Embættismenn á eigin vegum?

Það er löng leið frá fólkinu til þeirra sem sjá um framkvæmd mála í ESB. Lítið dæmi um það eru ummæli Ceciliu Malmström, fulltrúa Svía í framkvæmdastjórn ESB, framkvæmdastjóra viðskiptamála, sem segist ekki þiggja umboð sitt frá fólkinu í ESB-löndunum heldur frá ráðherraráði ESB þegar hún semur um alþjóðaviðskiptasamninginn TTIP sem valdið hefur mikilli andstöðu meðal fólks í álfunni.

Starfsmenn og embættismenn ESB starfa oft í eigin heimi - fjarri heimi venjulegs fólks. Það má velta því fyrir sér hvort þetta gildi um embættismenn almennt. Fundurinn sem Dögun hélt á dögunum um annan alþjóðlegan viðskiptasamning, TISA, vekur upp spurningar um þetta. Þar kom í ljós að embættismenn ríkisins eru að vinna að alþjóðlegum samningi um þjónustuviðskipti sem getur komið til með að hafa mikil áhrif án þess að stjórnmálamenn geri sér almennt grein fyrir málinu eða hafi mikla vitneskju um það.

Þetta vekur allt upp spurningar um það hvort umboðskeðjan frá almenningi til embættismanna sé ekki það löng og krókótt að varla er hægt að tala um raunverulegt lýðræði lengur, sérstaklega í ljósi þess að gegnsæi þegar kemur að vinnu embættismanna er oft takmarkað af ýmsum reglum og venjum. 

 

Fjör á fundi Heimssýnar með Pírötum

Ásta Guðrún Helgadóttir, þingmaður Pírata, hafði framsögu um ESB-málin á opnum stjórnarfundi Heimssýnar sem haldinn var í Iðnó í fyrrakvöld. Ásta Guðrún svaraði svo spurningum fundarmanna og tók þátt í líflegum umræðum um ýmsa þætti ESB-málanna. Meðal þess sem kom fram hjá Ástu var að Píratar vilja að haldin verði þjóðaratkvæðagreiðsla um það hvort halda skuli áfram viðræðum um aðild Íslands að ESB eða ekki.

Ásta nefndi ýmsa kosti þess að vera hluti af ESB, og nefndi sérstaklega jafnréttismál í því samhengi og einnig friðarmál, en tiltók einnig neikvæð atriði sem því fylgdi eins og aukið skrifræði.

Ásta fullyrti að umsókn Íslands að ESB væri í raun í fullu gildi og að með bréfi utanríkisráðherra til ESB hefði verið gengið framhjá þinginu. Hún sagði jafnframt að ef hætta ætti viðræðum þyrfti að semja sérstaklega um það við ESB. Þegar talið barst að undanþágum frá ákvæðum sem hingað til hafa gilt hjá ESB, t.d. varðandi fiskveiðimál, var á Ástu að skilja að hún teldi ESB væri þess eðlis að það gæti ekki veitt neinar varanlegar undanþágur frá regluverki um slíka hluti. Hins vegar sagði hún það skoðun sína að það yrði að halda áfram samningaviðræðum til þess að sjá hvað út úr þeim kæmi.

Almennt var gerður góður rómur að málflutningi Ástu þótt fundarmenn hefðu margir hverjir aðrar skoðanir og í sumu annan skilning á stöðu mála og var ljóst að umræðan var hvergi nærri tæmd á þeim tíma sem til umráða var. Því er þess vænst að við fáum að eiga orðastað við þingmenn Pírata aftur áður en langt um líður.

Heimssýn hefur fengið fulltrúa ýmissa stjórnmálaflokka á fund með sér til að ræða um Evrópumálin. Meðal þeirra sem hafa nýverið komið á fundi hjá Heimssýn eru Árni Páll Árnason, formaður Samfylkingarinnar og Birgir Ármannsson, þingmaður Sjálfstæðisflokksins og fyrrverandi formaður utanríkismálanefndar. Von er á fleiri fundum af þessu tagi.

Á myndinni eru Ásta Guðrún Helgadóttir, þingmaður Pírata, og Jón Bjarnason, formaður Heimssýnar og fyrrverandi ráðherra, við upphaf fundarins í fyrrakvöld.

Rányrkja evrópskra togara við Afríkustrendur áhyggjuefni

Sid Ahmed Raiss efnahagsráðherra Máritaníu skrifar á EU opserver grein um fiskveiðar erlendra verksmiðjutogara. Þrátt fyrir vinsamleg ummæli í garð Evrópusambandsins vegna nýlegra samninga er þungur undirtónn í skrifum ráðherrans sem hefur áhyggjur af ofveiði og rányrkju sem muni ræna Márítana möguleikunum á að brauðfæða þjóð sína. Marítanía er fátækt og afar frumstætt eyðimerkurríki á vesturströnd Afríku en úti fyrir eru afar gjöful fiskimið sem Evrópuþjóðir hafa lengi nýtt með góðum árangri. Sömu mið eru einnig grundvöllur fæðuöflunar heimamanna sem róa út á frumstæðum smábátum og landa á hafnlausri sandströnd líkt og gerðu forfeður Íslendinga um aldir.

 

Raiss segir í grein sinni:

„Samkvæmt alþjóðalögum má hinn erlendi floti ekki ganga á þau mið sem eru sótt af Márítanískum fiskimönnum og ræna þá lífsbjörginni. En hin erlendu skip geta náð óheyrilegu magni afla í samanburði við okkar hefðbundnu fiskibáta. Og það eru skýr merki um það að þessi skip eru að taka alltof mikið. Aflinn við landið fer minnkandi og Máritanískir fiskimenn fara nú lengra út á sjó til þess að framfleyta sér. Landið býr við mikið óöryggi í fæðuöflun og sífellt fleiri leita því lífsbjargar við sjóinn en erlendur floti ógnar nú þessari lífsbjörg. Svona getur þetta ekki gengið. Þetta er ekki bara spurning um efnahag og þróun landsins heldur einnig öryggi. Staðan í öðrum héruðum Sahel sýnir okkur hvað fátækt og atvinnuleysi skapa frjóan jarðveg fyrir glæpi og hryðjuverk. Ef fiskimiðin eru tekin af okkur hefur þjóð okkar misst allt og hefur þá engu að tapa.“

 

Sahel-svæðið sem ráðherrann vísar hér til er landsvæðið í sunnanverðri Sahara en þar hafa öfgasinnuð hryðjuverkasamtök íslamista sótt mjög í sig veðrið á undanförnum árum.

 

Ráðherrann víkur síðan að samkomulagi sem Márítanía og Evrópusambandið undirrituðu í nóvember síðastliðnum um fiskveiðar í hinni gjöfulu landhelgi Márítaníu. Með því er tryggt að Evrópusambandið greiðir nú jafnvirði 59 milljónum evra fyrir aðgengi að miðunum og skuldbindur sig til að ráða heimamenn í skipshafnir sínar. Samhliða þessu ráðgerir ríkisstjórn Márítaníu nú að stíga mikilvæg skref í átt til gagnsæis og upplýsinga um heildarveiði og alla samninga við erlendar þjóðir um fiskveiðar í landhelginni. En orð eru hér ekki nóg, við verðum að sjá árangur af þessu starfi segir ráðherrann og leggur áherslu á samstarf allra aðila um heildarmagn afla sem tekinn er í landhelgi Máritaníu.

 

Myndir eru frá „höfninni“ í Noukchatt, höfuðborg Máritaníu. Ljósmyndir tók Bjarni Harðarson í ársbyrjun 2014. Bjarni setti einnig saman þennan texta en hann er nú staddur nær austurströnd Afríku.

 

 

 

 

 

 

 

Píratar ræða við Heimssýn

Ásta Guðrún Helgadótir þingmaður Pírata verður sérstakur gestur á opnum stjórnarfundi Heimssýnar sem haldinn verður á morgun, miðvikudaginn 27. janúar, klukkan 20:00 í fundarsal á annarri hæð í Iðnó við Tjörnina í Reykjavík. 

Ásta Guðrún mun ræða um stefnur og strauma í Evrópumálum enda hefur hún nokkra reynslu á því sviði og er ýmsum hnútum kunnug í þeim efnum.

Allt áhugafólk um tengsl Íslands og ESB og um sjálfstæði Íslands er velkomið á fundinn.

Grikkir verði reknir úr ESB - að hluta

Gangi það eftir, eins og meðfylgjandi frétt skýrir frá, að Grikkir verði reknir úr Schengen er búið að reka þá að hluta úr ESB því frjáls för fólks er einn af hornsteinum samstarfs innan sambandsins. Grikkir ráða engan veginn við flóttamannavandann og geta ekki fylgt eftir þeim reglum sem gilda á Shcengen-svæðinu og þeim þykir að önnur ríki í sambandinu veiti þeim ekki aðstoð í samræmi við umfang verkefnisins.

Það er því ljóst að málefni flóttamanna og reglur um frjálsa för innan ESB verða samstarfi landanna enn fjötur um fót.

Verða Grikkir reknir úr Schengen?

Hættulegri verðhjöðnun spáð á evrusvæðinu

Ewald Nowotny, fulltrúi í stjórn Seðlabanka evrunnar og seðlabankastjóri í Austurríki (og fyrrverandi þingmaður jafnaðarmanna), segir verulega hættu á að stórhættuleg verðhjöðnun verði viðvarandi á evrusvæðinu þegar líða tekur á árið. Verðbólgan er sögð vera 0,2 prósent núna en verðbólgumarkmiðið er 2%. 

Ástæða of lítillar verðbólgu er of lítil eftirspurn, lækkandi olíuverð og jafnframt vangeta Seðlabanka evrunnar fram að þessu til að hleypa lífi í efnahagsstarfsemina í álfunni með lágum vöxtum og gjafaútlánum.

EUBusiness skýrir frá þessu.

Svíar gera flestar athugasemdir við miðstýringuna í ESB

Svíar gera ESB-ríkja flestar athugasemdir við tillögur frá Brussel á grunni svokallaðrar nálægðarreglu sem segir að ákvarðanir eigi að taka eins nálægt þeim sem þær varða og mögulegt er. Frá 2010 til 2014 gerði sænska þingið með vísan til nálægðarreglu athugasemdir við tíundu hverja tillögu sem kom frá framkvæmdastjórn ESB. 

Ekkert annað þjóðþing í ESB kemst með tærnar þar sem Svíar hafa hælana í þessu.

Ýmsir vilja meina að Svíar séu mesta fyrirmyndarþjóð í þjóðfélagslegu tilliti. Þeir hafa mest við miðstýringuna í ESB að athuga. Flest þjóðþingin sinna því þó með lafandi hendi að skoða tillögur framkvæmdastjórnarinnar með nálægðarregluna í huga og því er hún í raun dauður bókstafur og miðtýringin ræður ríkjum.

 

 

Michael Caine þreyttur á andlitslausum embættismönnum ESB

Breski stórleikarinn Michael Cain er ekki hrifinn af því sem hann segir andlitslausa embættismenn Evrópusambandsins sem stjórni Bretum með tilskipunum. Þess vegna vill þessi geðþekki leikari að Bretar yfirgefi ESB. Hann telur auk þess að Bretum muni farnast betur utan sambandsins.

Mbl.is og The Telegraph greina frá.

Michael Caine vill úr Evrópusambandinu

Fleiri Bretar vilja úr Evrópusambandinu

Fleiri Bret­ar vilja ganga úr Evr­ópu­sam­band­inu en vera áfram inn­an þess, sam­kvæmt niður­stöðum nýrr­ar skoðana­könn­un­ar sem fyr­ir­tækið Sur­vati­on gerði fyr­ir breska götu­blaðið Mail on Sunday.

Mbl.is greinir svo frá:

Sam­kvæmt skoðana­könn­un­inni vilja 53% ganga úr sam­band­inu en 47% vera þar áfram ef aðeins eru tekn­ir inn í mynd­ina þeir sem taka af­stöðu með eða á móti. Ef tekn­ir eru með all­ir sem svöruðu í könn­un­inni vilja 42% úr Evr­ópu­sam­band­inu en 38% vera þar áfram.

Skoðana­könn­un­in var gerð dag­ana 14.-16. janú­ar og var úr­takið rúm­lega eitt þúsund manns, sam­kvæmt frétt AFP.

53% vilja úr Evrópusambandinu

Allt í skralli hjá ESB segir Juncker

Það er ekki hægt að túlka þessa frétt, sem segir frá fundi æðstaprests ESB með fjölmiðlum, öðruvísi en sem svo að útlitið sé mjög dökkt hjá ESB. Hann segir ekkert vit í evrunni eftir að flóttamannavandinn setti Schengen-ferðafrelsið úr sambandi. Það er uppgjafartónn í forseta framkvæmdastjórnarinnar þótt hann segist ekkert vera að gefast upp.

Juncker "the drunker", eins og sumir hafa kallað hann vegna skrautlegrar framkomu á fundum með blaðamönnum þar sem hann hafði greinilega fengið sér aðeins of mikið í tána, var ekki svipur hjá sjón í dag. Hann var venju fremur daufur.

Er það nema von. Kannski hann geti sótt sér von, trú og styrk til þeirra evruelskenda sem enn berja höfðinu við staurinn hér upp á Fróni.

Erfitt ár fyrir Evrópusambandið