástæðu til þess að ræða um ESB, eða álykta sérstaklega um það.

Það er þá kannski kominn tími til að Vinstri græn fari nú að vinna að því að fylgja því stefnumáli sínu eftir að halda Íslandi utan ESB. Því verður tekið fagnandi. 

 

Þjóðaratkvæðagreiðsla í Sviss á morgun gæti haft áhrif á samskiptin við ESB

Á morgun verður þjóðaratkvæðagreiðsla í Sviss sem gæti haft áhrif á samskipti landsins við ESB og þá einkum viðskipti á innri markaði ESB. Atkvæðagreiðslan tekur til flóttamanna sem sækja til Sviss, m.a. svokallaðra efnahagslegra flóttamanna frá fátækari ríkjum ESB og svo til Þjóðverja sem sækja til Sviss til að komast hjá sköttum í Þýskalandi.

Samkvæmt skoðanakönnunum styður helmingur Svisslendinga þær þrengingar á möguleikum útlendinga til að búsetja sig í Sviss sem lagðar eru til í þjóðaratkvæðagreiðslunni. Ríflega fjörutíu prósent eru á móti. Verði þetta samþykkt getur það sett strik í reikning samskipta Sviss og ESB. Samhliða þessum kosningum eru þó umræður um það í Sviss að það gæti verið gott fyrir Svisslendinga að fara þessa leið því líkur séu á að Bretar yfirgefi ESB á næstu árum og slíkt myndi styðja við málstað þeirra sem vilja ná þessum breytingum í gegn.

 EUobserver greinir frá þessu. 

Milljarður króna í kosningaáróður fyrir ESB í Svíþjóð

Svíar hafa lítinn áhuga á ESB. Aðeins 20% segjast ætla að kjósa í kosningum til ESB-þingsins í vor. Fæstir þekkja til þeirra þingmanna sem sitjaá ESB-þingi fyrir Svía. Og flestir Svía telja að ESB-þingið komi þeim að litlu haldi.

Við svo búið má ekki standa segir Evrópumálaráðherra Svía. Hún ætlar að því að verja sem svarar einum milljarði íslenskra króna til þess að lokka Svía að kjörborðinu í vor. 

Ætli það væri nú ekki hægt að verja þeim fjármunum betur? 

Ólafur Þ. Stephensen sér ekki fátæktina sem evran veldur í ESB

Ólafur Þ. Stephensen ritstjóri  Fréttablaðsins sér ekki þá fátækt og þá upplausn sem evran veldur í stórum hluta ESB-landanna. Hann neitar að viðurkenna þá hyldýpisgjá sem þessi mynt veldur í afkomu íbúa álfunnar þegar Þjóðverjar og fáeinir aðrir hagnast en jaðarlöndin búa við viðskiptahalla, skuldasöfnun og atvinnuleysi.

Ritstjórinn segir í forystugrein í dag að það fari ekki á milli mála að Evrópusambandið hafi lifað evrukrísuna af. Það er út af fyrir sig framför að ritstjórinn skuli viðurkenna að evran hafi verið í krísu. Það er auk þess öllum ljóst að ESB lafir og íbúafjöldinn er svipaður og áður. ESB-elítan lifir líka góðu lífi. Hin vegar búa tugir milljóna við fátækt af völdum atvinnuleysis og samdráttar í útgjöldum til velferðarmála. Þá eymd sér ritstjórin ekki.

Í ljósi þess að ritstjórinn hefur í áratugi barist fyrir því að Ísland gerist aðili að ESB hlýtur að teljast merkilegt að hann sé þeirrar skoðunar að sjávarútvegsstefna ESB sé ekki aðgengileg fyrir Íslendinga, réttara sagt: ekki að öllu leyti aðgengileg. En svo öllu sé til haga haldið í málflutningi ritstjórans þá skiptir þetta engu máli vegna þess að hann segir að ýmsir forystumenn ESB hafi lýst því yfir að ESB sé reiðubúið að finna lausnir til að gera Íslendinga hamingjusama í þessum efnum.

Ef einhver á erfitt á að átta sig á aðal- og aukaatriðum í umræðu um sjávarútvegsstefnuna skal bent á ágætan pistil Styrmis Gunnarssonar á Evrópuvaktinni.  Þar segir Styrmir:

Enginn getur mótmælt því að með aðild að ESB mundu formleg yfirráð yfir fiskimiðunum við Ísland færast til Brussel og allar formlegar ákvarðanir um nýtingu þeirra teknar þar. Enginn getur heldur mótmælt því að með aðild mundi samningsumboðið vegna deilistofna á Norður-Atlantshafi færast frá stjórnvöldum á Íslandi til Brussel. Enginn getur heldur neitað því að hugsanlegar undanþágur vegna fiskveiðistefnu ESB yrðu alltaf tímabundnar og aldrei varanlegar.

Þetta eitt og sér sýnir auðvitað að aðild Íslands að ESB er óhugsandi. 

Því má svo bæta við hér í lokin að líklega yrði það hagstæðara fyrir þá Evrópubúa sem nú búa við fátækt vegna evrunnar að Íslendingar haldi áfram að stjórna fiskveiðum við Íslandsstrendur og færa þeim mat en að óstjórn ESB á fiskimiðum sambandsins færist yfir landhelgi Íslands.  

 

Brynjar Níelsson segir ESB-viðræður ekki ganga upp

Vandamálið er það  að fyrri ríkisstjórn kláraði ekki þessar viðræður. Síðan kemur ný stjórn sem hefur ekki áhuga á að ganga í ESB. 

Þetta segir Brynjar Níelsson í samtali vi Fréttablaðið í dag. Hann segir ennfremur:

Það er voða erfitt fyrir ESB að ara í viðræður við ríkissjórn sem hefur ekki áhuga á því að ganga í bandalagið. Fyrir mér gengur þetta ekki upp.  

Seðlabanki Evrópu tekur sér of mikið vald

Þjóðverjar eru nú á því að Seðlabanki Evrópu hafi farið út fyrir verksvið sitt. Stjórnarskrárdómstóll Þýskalands er þeirrar skoðunar og vill að ESB-dómstóllinn dæmi um hvort heimilt hafi verið fyrir Seðlabanka Evrópu að samþykkja áætlun um stórfelld kaup á ríkisverðbréfum.

 

EUobserver greinir frá þessu.  Sjá einnig hér. 

 

 

Nú er ársfrestur ESB-umsóknar VG liðinn

Fyrir nákvæmlega ári sögðust Vinstri græn gefa ESB-viðræðunum ár til viðbótar. Nú er það ár liðið. Enginn árangur varð af viðræðum sem reyndar runnu út í sandinn fljótlega eftir fund Vinstri grænna í fyrra sem samþykkti ályktun um árs frest. Er þá ekki kominn tími til að Vinstri græn fylgi þeirri stefnu sinni að halda Íslandi utan ESB?

„Í hópi ójafnaðarmanna“

Eru Íslendingar hættulegir heimsbyggðinni?

Það er svolítið merkilegt að fylgjast með umræðu ESB-sinna núna. Vegna ESB-umsóknarinnar skolaði hingað upp á land þýskum sérfræðingi í meðferð matvæla. Sérfræðingurinn greindi frá þeirri vel þekktu staðreynd að það gætu verið bakteríur í kjöti.

Það er alkunna að bakteríur af tiltekinni gerð og magni geta haft afleiðingar. En það er andskoti merkilegt að RUV og Eyjunni skuli detta í hug að íslenskt kjöt með slíkum bakteríum gæti aðeins sýkt Evrópubúa - eins og lesa má m.a. í fyrirsögnum á RUV og Eyjunni.

Hvað með Bandaríkjamenn? Kanadamenn? Íbúa utan Evrópu? Yrðu þeir ónæmir fyrir bakteríum í íslensku kjöti.

RUV og Eyjunni tóks að gera "ekki frétt" um að bakteríur gætu verið í kjöti að frétt um að íslenskar afurðir gætu sett í búa Evrópu í stórhættu. Fyrst og fremst íbúa Evrópu.  

Næstu fréttir verða vafalaust um hvað heimurinn er mikið á móti hvalveiðum Íslendinga þrátt fyrir að þær veiðar ættu samkvæmt ráðgjöf vísindamanna að vera sjálfbærar.