Evra tóm vitleysa

 

Enn eru þeir til sem lofa gulli og grænum skógum við það eitt að skipta um gjaldmiðil.  Fáir trúa slíku, og enn færri nenna að svara bullinu.  Einn þeirra sem stundum stingur niður penna um málið er hinn þekkti bankamaður Ragnar Önundarson.  Hann segir m.a. á Fasbók sinni: 

Hugmyndina um að taka upp evru ætti að skoða út frá öllum sjónarmiðum. Ísland er háhagvaxtarssvæði, en ESB stöðnunarsvæði. Að nota mynt og vexti ESB þýddi að vöxtum sem hagstjórnartæki væri kippt úr sambandi. Hagsveiflan kæmi fram í atvinnustiginu. Í góðæri mundi allt fyllast af erlendu vinnuafli og þegar niðursveiflan kæmi yrði stórfellt atvinnuleysi, ekki síst meðal erlendu starfsmannanna. Við mundum laða hingað fólk vegna skammtimaþarfa atvinnulífsins og taka langtimaábyrgð á velferð þess. Af því að gjaldmiðillinn aðlagast ekki utanaðkomandi sveiflum í afla, verðlagi útflutningsvara og komu ferðamanna mundu gjaldeyrisaflandi fyrirtæki týna tölunni. Langan tíma tæki að koma hjólum atvinnulífsins á snúning á ný, sem þýðir að lengri tíma tæki að losna út úr atvinnuleysinu.

https://www.facebook.com/ragnar.onundarson

 

Þriðji orkupakkinn fer fyrir dóm í Noregi

 

Hæstiréttur Noregs úrskurðar að 3. orkupakki Evrópusambandsins skuli metinn af dómstólum þar sem spurt er hvort orkupakkinn standist stjórnarskrá landsins.

Systursamtök Heimssýnar í Noregi stefndu norska ríkinu sem vildu frávísun. Nú hefur hæstiréttur í Noregi úrskurðað að stefnan verði dómtekin.

Hér á Íslandi urðu, eins og menn muna, harðvítugar deilur um upptöku 3. orkupakkans.  Óumdeilt er að í orkulögunum felst framsal á valdi til Evrópusambandsins.  Rök þeirra sem vildu framselja valdið voru þau helst að það væri ekki víst að það yrði til tjóns fyrir Íslendinga og að Evrópusambandið langaði til að fá vald í orkumálum. 

Brexit hjálpar bæði Íslandi og Bretlandi

Þökk sé Brexit gátu Bretar bólusett í takt við aðstæður þar í landi en þurftu ekki að sitja undir skrifræði Evrópusambandsins og fá leyfi frá Brussel að bólusetja.

Bretar eru langt á undan meginlandi Evrópu í baráttunni við Kínaveiruna, - þökk sé Brexit.

Og nú ætlar Íslandsstofa í átak að laða breska ferðamenn til landsins á meðan farsóttin lokar mörkuðum í ESB-ríkjum. Fullveldi auðveldar viðskipti, skrifræði torveldar.

Íslandsstofa sækir fram í Bretlandi

Ný tegund stjórnarfars

 Enn á ný ýtir Arnar Þór við Íslendingum með meitluðum og innihaldsríkum skilaboðum um inntak lýðræðis og valds. Arnar þór ritar í Morgunblaðið og er greinin endurbirt af Félagi Sjálfstæðismanna um fullveldismál.

Arnar Þór segir m.a.:

"Íslendingar hafa enn ekki vaknað til vitundar um þá varasömu stöðu sem hér er uppi. Í kjölfarið hef ég velt því upp af fullri alvöru hvort við stöndum mögulega frammi fyrir því að einhver ný tegund stjórnarfars sé að ryðja sér til rúms, þar sem valdið kemur ekki lengur frá þjóðinni, heldur að ofan; frá miðstýrðu, fjarlægu yfirþjóðlegu embættisvaldi, þar sem samnings- og lagaákvæði eru aðeins til skrauts, þar sem menn taka sér vald í krafti embættis og sæta sjálfir engri valdtemprun."

Tímabært er að ræða þessi mál með öðrum hætti en með útúrsnúningum og innihaldslausu fjasi um að þeir sem vilji ekki meira valdaframsal ti útlanda séu steintröll. 

https://fullveldisfelagid.is/kreppa-lydraedisins/?fbclid=IwAR0bQstzM5G0pkkbmSC_Kl-yQFjvOxJTxZaVVbdtFO82j5hIyImoU3EbcO8 

Jón, Ásgeir og frjáls verslun

Ásgeir Jónsson, seðlabankastjóri, er þekktur fyrir áhuga sinn á sögu Íslands.  Í grein í Feyki fjallar hann um þau vatnaskil sem urðu við siðaskiptin.

Ásgeir ræðir meðal annars hversu hagstætt það var fyrir Dani að hafa öll tök á Íslandsversluninni.  Það var á hinn bóginn óhagstætt Íslendingum.  Í þessum málum eru þeir sammála, Jón Sigurðsson forseti og Ásgeir, sem og fjölmargir aðrir, að frjáls verslun – frjáls samskipti við umheiminn séu lykillinn að velmegun Íslands.

Það verður kynslóðum framtíðar ráðgáta hvers vegna hópur manna á Íslandi vildi í upphafi 21. aldar færa vald yfir Íslandsverslun til erlendra manna sem bjuggu í fjarlægri borg og sóttu umboð sitt til annarra en Íslendinga. 

https://www.feykir.is/is/frettir/um-hnignun-islands-eftir-sidaskipti-askorandinn-asgeir-jonsson-brottfluttur-skagfirdingur?fbclid=IwAR1cnG39ewREuehL-IDAOBXFrE20Xr2A-8zihK-Zxlubn7AEJlgAf0YXP0w

 

"Aðildarsamningaviðræðu"þingmaður í framboð fyrir VG?

Einn furðulegasti leikþáttur stjórmála liðinna ára voru hinar svokölluðu “samningaviðræður” um innlimun Íslands í Evrópusambandið.  Látið var í veðri vaka að stórkostlegar samningaviðræður væru í gangi þegar ljóst var frá upphafi að aðildarríki Evrópusambandsins gangast refjalaust undir löggjöf sambandsins, eins og hún er, og ekki síður eins og valdamönnum sambandsins þóknast að hafa hana í framtíðinni. Evrópusambandinu sjálfu má segja til hróss að aldrei var nein fjöður dregin yfir það.  Það gerðu hins vegar ástmenn þess á Íslandi.

Einn þeirra sem vildi fyrir alla muni eiga í “samningaviðræðum” við Evrópusambandið er Róbert nokkur Marshall.  Hann er nú sagður vilja verða þingmaður fyrir stjórnmálaflokk sem að jafnaði hefur verið hallur undir fullveldi þjóðarinnar.  Einu sinni bognuðu sumir þingmanna flokksins að vísu í þeirri baráttu, en það gerist vonandi ekki aftur.

Hvaða afstöðu skyldi téður Róbert nú hafa til “samningaviðræðna”.  Vill hann ræða endurskoðun á EES-samstarfinu, eða langar hann kannski undir niðri að afhenda erlendu ríkjasambandi völdin yfir Íslandi? 

Væri ekki heiðarlegt af Róberti að upplýsa um það?

 

https://frettabladid.overcastcdn.com/documents/210126.pdf

Skrýtin skepna þessi EES

Eins og við mátti búast sömdu Bretar og Evrópusambandið á elleftu stundu.  Sá samningur lýtur að frjálsri verslun, báðum til hagsbóta og hann veldur mörgum í Noregi og á Íslandi heilabrotum. 

Hvernig stendur á því að Íslendingar greiða verulegar upphæðir fyrir aðgang að markaði Evrópusambandins sem er svo ekki hindranalaus fyrir helstu útflutningsafurð Íslendinga, sjávarafurðir?  Hvernig má það vera að Ísland ætli að leyfa Evrópusambandinu að skattleggja alla ferðamenn sem til Íslands koma frá löndum utan Schengensambandsins?  Hvernig stendur á því að Íslendingar láta óteljandi reglur og tilskipanir yfir sig ganga, óháð því hvort þörf sé á þeim og hvað það kostar samfélagið?  Hvernig stendur á því að Íslendingar framselja vald í orkumálum til Evrópusambandsins?

Er ekki tímabært að endurskoða fyrirbærið EES?

 

https://neitileu.no/aktuelt/brexit-viser-at-det-finnes-alternativer-til-eos-avtalen

Eins og sjálfstæð þjóð

Kári Stefánsson hefur verið á höttunum eftir bóluefni fyrir Íslendinga.  Af óljósum ástæðum sem virðast tengjast Evrópusambandinu hafði stjórnvöldum á Íslandi gengið verkið illa.  Af því tilefni segir Kári:  "Þetta er bara dæmi um það hvað það get­ur verið mik­il­vægt að geta hagað sér eins og sjálf­stæð þjóð..."

Um það þarf auðvitað ekki að hafa fleiri orð, en það er ágætt að rifja það upp öðru hverju. 

https://www.mbl.is/frettir/innlent/2021/01/08/litur_ut_fyrir_ad_thetta_aetli_ekki_ad_ganga/