Ríkisstjórnin verður að gera betur

Ríkisstjórn með þá skýru stefnu að Ísland eigi ekki að ganga í ESB og ekki vera umsóknarríki, stefnu sem bökkuð er upp af samþykktum æðstu lýðræðisstofnana þeirra flokka sem að ríkisstjórninni standa, verður að gera betur en þetta til að draga umsókn um aðild að ESB til baka og sjá til þess að ekki sé litið á Ísland sem umsóknarríki að ESB.

Það er ekki nema von að dyggum stuðningsmönnum ríkisstjórnarflokkanna mislíki þetta árangursleysi ríkisstjórnarinnar.

Skýrsla úr fílabeinsturni

Á þessari frétt Morgunblaðins um skýrslu starfsmanns endurskoðunarfyrirtækisins KPMG verður ekki annað séð en að viðkomandi fylgist ekki vel með því sem er að gerast í efnahagsmálum.

Í fyrsta lagi er ESB miklu meira en bara gjaldmiðilsbandalag. Í öðru lagi virðist ekkert mið vera tekið af því að þetta gjaldmiðilsbandalag er ekki sjálfbært miðað við núverandi skipulag. Í þriðja lagi skiptir litlu máli hvort við séum á leið inn í ESB eða ekki; ákveðin atriði varðandi höftin verður að leysa óháð því og áður en af mögulegri inngöngu gæti orðið.

Svo er líka vert að muna að það kom okkur að engu haldi að vera umsóknarríki í ESB varðandi höftin. ESB og utanríkisráðuneytið voru með einhverja sýndartilburði um sérfræðiaðstoð en öll sú sérfræðiaðstoð sem þegin hefur verið kemur annað hvort frá innlendum sérfræðingum eða sérfræðingum Alþjóðagjaldeyrissjóðsins. Sérfræðingar AGS á þessu sviði eru svo aðallega frá öðrum löndum en Evrópulöndum.

Heppilegra að losa höftin með evru

Evran lifir ekki af við núverandi aðstæður

Framkvæmdastjórar stærsta fjárfestingasjóðs í heimi segja að evrusvæðið muni ekki lifa af við núverandi fyrirkomulag. Eina leiðin fyrir framtíð evrunnar er sú að þau lönd sem nota evruna verði að einu ríki með sameiginlegri stjórn á sköttum og fjármálum ríkisins.

Þetta segja Andrew Bosomworth og Mike Amey sem eru framkvæmdastjórar The Pacific Investment Management Company (PIMCO) í samtali við breska blaðið The Telegraph. Þeir segja að hægagangurinn í efnahagslífinu á evrusvæðinu með litlum eða engum hagvexti að undanförnu og miklu atvinnuleysi, sem hefur verið nálægt 11% að undanförnu að meðaltali og nálægt 23% hjá ungu fólki, hafi fætt af sér öflugar stjórnmálahreyfingar á ystu vængjum stjórnmálanna til hægri og vinstri, svo sem Podemos á Spáni, Syriza í Grikklandi og Front National í Frakklandi.

Framkvæmdastjórarnir segja að sagan sýni að fyrirkomulag á borð við evruna geti ekki staðist til lengdar og vísa meðal annars til gamla norræna myntbandalagsins (1873-1914) í þeim efnum. Miðstýrð peningastefna, eins og hjá Seðlabanka evrunnar, geti ekki lifað af án þess að henni fylgi miðstýrð ríkisfjármálastjórn.  

Eigum við að afhenda ESB makrílinn?

ESB hefur unnið gegn Íslendingum varðandi veiðar á makríl og öðrum svökölluðum deilistofnum eða flökkustofnum. Í fyrstu vildi ESB ekki viðurkenna rétt Íslendinga til að veiða makríl en síðan krafðist sambandið að Íslendingar veiddu ekki meira en um 6% í stað þeirra ca. 17% sem íslensk stjórnvöld hafa talið réttan hlut. Ef ESB hefði ráðið hefðu útflutningstekjur Íslendinga verið um hundrað milljörðum króna minni síðustu ár og mun erfiðara fyrir Íslendinga að ná sér upp úr erfiðleikunum eftir kreppuna.

Ef Ísland gengur í ESB tæki forysta ESB yfir samningsrétt okkar varðandi flökkustofna eins og makríl. Hefðum við verið komin undir ESB-valdið árið 2010 er líklegt að við hefðum ekki fengið að veiða neinn makríl til að byrja með og síðan að líkindum í hæsta lagi aðeins brot af því sem við höfum veitt í dag.

Vill fólk afhenda ESB samningsréttinn varðandi deilistofna? Lesendur eru hvattir til að taka þátt í lítilli skoðanakönnun um það hér til hliðar.

70% Norðmanna hafna ESB og aukin umræða um EES-samninginn

Þessi frétt á mbl.is sýnir hve gífurlega mikil andstaða er gegn inngöngu Noregs í ESB. Jafnframt sýnir hún að umræðan um kosti og galla EES-samningsins er vaxandi í Noregi. Þannig hafa þrjú stétt­ar­fé­lög þegar tekið upp þá stefnu að tengsl Nor­egs við innri markað Evr­ópu­sam­bands­ins verði ekki byggð á EES-samn­ingn­um. Hér á landi er andstaðan við inngöngu í ESB álíka mikil. Fólk er líka smátt og smátt að gera sér grein fyrir "ómöguleika" þess að halda áfram viðræum á grunni umsóknar með margháttaða galla. Þá eru flestir nú sammála um að hið gallaða regluverk fyrir fjármálafyrirtæki á EES-svæðinu hafi ekki dregið úr skaðanum sem bankabólunni fylgdi fyrir 2008 - síður en svo. 

Fréttin á mbl.is er hér: 

Sjö af hverj­um tiu Norðmönn­um vilja ekki ganga í Evr­ópu­sam­bandið sam­kvæmt niður­stöðum nýrr­ar skoðana­könn­un­ar. Um 20% vilja hins veg­ar ganga í sam­bandið en aðrir eru óákveðnir. Könn­un­in var gerð af fyr­ir­tæk­inu Sentio fyr­ir norsku dag­blöðin Nati­on­en og Klassekam­pen.

Fram kem­ur í frétt Nati­on­en að skoðanakann­an­ir hafi sýnt stöðugan meiri­hluta gegn inn­göngu í Evr­ópu­sam­bandið und­an­far­inn ára­tug. Fyr­ir vikið leggi sam­tök and­stæðinga inn­göngu í sam­bandið, Nei til EU, meiri áherslu í dag á and­stöðu við aðild Norðmanna að samn­ingn­um um Evr­ópska efna­hags­svæðið (EES) og vinni að því að fá stétt­ar­fé­lög til þess að taka af­stöðu gegn hon­um. Þrjú stétt­ar­fé­lög hafi þegar tekið upp þá stefnu að tengsl Nor­egs við innri markað Evr­ópu­sam­bands­ins verði ekki byggð á EES-samn­ingn­um.

Greint er frá því að Jon­as Gahr Støre, formaður norska Verka­manna­flokks­ins, hafi ritað langa grein í Klassekam­pen ný­verið þar sem hann hafi varað við því að segja EES-samn­ingn­um upp. Haft er eft­ir Kat­hrine Kleve­land, for­manni Nei til EU, að grein­ina hefði hann ekki skrifað nema hann hafi talið sig til­neydd­an. Hins veg­ar kem­ur fram í frétt­inni að meiri­hluti Norðmanna vilji sam­kvæmt skoðana­könn­un­um halda í EES-samn­ing­inn.

70% Norðmanna vilja ekki í ESB

Var umsókn Össurar á skjön við lög og stjórnarskrá?

Ljóst er að Össur Skarphéðinsson fór á skjön við viðmið Evrópusambandsins þegar hann afhenti forystumönnum ESB umsókn um inngöngu Íslands án þess að getið var um þá fyrirvara sem Alþingi Íslands setti um fiskveiðimál og fleira. Þegar þeir fyrirvarar komu í ljós steytti umsóknin á skeri.

Það er í fleiri atriðum sem umsóknin brýtur gegn lögum og stjórnarskrá samkvæmt skilningi margra. Þannig fól umsóknin í sér fyrirætlun um valdaframsal til erlends aðila sem var og er óheimilt samkvæmt stjórnarskránni. 

Í öðru lagi telja margir að umsóknin hafi verið það mikilvæg stjórnarráðstöfun að það hefði átt að bera hana upp í ríkisráði. Það var ekki gert.

Hvernig í ósköpunum ætlar fólk sér að láta fara fram þjóðaratkvæðagreiðslu um framhald umsóknar sem var vafasöm, ekki aðeins út frá stjórnarskrá og íslenskum lögum, heldur einnig gagnvart þeim reglum sem gilda í Evrópusambandinu?

VG vill skoða aðild Íslands að nýju hernaðarbandalagi

Sem kunnugt er hefur forysta VG, þvert á samþykktir flokksins, viljað toga Ísland í átt að ESB og meira að segja vinna að því að gerður verði samningur svo hægt sé að kíkja í pakkann, sem kallað er. Ráðamenn í ESB vilja gera samtökin að hernaðarbandalagi.

Forysta VG vill því skoða aðild Íslands að nýju hernaðarbandalagi. 

Frakkland er stóra vandamálið í ESB

Fyrrverandi forsætisráðherra Ítala og þekktur hagfræðingur þar í landi segja að Frakkland sé að verða að stærsta vandamáli ESB. Frakkar eigi erfitt með að fylgja ýmsum reglum og reglugerðum sem ESB setur, þeir heimti að fá fresti til að uppfylla skilyrði um opinberan rekstur og svo sé almenningsálitið í Frakklandi mjög andsnúið ESB.

Einhverjir héldu að Grikkland væri aðalvandamál ESB. En það er víst bara smáræði á við það ef eitt af stóru ríkjunum er á leið í skammarkrókinn.

Umsókn Össurar á skjön við stjórnsýslu ESB

Það verður ekki annað séð en að sú umsókn sem Össur Skarphéðinsson, fyrrverandi utanríkisráðherra, sendi forkólfum ESB fyrir hönd ríkisstjórnar Jóhönnu Sigurðardóttur og þáverandi meirihluta Alþingis hafi ekki uppfyllt þær kröfur sem ESB gerir til slíkra umsókna. Umsóknin var skilyrt en ESB gerir kröfur um skilyrðislausa umsókn.

Össur lét vera að kynna ESB þá fyrirvara sem Alþingi gerði með vísan til álits meirihluta utanríkismálanefndar. Þeir fyrirvarar komu hins vegar upp á yfirborðið þegar farið var að ræða sjávarútvegsmál vorið 2011. Á því strandaði málið. 

Össur fór því af stað með ótæka umsókn og sigldi því í raun og veru undir fölsku flaggi gagnvart ESB og íslensku þjóðinni.

Gögn utanríkisráðuneytis um umsóknarferlið

Lesendur Heimssýnarvefjarins eru fljótir að átta sig á því sem aðrir í tímahraki fundu ekki strax. Gögn utanríkisráðuneytisins um umsóknarferlið voru náttúrulega á sínum stað þótt leiðum að þeim hefði einhvers staðar verið breytt. Svona skilar samvinnan sér. Hafið bestu þakkir fyrir. Utanríkisráðuneytið var vitaskuld með þetta á vísum stað! Glöggir lesendur geta svo séð hvort þarna vanti að þýða einhverjar skýrslur.

Sbr. fyrri færslu:

Glöggir lesendur Heimssýnarvefjarins hafa tekið eftir því að efni á íslensku um aðildarviðræður við ESB sem áður var aðgengilegt er ekki vel sýnilegt lengur á vef utanríkisráðuneytisins. Efnið er aðgengilegt á ensku en við viljum gjarnan hafa áfram aðgang að því efni sem hinir þýðingarmiklu þýðendur stjórnarráðsins höfðu fyrir að vinna. 

Þess vegna er þeim eindregnu tilmælum beint til ráðuneytisins að gera þetta efni betur aðgengilegt því þar er ýmsan fróðleik að finna.

Á ensku er þetta hér: http://eu.mfa.is/documents/

Sé hér um einhvern misskilning eða mislestur að ræða skal strax beðist afsökunar á því!